MAZMUR 90 - Allah Wene Fano Wene Hupla Inane

BUKU ENGGAMINOGONEK MENE: MAZMUR 90-106 At Allah nen awea'ma ninobagaluk fetninarek mondok werek, iluk samban isikhe wene

¹ At Allah amingmingengge Musa a'nogo nen samban isikhe mene. ”Allah neisena, Nit afuni endamaren ta'larik waga logolik, hobuk ta'lasugun huli andoma faget nit ninebe hawea'ma kuluk werek oba re Hat hebeat welagen o.

² Haren o tom-tom inom kweang inom, yi mene ti mene kweangma welagarek mene inom, oan elalhi'lek logolik andoma re, Hat hebe hero weinam agu aple inom, herembulmo wa'lagu aple inom he legengge welagagin.

³ Haren he, afuni attak mene a'nogo ebe kweang abu'nengge mene elalhiginmo re, afuni inambotkwe kweang abu'nengge asuageluk hilingfisikhi lagen.

⁴ Nit afuni ninendawimo nen he, 1.000 tahun welago, iluk anggogorek mene andi Hat hendawimo re, o hup misik hak wei uluk, hup agarek andi hak anggi lagen. O hubanggo, it ekhe endebat kagalek wela'luk nogo ugu kwelek, it ekhe inobulu'mo kagalek welagik agarek andi hak anggegendek.

⁵ Haren he, inabi hagarek andi hangge ninebe leget ninobagagik, nen i nen woginapluk lagarek hak hilingninobagagik ikhi lagen. Nen yi mene ti mene fulelheresik,

⁶ o hubet ebe hokho a'luk engga wurilherek meneat he, o hu'mokhokwe sawet agarek andi hangge hilingninobagakhi lagen.

⁷ Hat ha'mage nit ninoba fugunem nit youk mondok laluk were'ma re, hanini nen ninebe leget ninobagakhi lagen.

⁸ Nit weak hilingiti lago mene a'nogo Hat helokhoma fuluk were'ma re, weak hilingitorek mene hinago werek mene re, Hat helokhoma re mondogat weinam enek werek.

⁹ Hat ha'mage nit ninoba fikhi lagen andiba re, tahun nit nineluk logou mene a'nogo re, set wulafi lago andi hak lek agarek.

¹⁰ Nit ninebe umur he we, 70 tahun huli nek welagorek. Mene re, ninomame werek halok enek he, 80 tahun huliba asi lagorek. A'nogo meneat he ninebe a'nogo nineluk logolik he yi enggin ti enggin hikhi logolik mondok welago. Nen ninebe umur endebat a'nogo wela'luk arat lek agorek andi.

¹¹ Hat ha'mage mondok het-pet egendek mene andi sa elu nogo? Athe ha'mage mondok weakhogo ninoba fugunem wurep oba hilinglagarek mene andi sa nen futfikherek nogo?

¹² Nit nineluk umur horogat welago mene andi faget, fut fouwageluk ninendawinggen kagalek mene hilingninobagakhi logoin o.

¹³ Tuhan neisena. Ha'mage het-pet ili'lago mene andi re ki huliba nen legasigin nogo? Ha'mage siok imbik he, hambotkwe nit hamingmingengge mene yi hendawit ninafi logoin o, neisena.

¹⁴ Nit ninebe nineluk logolik, ninendawimo ninagayetik, wuni watik, ugu mondok logouwageluk, sumburu inalabut ninghogo nenggarek andi hak, o hundik-handik andoma ohealek hup siakhogo hokho-pokhorogo hendawit ninafi logoino o, neisena.

¹⁵ Haren yi tahun ti tahun enggin-fenggin ninoba fikhi lagagin higithogoat obulu'mo re, ninendawimo ninagaiyek hikhi logouwageluk hilingninafi logoino o.

¹⁶ Haren ekhe mene ekhe mene mondok hokhorogo hilingitigin mene a'nogo nit hamingmingengge mene yi ninoba inuk nisikhi logoino o. Nen Hat homame hokho mene a'nogo re, niren taginabugun mene ineilenggen hikhi logouwageluk weinamet fikhi logoino aro.

¹⁷ Tuhan Allah nit neisena. Nit nineabu hilingiti lago mene andoma ambisangma enggen fanorogo nek i'lagunem hikhi logogun nen he, Haren fanot ninobagakhi logoino o, neisena,” iluk Allah ayonggo fesikhe.