MAZMUR 9 - Allah Wene Fano Wene Hupla Inane

At Tuhan nen higithogo hilingiterek andi nen samban oba hai watikhe wene

¹ Afuni nen wuni wulak fuluk inebe seberogo ikhi logolik at Mut-Laben awuni mene ane lisogo Daud en isikhe awuni a'nogo.

² Tuhan neisena, an nendawinggenma mondogaren Hat hoba hai wathafi logogin, nen Haren wesa polanhogo elalogo fesigin mene andoma faget he fagerik nikhi logogin.

³ Neisena Hat he Tuhan Lego Mondok welagenma re, an nen Hat hobaget fogethafik, nagaiyegetik, hilingiti lagi.

⁴ Hat helokhoma nen he, an naselei mene omanogo sugulogo inambotkwe heise lagunem, ineisok tunghogo waraluk inebe wa'lari'lagwi.

⁵ Neisena, Hat he an nawene ayo palogo pilinget fuluk katokhogo nek hilingiti lagen mene welagenma re, andiba an nawene hoba waluk wagunem an nebikhit a'luk nagap telogo nobagakhi lagen.

⁶ Haren he it afuni ekhema-ekhema inunggulenu lombok omanogo unggum wogisigik, weak hilingitarek mene omanogo leget fisigik hilingitunem he, it afuni ekhe nen it inoba eberek logogun lek.

⁷ Nit ninaselei mene re inebe mondogat leget fisigik, it inawi wurik he mondok meisak langgukhogo lakfisigik egenma re, afuni nen ogo ekhe it faget eberisogoin mondok lek.

⁸ Meneat he, At Tuhan he Lego mene logolik melalinafu mondok logogin. Aren afuni kweangma mene mondogat inawene pilingisogo katoget fuguba faget obalik takhta a'nogo wurogo fikhemo werek.

⁹ Aren he it afuni inunggulenu lombok omanogo katokhogo nek melalinaferek, nen it inebere inawene ayo palogo pilingfuluk mondok higithogo nek tegeterek.

¹⁰ At Tuhan andi re afuni nen enggin-fenggin inoba fugunem awe a'ma kuluk welagaikharek oba faget werek. it enggin fenggin hugu logolik awe a'ma kwi lagu mene faget werek.

¹¹ Tuhan neisena, afuni Hat hebe inelu mene re Hat hoba nek inendawinggen eberek logolik werek, nen it afuni Hat herakhabi'lagwi mene re Haren ogo oboget isaluk lagalagen mondok lek.

¹² At Tuhan o Sion oba melalinafi logolik werek mene andi nek fogerati logouwak! Aren elalin hilingiterek mene andoma mondogat he, it afuni inunggulenu lombok welagaikharekwe andoma yagaisilik laga logouwak.

¹³ A'nogo hilingiti logogun andi re, it inoba yi enggin ti enggin hikhi logolik were'ma inom, yi ou ti ou hikhi logolik were'ma inom Aren inoba onggoragi'lek eberek mondok werek andi nen, it afuni ina'mageba hilingitarek mene andoma re Aren unggum wogisikherek.

¹⁴ Tuhan neisena! it afuni an naselei mene nen noba ou pourogo nek hilingnabi'lagwi mene andoma heilenggen nean o, An hendawi nealuk wa'lagaikharek meneba andoma nen fagaisogo wulak nobagaime o.

¹⁵ Andiba re, an nen it afuni Yerusalem mene inelokhoma nen Hat fogethafi logogin. Haren an nagap telnafi logogin oba re, an nagaiyegen foget fakhikhi logogin o.

¹⁶ Yi afuni ti afuni inunggulenu lombok Hat hebe inonggot mene re, it inonggwaregen kweang habul fakhagarek oba andoma pilagik, nen hele webet fakhagarek oba omanogo ke'nok igik, agarek.

¹⁷ At Tuhan ebe weinam aga logolik he, Aren wene mondok katokhogo palherek andiba, it afuni weak hilingitarek mene re it inonggwaregen hilingituba ambisangma saburagarek.

¹⁸ It afuni weak hilingitarek mene inom, yi afuni ti afuni inebe mondogat Allah ane sagalogo hilingitarek mene omanogo inom andoma re, it inebe wa'lagaikharek oba omanogo kugun oba arat horogasi wagama werek.

¹⁹ It afuni inelagaik mene andi re inenggi hundik-hundik omanogo a'nogo nek logouwageluk inambotma fisaluk werek lek, nen it ap weak peakhogo nek welagaikharek mene andi re a'nogo nek logouwageluk werek legat.

²⁰ Tuhan neisena, Hat hebe menla'luk he afuni inunggulenu lombok andoma inawene ayo wurogo palinabin o, it inonggwaregen leget fakhoageluk herak fisagun, neisena.

²¹ Tuhan neisena, we it inebe mondogat inailo asimbik, it inunggulenu lombok andoma nen, nit he afuni meneat welago, iluk inendawinggen sebelfakhoago.