MAZMUR 89 - Allah Wene Fano Wene Hupla Inane

”Weak mene ninoba agunem, Allah obabut fano nen telninaferek,” iluk wuni watikhe mene

¹ Etan awi Ezrahi mene andi nen yanggulinafikhe awuni.

Tuhan Omame Mondok Hokho mene a'nogo nen tiphogo nek hilingiterek wene.

² Neisena Tuhan, Haren hendawi nealuk, hendawi hundik hilingnafi lagen mene andi faget, an nen wuni watu mondok logogin o, Nen Haren tiphogo nek hilingnobagakhi lagen mene andi faget he, inebe ekhe ta'lagik ekhe ta'lagik hilingirik wagu kwelek andoma an nen fakhogoat yagaisugu logogin o.

³ Haren hendawi hundik hilingnafi lagen mene andi re mondok-mondok logogin mene o, nen, Haren tiphogo nek hilingiti lagen mene andi re pogot higit abolok lek logogin andi nen he an nelu o.

⁴ Haren ikhi logolik he, mel isigin andi: ”Hit An nagainafuri wenakhinafigi mene, yi'nogo hilinghinabigin o, iluk wene watnisasigin mene andi, Honggwarek henu hombuk palogo, hamingmingengge Daud mel yagatigin.

⁵ Hat hebe kain henupogot logolik ferinarek logogin oba andi re, inenggi mondok-mondok andoma faget An nen nenggi omamerogo fisogo logogin o, nen mo lagagik-pigik andomaba re hat hagainafuri tagomangge mene nen ferinarek logogun,” iluk yagati, isigin a'nogo.

⁶ Andiba re it pogoroba andogorek werek mene omanogo nen he Haren wene hokho mene hilingitigin mene andi faget foget hafarek. Nen Haren tiphogo nek hilingiti lagen mene andi faget he Hawuni watu welagaikharek andi.

⁷ O pogoroba andoma re, Tuhan hebe higit mene ekhe werek lego, nen it pogoroba ineluk welagaikharek mene andoma Hat hinom higit mene ekhe werek legaro.

⁸ Hat he it ekhe inebe fano horek welagaikharek mene omanogo inanggele'ma nen he legeisogo hobagaluk agaugwet hafarek, Nen it ekhe Hat hera'lukwe haningisogo welagaikharek mene omanogo nen inailot hafarek.

⁹ Nineisena Tuhan Allah, Homame Mondok Hokho mene, Hat Homame welagen andi hakhogo re ap sa hak ekhe werek? Neisena Tuhan, yi wene ti wene faget Hat he katokhogo nek hilingitu hagun welagen.

¹⁰ I laut yenggele'ma esinggen fonyalik lenggalik wagarekwe andoma re Harenek welagen, ha'labu inailo mene wasi wagarek mene andoma re Harenat abolok leget fikhi lagen.

¹¹ Harenat he, Rahab anini mondok weak mene i laut elema welagarek mene a'nogo unggul sagalogo fegen. Nen Hat henggi omameba re it haselei mene omanogo inomame leget fisikhi lagen.

¹² Pogot inom kweang inom andi eisere Hat honggwaregat welagen, Kweang ebe inom yi mene ti mene oba werek engge andoma inom mondogat he Haren enek elalogo fesiginmo werek.

¹³ O i elesi higit inom, i ambut higit inom andoma re, Harenat elalogo fesigin. Tom Tabor en inom, Hermon nen inom, Hat hobaget inagaiyegen henu seralhu logolik hawuni watu werek.

¹⁴ Hat he homame mondok hokho mene welagen, Nen Haren hilingiti lagen mene andoma re mondok elalin mene hilingitendek.

¹⁵ Hat hebe raja mendek logolik melalinafu welagendek oba andi ebe ero re, Hat hawene melalek inom, higithogo hilingiti lagen mene inom andi aro. Haren hendawirinafendek mene andi inom, tiphogo nek hilingiti lagen mene andi inom he Hat hobabut hilingiti lagen mene andiba weinam agarek.

¹⁶ It afuni inunggulenu ekhe Tuhan hebe haselek hombakbak a'nogoba logolik, inagaiyekhogo Hat hobaget wene kabogetarek mene andi re, inagaiyek hikhi logouwak.

¹⁷ Haren higithogo nek hilingfisikhi lagen andi nen he, iren lingge inukhogo inabolo'lek logolik, wuniba Henu seralhu mondok welagaikharek.

¹⁸ Hat hobabut fano andiba nit ninomame agorek, nit ninomame asuagaluk Homame mondok hokho mene a'nogo wo'nisegendek.

¹⁹ Nineisena Tuhan, nit ma'murogo fetninarek mene andi re Haren wenagaisogo fesiginmo welagorego, Nen nit ninoe raja re it afuni Israel mene ineisena Allah horek mondok werek mene a'nogo onggwarek mene o.

At Allah nen Daud wene waretikhe mene a'nogo

²⁰ O attagat andoma inabikanggo wokhagarek hak, Haren hamingmingengge tiphogo hilingitarek mene inoba yagaisikhi logolik he, ”Ap misik ekhe ambong siserek mene kware-kware mintago ungguloba puget figi o. Afuni inanggele'ma nen ap misik ekhe An nen heragaisogo figi mene a'nogo arat menfigi o.

²¹ An nen namingmingengge Daud ebe wenatirik he, minyak unggul oba kweisalogo ebe menfigi.

²² An nomameba hundik-handik kagalek logolik, omamet fugu mondok logogin.

²³ A'nogo wogotunem aselei mene nen mabenet fikhi logogun mondok lek, nen inobabut weak mene nen sebelogo fikhi logogun legat.

²⁴ At aselei mene re inebe mondogat An nen wulil tagalogo leget fisagain. Nen at oba inapsiri wat fisili'lagwi mene andoma re An nen it inebe inoasigin.

²⁵ An nendawinggen at oba hundik mondok logolik, oba lombokhogo mondok logogin. Omameba ferinarek mondok logouwagaluk he, An nen ekhe inom omamet fikhi logogin.

²⁶ Aren ferinarek logogin oba o kerajaan andi re An nen hokhot fikhi logogin. I laut yenggelegen pikhit i Efrat huli andomaba ferinarek logouwagaluk hilingfagain.

²⁷ A'nogo hilingisogo foumo aren he mel yaganesigin, ”An neisena re Allah Harat logogin o. Hawe a'ma fetnarek mondok logolik, telnafi logogin mene o,” iluk yaganeti logogin.

²⁸ An nen he, at ebe namlogo manggusa mene hilingisogo fagain. Inenupogot mondogat he a'ma hangge werek kwelek, arenek he esin mondok logogin.

²⁹ An nen he, at oba nendawi hundik mondok logogin. Wene waretigi mene andi taganet lasigin mondok lek.

³⁰ Pogot kweang lek agi'lek werek kwelek he, aren tagomangge mene re inenupogot mondok logogun. Aren tagomangge mene ta'larik laga logolik, ap it mene mondok inenupogot aga logogun.

³¹ A'nogo meneat he, aren tagomangge mene nen, an nen komorinafigi wene andi hologo hilingiti'lek, sagalogo hilingiti logogun halok,

³² nawene melalek higithogo hilingiti logouwagaluk fesigi mene andi inendawimo seramet figik, higithogo hilingiti logoino, iluk igi mene andi sagalogo figik, hilingiti logogun halok,

³³ iren wene taganet fogoin andi nen he, An nen wene inoba fembik enggin-fenggin inoba fagain o.

³⁴ A'nogo meneat he, at Daud he nendawi hundik mondok logogin, at oba lombokhogo welagirek mene andi, herakfuluk lagain lek.

³⁵ An nen he, wene waretigi mene andi ebe hilingiti'lek kamo igin lego. Nane oak wanigin legaro.

³⁶ Mondok-mondok logogin mene faget nane misigam igi yi re, neranen wene Daud yagasigin lek iluk, nonggwarek nenu horek mene a'nogo hombuk palogo igi o.

³⁷ Mo werek kwelek andoma aren tagomangge mene re inenupogot mondok logogun. Aren tagomangge mene ta'larik laga logolik, ap it mene mondok inenupogot aga logogun.

³⁸ Aren ferinarek logogin oba okerajaan andi re tugi lek agi'lek welagarek andi hangge it andi nen ferinarek mondok logogun, Nen at a'nogo were'ma eil kumuti logogin mene re anggulok oba andoma tiphogo hilingitu mene ekhe werego, iluk egen.

At raja omame lek agaikhesik le agaikhe wene

³⁹ A'nogo meneat he Haren yogondak at raja oba ha'mage fegen. ap Haren wenatigin mene a'nogo ebe herakfegendik, wulak fisegen.

⁴⁰ Haren he, yi'nogo hilinghabigin iluk, hamingmingengge wene waretigin mene a'nogo re, leget fisegen. at ebe enupogot logolik angge kware-kware puksek mene fesimo woukmirogo lakfisegen.

⁴¹ At awi kota leget pa'leget wurik mene a'nogo meisalogo lakfisegen. Kat oba leget uan wurik mene a'nogo meisa'lambukhogo lakfisegenat.

⁴² Afuni mondogat kwe laga logolik he at angge yi mene ti mene omanogo helili'lagwi. Afuni at inom horok horokwe werek mene omanogo nen inane asegen wokhili'lagwi.

⁴³ At aselei mene inomame a'luk, at mabenet fisoageluk homame wogisegen. At inom weim palek mene omanogo mondogat inendawimo inagayek asuageluk hilinginafen.

⁴⁴ At asikhe re weaget fisegendik, weim yafunem lebethegen lek.

⁴⁵ At enupogot were'ma fogeratarek mene a'nogo arat leget fisegen. At enupogot ebe hurek werek mene a'nogo re kweangma sunukhogo pelakfisegen.

⁴⁶ Haren he at ebe alage oan meneat he weak-weak yamanet fegendik, enggali warogo fegen.

Allah nen telinabuagaluk ayonggo fesukwa wene

⁴⁷ Neisena Tuhan, henggi miren oba hinago logombigen weinam asigin nogo? Hat ha'mage endu amulok lagaikherek hangge lagali'lago mene andi henggi miren hak logombigen lek asigin nogo? Neisena.

⁴⁸ An nebe horogat wa'lasuhak welagi andi noba ebesin o, Nit afuni ninebere, we, elama faget welagoresigen wa'lagorek mene elalninafigin andi.

⁴⁹ Nit afuni ninebe wa'lagi'lek ineluk mondok welagaikharek mene ekhe werek nogo? Afuni ninebe warek kweangma salinafi'lek welagaikharek mene ekhe werek nogo?

⁵⁰ Tuhan Allah neisena. Hat hobabut hendawitninafu welagen a'nogoba attagat hamingmingengge Daud ebe hendawi nen, Yi'nogo hilinghabigin, iluk hombuk palogo wene waretigin a'nogo inendawinggen wenggelasigin he, kiba nen nogo?

⁵¹ Tuhan neisena. An hamingmingengge yi, noba wiik weakhogo yaganeri'lagwi andi hendawimo ebesin o. Afuni inunggulenu lombogen inane weak noba fili'lagwi andi nen he nendawimo weak welagi o.

⁵² Tuhan neisena. Haselei mene nen ap raja Haren wenaten mene a'nogo inane asegen wokhili'lagwi o. Nen, at ebe yikwe tikwe lagunem he iren li'noratu mondok werego,” iluk Allah ayonggo fesikhe.

⁵³ ”Nineisena Tuhan fogeratu mondok logouwogo,” iluk u hak he, ”Amin,” igi andi, isikhe.