MAZMUR 88 - Allah Wene Fano Wene Hupla Inane

Lebetnabuageluk samban isikhe wene

¹ Wuni it inunggulenu Korah mene inawuni. It afuni wuni wulak fuluk ugunem yanggulinafu mene faget, wuni unggulenu: Mahalat Leanot awi Ezrahi mene andi nen yagaisikhi lagaikhe awuni.

² Tuhan Allah neisena, Hat he an nagap telogo nobagakhi lagen mene welagenma re, O linggene re an nen hat hoba nane kwetu logolik welagi o, Nen o hubanggo re Hat ninom ambi asuogeluk hoba waga lagi o.

³ An nen samban hoba ikhi lagi mene andi re Hat hoba andoma wagama logouwak. An nane kweti lagi mene andi hesanggo holnabin.

⁴ An noba re yi enggin ti enggin mondok elo'lek mene omanogo nek asi wagunem welagi, nen wa'lagaikharek mene a'nogo mondogat kweba asi wagunem welagi.

⁵ An nebe re afuni wa'lagunem salinafarek oba andoma pi lagain mene hangge welagi o, inomame lega'luk welagaikharek andi hangge hilingik welagi o.

⁶ Ap inebe pinggi inoatunem, warek fisugunem wengik welagaikharek hak welagi. Nen ap Haren inoba mondok honggot agu mene hakhogo an nebe afuni warek mene inanggele'ma omanogo obokhogo heraknobagegenma welagi.

⁷ An nebe Haren kiling ele mondok uan meneba pelak nobagegen, nen pogole mondok hikhaksek meneba ma'lima pelak nobagegen

⁸ Hat ha'mage a'nogo enggin nen he an sebet niugunem welagi, Hat anini nen he an a'nogo alperelogo nobagagunem welagi.

⁹ Haren he, an nori nagaila'lak ninom fano mene omanogo ninom eil uanet nobagegendik he, An noba it kwelagisaluk hebaknafe asuageluk hilingnobagegen. An nebe kwe sou yagarogo kwelaknobagegenma logolik he,

¹⁰ enggin-fenggin hugu mondok welagi mene andi faget wenggelhaluk le nek agu-agure neilenggen ou ari'lago. Tuhan neisena, an he hundik-hundik nenggi earogo liabek logolik he, Neisena Hat hoba samban igik, henu hombuk palhik, ikhi lagi o.

¹¹ Afuni warek mene inoba re Haren elalin mene ekhe hilingisu hak nogo? It ineluk a'luk Hat foget hafarek mene ekhe werek nogo?

¹² Haren hendawi hundik hilingninafi lagen mene faget o afuni salinafarek oba omanogo logolik elok yagaisa hak nogo a? Nen haberali agi'lek hilingiti lagen mene andi re ap inebe ineiloak legasi lagaikharek oba andoma sagarik lamo re higira?

¹³ Nen Haren elalin mene hilingiti lagen andoma o mum oba andoma nen inelu agaikha mene ekhe werek nogo a? Athe o afuni nen inonggora'luk lagaikharek oba omanogo Haren fano mene nek hilingfisikhi lagen mene andoma futfou hak nogo? Elo'lego.

¹⁴ Oba nen he neisena Tuhan, Haren lebetnabinogeluk kino yagaheti lagi, O hubet hundik-handik Haren lebetnabinogeluk samban oba hayonggo fugu welagi o.

¹⁵ Tuhan neisena, nenahalok Haren an oboget niikhi lagen nogo? Nenahalok an noba nen helokhe hinakfikhi lagen?

¹⁶ An he nebe yenggere'ma nenat enggin elo'lekhogo hugu werek kwelek oba nen, wa'lagaikharek mene a'nogo nen hundik-handik eilenggen penafu were'ma hikhi lagi o, Haren unggum an noba fegen mene andi re an nen wanu aplere mondok enggin nafunem he, elo'lek welagi o.

¹⁷ Hat hanini mondok weak mene andiba re an wolelenggenhogo nobagegen, nen Haren mondok fangesu elo'lek mene hilingnobagakhi lagen andiba re an nebe neiloak legetnobagakhi lagen.

¹⁸ Linggene inukhogo andoma Hat anini a'nogo re i fu wagarek hakhogo an haningisogo kwelaknobagaluk werek. Nelokhe kwe nen nambotkwe nen mondogat haningisogo kwelaknarek werek.

¹⁹ Nagaila'lak ninom horoksek mene omanogo re Haren an ninom eil uanet fegenma re, o mum mene a'nogo nek an ninom enggawerogo welagi o, iluk samban isikhe.