MAZMUR 86 - Allah Wene Fano Wene Hupla Inane

Lebetnabuageluk samban isikhe wene

¹ Tuhan neisena, an he nenggi lek logolik nomame legat welagimo re, samban ikhi lagi mene yi hesanggo holnabimbik, onggo yaganom o.

² Haren an noba hendawi hundik mondok welagenma re, an nebe halnafi logolik logoin o, an hamingmingengge nendawinggen Hat hoba tipsek logolik welagi mene yi nagap telnabin o.

³ Tuhan neisena, an neisena Allah re we Hat amu welagenma re, an nen lingge inukhogo samban Hat hoba ikhi lagi mene yi hendawit nabin o.

⁴ Tuhan, an nendawinggen Hat oba lakfei wagarik welagimo re, an hamingmingengge nendawimo nagaiyek mene hilingnobagain o.

⁵ Tuhan neisena, Hat he fano mene logolik afuni inaweak sebelogo leget fisageluk he hamolo welagen, It afuni Hat hoba samban ugu welagaikharek mene inoba re, Haren hendawi hundik mondok hokho meneba hilingninapluk he ekhe inom oba heilarogo hendawirinafu mondok welagen.

⁶ Tuhan neisena, an nen samban ikhi lagi mene yi fut nobagain o, lebetnabinogen iluk Henu hombuk palhi lagi mene yi hesanggo holin o.

⁷ Haren an onggo yaganeti lagen andiba re, an nebe mondok wiik-weakhogo logolik Hat hoba nek samban ugu lagi.

⁸ Tuhan neisena, allah Hat hemberek higit mene ekhe werek lek, nen Haren hilingiti lagen andoma hakhogo it amu mene nen a'nogo ekhe hilingisugun mene werek legat.

⁹ Tuhan neisena, afuni yi inunggulenu ti inunggulenu Haren walhogo fisegen mene omanogo, Hat handungdang welagen mene andi faget foget hobagagik, hapne wanhik, hilingiti logogun nen waga logogun.

¹⁰ We Hat hamu nek Allah welagen, nen Hat he Allah hebe Lego mene logolik he, Haren hilingisu elo'lek mene omanogo nek hilingiti lagen.

¹¹ Tuhan neisena, Hat hendawimo hagaiyek anggikhi lagen mene andoma an nen tiphogo hilingiti logogin nen he Haren yanggulnabin o, nen an nendawi abirengge nen Hat hawene melalek a'nogo futfuluk hilingiti logouwageluk hilingnobagakhi logoino o.

¹² Tuhan Allah neisena, an nendawinggen abirenggeba nenat Hat hai wathafu mondok logogin, nen Hat henu hokho welagen mene andi faget fogethafu mondok logogin.

¹³ Haren he hendawi hundik mondok hokho meneba hilingnafu welagenma a'luk he, an neluk a'nogo wa'lagu mene ambelema nen ogalnobagegen.

¹⁴ Neisena Allah, winik wonok agarek mene omanogo siakhogo wulibi we'luk, an noasugun mene nek hilingiri'lagwi, ap inobaharo werek inap inebe esa logalegengge ekhe nen he Hat a'nogo Hoba inendawinggen wenggel hiigi'legengge nen, an nebe pinggi noasuogeluk hilingiri'lagwi.

¹⁵ Oba nen he, neisena Tuhan Allah, Hat he hendawi hundik ninafik, hendawirogo welagik, hendawi hundik mondok welagik, tiphogo nek hilingninobagagik, hobabut sebelek oba hilingninobagagik, ikhi lagen.

¹⁶ An he nagaisa nen Hat hobaget enek hilingiti laga higithogo, an nen ogo Hat hobaget a'nogoat hilingiti lagimo re, an nebe futnobagaluk hendawi hundik hilingnabin o, nomamerogo hilingnobagaluk nagap telnabin.

¹⁷ It afuni an noba inabiret nobagali'lagwi mene andoma re, Haren lebetnafunem ineilenggen nealuk inenggali asuakhogo re, neisena Tuhan Haren enegengge ekhe wo'nomo, iluk samban isikhe.