MAZMUR 84 - Allah Wene Fano Wene Hupla Inane

”Allah awi wuri'mo mondok logoilo e,” iluk inendawinggen oba eberek mondok welagaikharek wene

¹ It ekhe nen wuni wulak fuluk inebe seberogo ugunem yanggulinafu mene faget, wuni unggulenu Gitit andi bene felalek mene. It inunggulenu Korah inap inawuni.

² Neisena Allah, Homame Mondok Hokho mene! Hat hebe welagen oba andoma re nendawinggen yamukhogo werek oba welagen o.

³ An nendawinggen oba nenat, Hat haiba andoma logoile e, iluk, nendawimo warugu welagi. An nebeba nen inom, nendawinggen oba nen inom, Allah heluk mondok welagen mene andi hobaget, nagaiyegetu logolik foget hafu welagi.

⁴ Neisena Tuhan, Homame Mondok Hokho mene, An neisena Raja re, Allah Hat hebeat welagen, Neisena sue ulue inom, helalimbo inom mene ogore, eak tagaisogo feigeluk he mezbah era'lu horokhogo andoma ineagwi tago fisouwogoluk inawi wurogo welagaikharego.

⁵ Nen it afuni Hat hawi wuri'mo logolik, hundik-handik wuniba fogethafik, hai wathafik, agarek mene andi re, ibi-eberogo nen he inendawimo inagaiyek hikhi logogun o.

⁶ It afuni ekhe Hat hinom hundik were'ma homame wogisunem logogun mene re, handom Sion oba louwogeluk inendawinggen lakfembik logoin mene re, inendawimo inagaiyek asugun o.

⁷ O Baka tonggwe iringik weakwe andoma laga logolik, iren i elesi wulifukwe yenggelhigik fouwogeluk hilingitunem, attak meiso oba heilarogo pelagisa wagunem inendawimo fanorinafi lagagin andi.

⁸ It inebe tom Sion Allah ebe welagarek oba, Ebe menlasi wagarek oba andoma laga logolik he, it a'nogo ekhe inom inomame agaikharek.

⁹ Neisena Tuhan, Allah Homame Hokho mene, Allah Yakub eisena a'nogo hayonggo fikhi lagi andi, an nane hesanggo holin o.

¹⁰ Hat neisena Allah nen he, nit ninoe raja enggiba welagorek mene, Haren wenatigin mene andi at ebe fanot fikhi logoino. Hawe a'ma fikhi logoino.

^11-12 Nineisena Tuhan Allah, hawe a'ma fetninarek welagendek mene, nit hagainafuri ninebe hendawi nen, fano mene wo'nisigik, agaugwet ninafik, hilingninafi lagen. It afuni weak hilingiti'lek tegelek logolik hoba we'luk, fano mene kino yagahetunem, ”Wokhisagain nabit,” ikhi lagen lek. O ekhe amumo yoma, ninenggi seribu oba logogun andi weak mene re, ninenggi misik oba Hat hawi wuri'mo andoma logogun andi nek he esin mondogo. It afuni weak hilingitarek mene, inaiba welagi'lek, neisena Allah hawi wuri'mo, kweba kagalek logogun andi mondok esin andi nen he, an nen wenakhigi andi o.

¹³ Neisena Tuhan, Homame Mondok Hokho mene, afuni inendawinggen Hat hoba himbirik welagaikharek mene re, inendawimo inagaiyek asugun o, iluk wuni watikhe.