MAZMUR 82 - Allah Wene Fano Wene Hupla Inane

At Allah andi re Raja andungdang werek agun iluk isikhe wene

¹ Asaf Awuni. At Allah nen pogoroba andoma wene it legoma werek mene inom kabogetasik he, Aren wene yi'nogo tekhogo menfikhe.

² ”Hiren wene aiyo wurinafi logolik henarogo weneba tegesu fugo, nen hiren he ap weak hilingitu mene inebikhit asu fugaro.

³ Yenggerugwi suarek mene inom afuni lebelek mene inom, inebikhit a'luk he inili woginafi logoino, it ap inenggi lek mene inom, elo'lekhogo werek mene inom inoba higithogo nek hilingfisikhi logoino.

⁴ It afuni inomame lek mene inom, inonggwaregen hilingisu elo'lek mene inom he, lologo wulak fisikhi logoino, it ariginik mene andi re ap inobabut weak mene inenggimo nen telogo wulak fisikhi logoino.

⁵ Hit he yi'nogo ti'nogo hilingisu mondok hinonggot logolik, inafe mondogat nonghongsek welagep, hiren hilingiti lagep oba re it afuni yi'nogo ti'nogo hilingiri'lagwi mene iluk wene melalek werek mene a'nogo hesangge-pesanggerogo mondok hilingik werek.

⁶ An nen hit hinoba ikhi lagolik he, ”Hit he mondok esin mene welagep andi nen yagahisikhi lagi o, nen hit he At Allah ebe Mondok Lego werek mene a'nogo againafuri welagep.

⁷ Oba nen he, afuni wa'lagaikharek hakhogo hirogo wa'lasugun aro, it ap kaindek-kaindek wa'larik lagaikharek higit, hirogo a'nogoat wa'larik logoin o,” iluk nane menfigi o, ikhe.

⁸ Nineisena Allah, afuni inunggulenu ekhe mene-ekhe mene andoma re Hat honggwarek mene nek hilingik welagenma re, Hat hebe we'luk o kweangma werek inap yoma inawene pilingisogo ayo wurogo hilinginabime o, neisena.