MAZMUR 81 - Allah Wene Fano Wene Hupla Inane

Linggene hokhoba meneba wuni watarek awuni

¹ Afuni nen wuni wulak fuluk inebe seberogo ugunem yanggulinafarek mene faget, wuni unggulenu: Gitit andi bene higithogo. Asaf Awuni.

² At Allah nit ninomame wo'nisikherek mene andi obaget awuni wa'ni, At Yakub eisena Allah andi faget hinagaiyegeti logolik fogera'ni.

³ Wuni wulak fuluk pinggong rebana abologet hikhi logolik he, pinggong gambus inom, kecapi ba inom ane ngalurogo kong e'ni.

⁴ Linggene hokho meneba kabogeti logolik inom, tugi ket mene fololhunem seni isati logolik inom, tugi funuba isati logolik inom, trompet futi logoni.

⁵ A'nogo hilingitarek mene andi re at Yakub eisena Allah a'nogo nen nit afuni Israel mene were'ma yoma hilingiti logouwageluk melalogo fesikhe.

⁶ Aren it afuni Mesir mene inom weim yabigiluk laga logolik he, it afuni Israel mene faget Aren wene melalek ekhe menfesikhe. An nen he inane ekhe an ogo endep ekhe nonggot mene nesanggo holhigi,

⁷ ”Hat horoa'ma enggin sagalirek mene a'nogo An nen hambokhogo wokhiigi o, nen hat homoloba sungge harogo welagagin mene a'nogo waganogo figi aro.

⁸ Hat hebe mondok wiik-weakhogo logolik hane kwetu were'ma re, An nenat hagap telogo hobagasigi. An nebe hinago welagirek oba nen he unggunggu subukhogo hane onggo yagahetigi aro, nen i Meriba elesimo aremnogo nen he An nenat hat hobabut palheasigi.

⁹ Hit Israel hinap yi, An nen yagahisikhi lagi mene yi hinesanggo holugun hinamolo halok he fanorogo holini o. Yago hit An nagainafuri mene re, An nen hinendawi wenggelogo iluk yagahisikhi lagi mene yi hinesanggo holini o!

¹⁰ Hit hinanggele'ma andoma nen allah higit hilingfuluk fogeratu mene ekhe logoinogo o, allah hiren ogo mondok hinonggot mene andomaba apne wanhi logogubo.

¹¹ Hit hinebe o Mesir were'ma nen wokhinarek wulibi wagagi mene, hineisena Tuhan Allah nebe re, An aro. Hit hinamburu nele were'ma re, An nenat nunggu mene wokhisikhi lagagi.

¹² Oba nen he, it An nagainafuri omanogo nen he An nane holhu aple inabit welagaukwa. It afuni Israel mene nen he An nane hologo hilingitu aple mondok inabit welagaukwa.

¹³ Andiba re, it inungguloak omame asuageluk An nen oboget isasigi. We irogo inendawimo anggili'lagwi mene andoma nek hilingiti logouwageluk herakfisasigi.

¹⁴ Nagaila'lak agwi, it nagainafuri nen An nane ugu mene holnobagakhi logoile'ma nen inom, iren An nane hologo hilingiti logoile'ma nen inom,

¹⁵ An nen weak-weakhogo it inaselei mene omanogo wolelenggenhogo fisigik, nen it inaweim mene omanogo mondogat inomame leget fisigik, hilinginabile o.

¹⁶ Afuni An inabit mene re An nen it sebelogo fisaluk, it inebe mondok-mondok andoma wene inoba fagain o.

¹⁷ Oba nen he it An nagainafuri mene nek he An nen gandum enggen mondok penek mene omanogo noageluk wogisigik, nen An nen kin amusu enggama meneba homotfisigik, igin o,” iluk isikhe.