MAZMUR 79 - Allah Wene Fano Wene Hupla Inane

It inunggulenu inap ekhe fikhalogo wulak fisoageluk samban isikhe wene

¹ Asaf Awuni. Nineisena Allah, it afuni inunggulenu inap Hat inonggot mene omanogo re kweang Hat honggwaregen mene a'nogoba sebeli kwi wagaikhasik, iren he Hat hawi wurik mene a'nogo emetfigik, o Yerusalem a'nogo meisak langgukhogo lakfigik, hilingiri'lagwi o.

² It afuni Hat hamingmingengge mene inebe warek omanogo re herakfisagama re, sue pogotkwe tarogo lagarek mene omanogo nen ninggerek mene hilinglagaikha o. It afuni Haren hendawi hundik hilinginafi lagen mene inebe warek omanogo re iren herakfisagama, maro aik anini mene nen nunggu mene hilinglagaikha.

³ O Yerusalem andoma bene mondogat he it inamep enek i hakhogo pikhi laga, nen inebe re aben ogo ekhe salinafa lek.

⁴ Nit he afuni inunggulenu fena nit horok horokwe werek mene oma nen li'not ninobagagu mene hilinglagosik welago, iren he nit endo ya'ninafik, inabit ninoba figik hilingninabi'lagwi.

⁵ Neisena Allah, Haren he mondok-mondok faget ha'mage ninoba fegen a, nen ninoba pou fegendik ha'mage lagali'lago mene andi re endu amulok lagaikherek hak lagagunem welagen andi a?

^6-7 Iren he Hat hagainafuri omanogo mondogat leget fisigik, it inebe werek oba mondok wolelenggenhogo figik aga andi nen he, Hat ha'mage re it afuni inunggulenu Hat inonggot mene andi inoba, kweisal isan o. It afuni o kerajaan oba andoma werek mene Hat hoba wene kabogetarek lek mene omanogo inoba kweisal isalan o.

⁸ It ninombawi nen weak hilingiti lagaukwa mene andiba nit wene ninoba fugun o. Nit he ninendawinggen mondogat nonghong ugunem welago hilingi'mo re, Haren weak-weak hendawit ninabin o.

⁹ Nineisena Allah, Hat he ninagap telogo ninobagagu mene welagenma re nit lebetninabin o, Hat honggwarek halong logolik lego welagen andi hak nit ninaweak honggoret fuluk nit ninebe fikhalogo ninobagain o.

¹⁰ It afuni inunggulenu amu mene nen nit faget ikhi logolik he, ”It ineisena Allah andi ebe koma werek?” iluk heinok wani nogo. At he nirogo it ap inunggulenu inap andoma nen Hat hamingmingengge inoata mene omanogo inunggulmo hilingfisugunem hogoin aro.

¹¹ It afuni hele warogo kwelaginafunem logolik heinet watarek mene andi inane hesanggo holin o, it afuni inebe wa'lasugun mene iluk enogo fakhaga mene andoma Hat homame a'nogoba ineluk telogo fisagain logouwak.

¹² Tuhan nineisena, it afuni inunggulenu amu mene andoma nen Hat mabenaphogo sebel hobagali'lagwi andba, Haren ogo onggo it inoba henggi sabiren enek he lek oba nen, we henggi teng kofokhogo wenasu mondok elo'lekhogo hilingfisano o.

¹³ Andiba re nit Hat againafuri hanggo domba Haren halninafi lagen mene nen he, ninenggi mondok-mondok andomaba Harenek hai wathafu welagik, nen mo lagagik pigik ugu kwelek andomaba Harenek fogethafu welagik, hilingitu logogun o.