MAZMUR 78 - Allah Wene Fano Wene Hupla Inane

Allah inom At againafuri inom faget isikhe wene

¹ Wuni ap Asaf en yanggulinafi lagaikhe awuni. Yago, afuni an nunggulenu mene yoma, an nen yanggulhinafi lagi mene yi hinesanggo fanorogo holfuluk, nane ikhi lagi mene andoma futfikhi logoni,

^2-3 An nen he henarogo wene inom, walhigik wene inom igik, nen suetninung o eroma andoma hilinglagaikhe mene it ninambu-ninombalagen ugunem, nit ninesanggo holfuluk wanhugu mene ebe yi'nogo iluk yagahisigik, igin o.

⁴ At Tuhan omame hokho a'nogoba hilingiti lagaikhe mene inom, Aren yi mene ti mene elalinhogo elalhikhe mene andoma inom, At obabut hilingisu elo'lek mene hilingiti lagaikhe mene inom andoma re, nit ninagainafuri inoba nen sebelogo fuluk hinagaisogo fisogo logogun lego. Athe niren he tindelogo yagaisugunem he iren hobuk inagainafuri taginabumo logogun mene inoba ogo fakhogo yagaisikhi logogun aro.

⁵ It inunggulenu Israel mene inoba re, Aren Awene melalek inelurogo logogun mene wogisasikhe, nen it Yakub ambisangma mene inoba re wene yi'nogo hilingiti logoino ti'nogo hilingiti logoino iluk awene melalek a'nogo wogisasikhe. Aren it inambu inombalak inoba yagaisikhi logolik he, hit hinagainafuri inoba yagaisikhi logoino aro, iluk yagaisasikhe.

⁶ A'nogo isikhe andi re, it hobuk ta'lasugun mene nen ogo At ebe inelu nek logolik, Iren inagainafuri taginabugun mene inoba yagaisilik laga logouwageluk, isikhe.

⁷ Andiba re, iren ogo At Allah oba inendawinggen tibetfuluk logogun, nen aren yi wene ti wene hilingitikhe mene andoma iren inonggot asugun lek, oba nen he, Aren yi'nogo hilingiti logoino iluk yagaisasikhe mene a'nogoba nek hologo hilingiti logogun.

⁸ Andi re it inambu-inombalagen Tuhan Awene melalek sagalogo fuluk inabiren hilingiti lagaukwa hakhogo hilingiti logoinogo. It andi re inebe inendawimo eberogo anggili'lagwi mene a'nogo omamerek legengge logolik leik-kweigengge hilingiti lagaukwa inap, iren Allah oba tiphogo hilingiti'legengge welagaukwa inap andi nen hilingiti lagaukwa hakhogo hilingiti logoinogo.

⁹ It inunggulenu Efraim mene inasikhe, inandok herap palogo fingfang welagaukwa inap a'nogo re, weim yafu sambul heise wulifukwa.

¹⁰ It he, At Allah inom it inom wene watukwa mene a'nogo taganhogo hilingitukwa, nen At Awene melalek werek mene a'nogoba hologo hilingitukwa lek.

¹¹ Iren he, At Allah nen yi wene ti wene hilingiti lagaikhe mene omanogo inom, nen Aren elalin mene hilingiti logolik it inoba weinamet fikhi lagaikhe mene omanogo inom iren inonggot agaukwa.

¹² It inombawi ineilhanem he o Mesir Zoan tonggoma andoma nen, Allah nen elalin mene hilingitikhe.

¹³ Aren he, i laut yenggelek a'nogo pelanghogo fena-fena maminget fesikhemo re, it omanogo selek wulifukwa. I a'nogo re helage palogo fugunem hakhogo fena-fena habunarogo menogo fesikhe.

¹⁴ Aren he, o linggene halok anggulok meneba woginarek waga lagaikhe, nen hubanggo re, endu ombak-bak oba woginarek waga lagaikhe.

¹⁵ O leimo nen Aren helep tom oba andoma nen kagalogo fesikhesik, it inagai noageluk sik-pikhogo wogisasikhe.

¹⁶ Helep unggul a'nogoba nen i wulibi wesuageluk mimingitikhemo re, i ebe hokho agai wuliferek hakhogo wulabi wagaikhe.

¹⁷ Oba nen he, hilingik kwelek iren hundik-handik Allah oba weak hilingisogo fikhi lagaukwa, o leimo andoma nen he iren At Mondok Lego mene a'nogo ane oak sagalhi lagaukwa.

¹⁸ Iren he ineranen Allah obabut palugun iluk he, nunggungge it inamolo mene omanogo kinoti lagaukwa.

¹⁹ At ane sagalogo hilingiti logoligenat he, iren ikhi logolik he, ”O leimo yoma nen At Allah nen nunggu mene higithogo wo'nisikhi logou hak nogo a?

²⁰ Aren helep unggul haro mene watfikhemo, i eil omamerogo houwalanghogo wulibi waga andi re eberogo aro. Oba nen he, nit againafuri ninobaget Aren roti inom, wam palek inom, foukhogo fuluk wo'nisamo re elo'lega?” iluk ikhi lagaukwa.

^21-22 A'nogo ugunem At Allah esanggo holhikhesik he, Aren a'mage inoba fesikhesik, it againafuri a'nogo endu inoba fesikhe. Iren At Allah ebeba inom, at omame telinaferek mene a'nogoba inom, inendawinggen tibet figi'legengge hilingiti lagaukwa andiba re, At a'mage inoba fikhi lagaikhe mene a'nogo re, sebel figi'lek hilingiti lagaikhe andi.

²³ A'nogo hilingiti logoligenat he, Aren o hena pogot kwe husuageluk mimingiti lagaikhe.

²⁴ Nen Arenat, no gandum pogoroba nen pelabi wagik, nen it inamburu nunggu mene faget he mana pogoroba nen pelagisa wagik, ikhi lagaikheat.

²⁵ Aren it nunggu mene faget mondok sik-pikhogo wogisikhi lagaikhe, nen roti re malaikat en nenggarek mene ninggi lagaukwa.

²⁶ Nen Aren ogore o sogoi mo ero fikhiren funhoageluk mimingitikheat, At Omameba re sogoi selatan fikhiren wasi wagaikheat.

²⁷ Aren it againafuri inobaget sue pelagisa wagalagaikhe mene andoma re, ebe wenasu mondok elo'lekhogo ial hilingik andoma hakhogo wogisikhi lagaikhe.

²⁸ Sue andoma re it inawi sabu sale'ma omanogo inom, it inebe welagaukwa kwe haningisogo omanogo inom, pelagisa waga lagaikhe.

²⁹ At Allah nen it inendawimo inamolo anggikhi lagaukwa mene omanogo higithogo wogisugunem he, iren omanogo helaluk nunggunem he, inalabut ningghogo inoba homot fisikhi lagaikhe.

³⁰ Oba nen he, it nunggu mene omanogo oan inambelema sagalhi logoligat he, ya higit werek iluk anggikhi lagaukwa le'ma re,

³¹ At Allah anini it inoba fesikhesik he, afuni Israel mene ap souge inomame mene mondok fano mene omanogo nek Aren mondogat inoatikhe.

³² A'nogo hilinginafi lagaikheba nen he, At againafuri omanogo nen weak mondok hilingiti lagaukwa, Aren elalin mene hilingiti lagaikheba nen he, iren inendawimo eberogo iluk anggikhi lagaukwa lek.

³³ Andiba re, At Allah nen it inebe ineluk werek mene a'nogo horoget fisasikhemo, tahun it welagaukwa mene aremnogoba re mondogat inailo mene youk kwelakfisasikhemo werek kwelek enek he it ineluk werek mene a'nogo arat kobogi lagaikhe.

³⁴ Hundik-handik inanggele'ma omanogo mene At Allah nen it fenakwe ekhe inoatunem he, it fenakwe omanogo inendawimo waraluk he At oba sugulogo waga lagaukwa.

³⁵ Iren he, At Allah andi re tom helep higit logolik awea'ma fetninarek werek, nen, At Mondok Lego mene andi nen telninabi'lago iluk wenggel hikhi lagaukwa.

³⁶ Oba nen he, iren At oba henarogo nek hilingitu logolik, it inane ugu mene ogore ineranhogo wene nek ikhi lagaukwa.

³⁷ Iren he At oba tiphogo hilingiti lagaukwa lek, nen At Awene melalek a'nogo inendawimo eberek logolik higithogo hilingiti lagaukwa legat.

³⁸ Oba nen he, At Allah nen, At againafuri endawi hundik hilinginafi logolik, it inaweak onggorabethogo fisasikhe, nen it inebe mondogat leget fisasikhe lek. At a'mage hobugalep lagagu kwelek oba nen he hambuget hikhi lagaikhe, At anini lagaikherek mene a'nogo it inoba fikhi lagaikhe legat.

³⁹ Aren wenggel hikhi logolik he, it andi re wa'lagu mene, o sogoi furogo lagu mene ambotkwe lagokhogo wagarek lek andi hak werek iluk wenggel hikhi lagaikhe.

⁴⁰ O leimo andoma nen he iren At endawimo ou pou aple nek hilingfigik, At ane oak sagalogo nek hilingitik, hilingiti lagaukwa.

⁴¹ Iren hobugalep Allah obabut palhi logolik hakhogo nek hilingiti lagaukwa, nen irenat Allah afuni Israel mene ineisena a'nogo endawimo heiselek aple nek hilingfikhi lagaukwa.

^42-43 O Mesir en Aren hilingiti lagaikhe mene inom, o Zoan leimo nen, hilingisu elo'lek mene hilingiti lagaikhe mene omanogo inom, At Omame Hokho meneba hilingiti lagaikhe mene faget inom, it inaselei mene inoba nen Aren fikhalogo wulaginabi wagaikhe sambul a'nogo faget inom, omanogo faget ebethikhi lagaukwa lek.

⁴⁴ It inagai lagu agai omanogo Aren elokhe munenogo mep mene hilingfugunem he, iren na re elo'lek aga lagaikhe.

⁴⁵ Aren he sobon mondok hokho pokhorogo it inoba fugunem enggin-fenggin hoageluk lakfesi wagik, nen it inanggweang yagaise nen weaget fouwageluk lakfei wagik, isikhe.

⁴⁶ It ineabumo enggen ugu palugun iluk hilingik mene inom, enggen palek mene inom, leget fouwageluk, Aren eluk-elugengge inom, pulue inom, lakfei wagaikhe.

⁴⁷ It inagayo anggur yago omanogo re, Aren meiso helebenggen meneba unggul watik, nen it inagayo ara yago omanogo meiso es meneba unggul watik isikhe.

⁴⁸ Iren inanggo takhikhi lagaukwa mene omanogo meiso es nen inoasuageluk hilingitik, nen takhugu mene omanogo eilabut kulunghogo wasi wagik ikhi lagaikhe.

⁴⁹ At a'mage mondok hokhorogo lagakhi lagaikhe mene a'nogo it inendawimo mondogat weak asuageluk, malaikat ap inoatarek mene esa misik lakfisa wagaikhe.

⁵⁰ Aren he, it inebe endawirinafi'lek, nen At a'mage a'nogo sebelhi'lek, ou inoumo it inoba nen waganogo la mondok elo'lek meneba inoatikhe.

⁵¹ Aren he it afuni Mesir mene ineisok erokwe lombok, inamlogomi manggusa tago omanogo inoatikhe.

⁵² A'nogo hilingfisaluk he, Aren it againafuri a'nogo domba esa uluk-pambialhogo hilingik welagarek hakhogo o leikwe omanogo nen woginarek lagaikhe.

⁵³ Nen it inaselei mene omanogore i laut en sebelinafu kwelek, Aren halinabik lagunem he it inebe inailo legengge selekhogo wilifukwa.

⁵⁴ A'nogo woginapluk lagaikhesik he, At amlogomi a'nogo At anggweang mondok fano horek oba o tom-tom helang a'makwe andoma At onggwaregen telasikheba omanogo woginarek lagaikhe.

⁵⁵ At amlogomi omanogo inelokhoma nen he it afuni o andoma welagaukwa mene omanogo mugusogo wulaginafi logolik he, At againafuri afuni inunggulenu Israel mene a'nogo mondogat inoba Aren kweang a'nogo mondogat sumburisilik lagaikhemo re, it a'nogo inaselei mene nen inaiba sabu salogo welagaukwa kwe omanogo kwilik lagaukwa.

⁵⁶ Oba nen he, iren Allah ba inobaharo fikhi logolik he At Mondok Lego welagarek mene a'nogo obabut palugun mene nek hilingiti lagaukwa. At Awene melalek yi'nogo hilingiti logoino, ti'nogo hilingiti logoino iluk yagaisasikhe mene omanogo iren furogo holhi'lek hilingiti lagaukwa.

⁵⁷ Athe it inombawi nen Allah inonggoret fuluk hilingiti lagaukwa hakhogo nek hilingiti logolik he, inobabut sikhe ebe kwanirek mene hakhogo logolik, iren hilingitu aple andoma ebe mene ekhe hilingiri lagwi iluk angga fuk mene omanogo nek hilingirik laga lagaukwa.

⁵⁸ Iren he kembu apne wanhukwe obalik wuti logolik he Allah ane oak sagalogo fikhi lagaukwa, nen iren e mene hesesengge waganogo tugwi kembu wutunem he, andiba At Allah a'mage kwelafi lagaukwa.

⁵⁹ Iren a'nogo hilingitunem he At Allah nen eilenggen isaluk, At a'mage lagaikheresik he, it inebe endawirinafi'lek ferekhogoat pugulogo wulak fisikhi lagaikhe.

⁶⁰ Aren he Awi Sabu o Silo wurik mene a'nogo herakfisasikhe, nen it afuni inanggele'ma At ebe welagarek mene a'nogo inomat herakfisasikhe.

⁶¹ Aren he Peti Wene Warek kwalabek mene a'nogo aben waluk loageluk herak fesikheat. At ebe ombak-bak werek mene faget alik waganogo welagaikhe mene a'nogo it aselei mene nen helaluk loageluk herakfisasikhe.

⁶² Aren he it againafuri At onggwarek againafuri mene inoba a'mage fesikhesik he, it inebe karogen inoasuageluk obok isasikhe.

⁶³ It inamlogomi ap souge omanogo re endu nen inoatikhe, nen it ina'logomi silerik he aben iluk ekhe woginafukha mondok lek.

⁶⁴ It inogogwi imam omanogo re karok oba mondogat inoatukwama re, it mene inagawi sogwe omanogo nen it inobaget le asu re, elo'lek hilingik welagaikhe.

⁶⁵ Andiba re At Tuhan ebe afuni nogokhi la'luk feisakhogo menlagaikharek a'nogo higit menlagaikhe, nen ap i anggur agai hinago naluk inomame agunem hilingitarek higit hilingitikhe.

⁶⁶ Aren he it aselei mene omanogo warogo lak fisigik, nen inenggi mondok-mondok faget it mondogat inomame leget fisigik, isikhe.

⁶⁷ Oba nen he it at Yusuf en tagomangge mene re abiren oboget isasikhe, nen it inunggulenu Efraim mene ekhe wenagaisogo fisasikhe legat.

⁶⁸ We Aren he it afuni inunggulenu Yehuda mene inom, nen Punu Sion At endawi hundik mene a'nogo inom enek wenakhasikhe.

⁶⁹ Aren he awi ebe werek oba pogoroba omanogo hakhogo wurasikhe, nen kweang mondok wurik meneba hakho mondok-mondok logogin mene wurasikhe.

⁷⁰ Aren he amingmingengge Daud a'nogo wenatikhesik he, at ebe anggo halhu welagaikharek mene omanogo inanggele'ma nen wanhikhe,

⁷¹ At Tuhan againafuri Israel mene omanogo halinafi logouwageluk at ebe wam domba isa omanogo halhunemen wanhikhe.

⁷² At Daud en he endawimo mondok fano logolik melalinafi lagaikhe, nen obabut hibilik-hebelekhogo nek halinafi lagaikhe.