MAZMUR 77 - Allah Wene Fano Wene Hupla Inane

Wiik-weakhogo were'ma inagaiyeget fisikherek wene

¹ Afuni nen wuni wulak fuluk inebe seberogo ugunem yanggulinafu mene faget. Yedutun awuni bene. Asaf Awuni.

² Allah ba nane omamerogo kweti lagi, nane omamerogoat kwe tunem he Aren an nane esanggo holherek.

³ An noba nonghonghogo logolik At Allah ba samban ikhi lagi, nenggi senap higi'lek At oba liabek mondok welagi, oba nen he nendawimo kon nobagali'lago lek.

⁴ An nen At Allah ebe faget nendawimo wenggel haluk he, nebe neneigeti lagi, an nen menenei uanhogo wenggelik lagu-lagu re nebeba mondogat liongorogo taik ikhi lagi.

⁵ At Tuhan nen an nebe hup nogo inogoluk hilingnobagagunem he, nendawimo mondok fenggek-fenggek enek ugunem he, nane u ogo elo'lek nabi'lago.

⁶ An nen he, nenggi attak welagagi mene omanogo wenggel hikhi logolik he, tahun attak hilinglaga lagaikhe mene omanogo faget ebetik, menenei wenggelhik, hilingitu mondok welagi o.

⁷ O hubanggore nendawimo wenggelhugu logolik he, nonggwarek nendawimo heinok wanhu welagi.

⁸ ”At Tuhan nen he enggi mondok-mondok faget an nebe obokhogo laknobagaikhesik, endawit nabi'lago lek hea?

⁹ Aren nit faget endawi hundik hilingninaferek mene a'nogo tibet figi'lek palfeigiluk hilingiri'lago hea?

¹⁰ At Allah nen endawi hundik hilingninaferek mene a'nogo re onggot agama hea? Athe a'mage lagaikhesik nit ninoba endawit ninaferek mene a'nogo herak ninobagaikhe hea?” iluk ebetu welagi o.

¹¹ A'nogo ebetu logolik he, ”An nendawi warikhi lagi a'nogo re, At Lego Mondok werek mene a'nogo omame lek kwelegat hilingiti lagi higi,” iluk anggikhi logolik ikhi lagi.

¹² Tuhan neisena, an he Haren elalin hilingitigin mene omanogo ebethikhi lagi, Haren o eroma andoma hokho-pokhorogo hilingitigin mene omanogo ebethikhi logolik he,

¹³ An nen he Haren ekhe mene ekhe mene hilingitigin mene inom, nen Haren mondok elalinhogo elalhigik fesigin mene omanogo faget inom, ebethikhi logogin.

¹⁴ Neisena Allah, Haren hilingiti lagen mene andoma re mondok fano horek mene nek hilingiti lagen, nit nineisena Allah hokho hagun andi hak he ap sa hak ekhe werek nogo?

¹⁵ Hat Allah re mondok elalinhogo hilingiti lagen hagun welagen, Hat homame re yi afuni ti afuni inunggulenu lombok werekwe andoma weinamet fikhi lagen.

¹⁶ Hat homameba re, it Hagainafuri at Yakub ambisangmangge mene inom Yusuf ambisangmangge mene inom, omanogo fikhalogo wulakfisa wagagin.

¹⁷ Nineisena Allah, Hat hebe ineilenggen healuk he i re leigetik, i laut a'ma ma'lima inom mondogat leik waririm etik, ikhi lagaikhe.

¹⁸ Unggunggu supuk erik lagunem he, eilabut yegelogo meiso pelabi wagarek, eilabut kulunghogo o unggut-unggut mondogat kwelambakhogo hugesi lagarek.

¹⁹ Unggunggu ane supuk etunem he, eilabut yegelogo kweang abolok ikhi logolik he leigeterek.

²⁰ Hat hebere i laut agum founalhukwe ambolebene andoma lagendek, oba nen Heisok sebelhukwe re obalik werek lek.

²¹ Ap gembala nen inanggo domba halinafi logolik hilingitarek hakhogo Haren it Musa inom Harun inom inebene nen Hagainafuri woginarek wulibi wagagin.