MAZMUR 76 - Allah Wene Fano Wene Hupla Inane

At Allah re omame nek agarek iluk isikhe wene

¹ Afuni nen wuni wulak fuluk pinggong kecapi kongetu kwelek inebe seberogo ugunem yanggulinafu mene faget, Asaf Awuni.

² At Allah re it afuni Yehuda mene were'ma andoma mondogaren he inelu nek, nen it afuni Israel mene were'ma andoma re At enu nek sagarek werek.

³ O Yerusalem he At onggwarek Awi ebe werek oba, nen Tom Sion he At ebe were'ma.

⁴ Andoma nen he afuni nen weim yafarek mene omanogo lilibuk-lalabakhogo pot fisikherek. Togengge inom tok peiyengge inom, karok inom, mondogat he wolelenggenhogo fikherek.

⁵ Hat he ibi-eberogo nen hanggiluk werek hagun logolik, hombak-bak mondok yabelanget hugunem he, o tom attak welagaikhe mene andoma re we sebelek hak werek kwelek Harenek he mondok halong hagun welagen.

⁶ Afuni inailo mondok lek mene omanogo, mondogat telagama re it inebe arat nogo aga andi nen he hobuk ineluk asugun lego. It ap sikhe inenggi puk inap omanogo re inomame mondogat lek agaikha.

⁷ At Yakub eisena Allah nineisena, it ap wam kuda ba lagaluk weim yabi lagaikharek mene inom, kuda ebe inom ogore, Hat hane pararagen he it inebe mondogat wa'lagaikha.

⁸ Hat he mondok elalin agun welagen! Haren wenagisugunem he ap sa hagen hambuk haluk logou hak nogo?

⁹ Hat hebe pogoroba nen wene tekhogo ikhi lagen mene weinam agunem holhaluk he, kweang mondogat he ailo a'luk ane legengge werek sambul he,

¹⁰ afuni o kweangma yoma sebelogo fisugunem werek mene omanogo, Haren inagap telinabigiluk, Hebe feisakhogo menla'luk wene katokhogo palhi lagen.

¹¹ Afuni ina'mage mondok hokho mene ogore Hat fogethafi logogun, nen it ina'mage lagaluk logogun mene ogore fong warogo iluk pelagi su ikfuluk logogunat.

¹² Hiren hineisena Tuhan Allah ba hinawene waretigip mene a'nogo tibet feni. It afuni inunggulenu ekhe horok-horokwe werek mene omanogo nen yi mene ti mene Allah afuni nen inailori'lagwi mene a'nogo obaget fugu mene omanogo waluk wogosi we'ni.

¹³ It ap inalong logolik melalinafarek mene omanogo re Aren enek inomame leget fuluk sebelogo fisikherek. It ap raja o kweangma yoma melalinafarek meneba nen ogore At faget inoak leik uageluk hilingfisikherek.