MAZMUR 74 - Allah Wene Fano Wene Hupla Inane

Afuni inunggulenu mondogat faget fikhalogo ninobagauwageluk samban isikhe wene

¹ At Asaf en yanggulinafi lagaikhe awuni. Neisena Allah, Haren he mondok mondogat oboget nisegen a? Nenahalok Hat honggwarek hagainafuri mene inoba ha'mage fugu mondok logogin nogo?

² Hat hagainafuri o attagat wenagaisogo fakhasigin mene a'nogo ebethan o, it inunggulenu yi mene Hat honggwarek hagainafuri mene asuageluk Harenat fikhalogo wilakfisa wagagin. Hat hebe werek oba faget Handom Sion hilingisogo fegen a'nogo ebethan o.

³ It selei mene omanogo nen Hat Hawi wurik a'nogo wolelenggenhogo faga andi nen he, obalik meisak langgukhogo hilingfagakwe andoma heisok pelak filik lano.

⁴ It haselei mene omanogo nen nit ninomame agosik iluk he, poksu liagaisogo Hat Hawi wuri'mo omanogo nen a'mit supsap liabi'lagwi andi.

⁵ It inebe re enggama laluk e murik laga logolik he, posie legeisogo eba fagarek andi hak hilingiri'lagwi.

⁶ Iren he, o bene hesesengge waganek mene omanogo, yagaba inom, louk oba inom wolelenggenhogo fili'lagwi.

⁷ Iren he, Hat fogethafarek oba omanogo emetfuluk he, o Hat hebe welagen oba a'nogo wolelenggenhogo endu fari'lagwi.

⁸ Iren he, nit mondogat sebelogo ninobagaluk he, o kweang yomaba o Allah fogerasuogeluk kabogetu kwe omanogo mondogat endu noluogeluk hilingiri'lagwi o.

⁹ Nabi inom, elalin hilingiri'lago mene omanogo inom he elokhe endephogo ekhe weinam ari'lago lek, nen o yoma andem huli a'nogo nek logogin iluk he ap misigen ogo ekhe elu werek lek.

¹⁰ Neisena Allah, it Hat haselei mene nen ki huli li'not hafu logogun nogo? Hat henu weagerogo fugu mondok werek andi re, a'nogo nek hilingitu logogun nogo a?

¹¹ Nenahalok Haren nit lebetninafu mene a'nogo lebetnisikhi lagen lek? Nen nenahalok henggi fetninarek welagen mene a'nogo herakninobagegendik welagen nogo?

¹² Neisena Allah, o attagen engge an neisena raja re Hat hebeat welagen, we Harenat nit ninagap telogo ninobagasigin.

¹³ Hat homame mondok wesa polan mene andiba i laut a'nogo tulem heirogo minggilfigik, nen kisu menawe hak mene omanogo inungguloak sagalogo fisilik lagagin.

¹⁴ Haren he, no Lewiatan omanogo inungguloak sagalogo fesiginmo re, o leikwe ineluk welagaikharek mene omanogo nen ninggi logouwageluk hilingisogo fesigin.

¹⁵ Haren he i elesi wulakfigik, i lagu agai anggwe halogo latik, nen i lagu agai andi ebe hokho agai oba nen he Harenat firitoget figik egendek.

¹⁶ Harenat o linggene inom hubanggo inom walhogo fesigindik he, mo inom tugi inom inobalik logogun oba halogo fesigin.

¹⁷ Harenat o kweang yiba huli-huli wathigik fesigin, o hibi inom salim inom walhogo fesiginat.

¹⁸ Tuhan neisena, it haselei mene nen Hat henu sebelogo fili'lagwi mene andi wenggelhan o, it afuni inunggulenu inap Hat inonggot mene nen Henu weagerogo fili'lagwi andi.

¹⁹ It hagainafuri inamu nen hilingisu elo'lek mene andoma re it inaselei inobabut mondok weak mene andoma inenggiba fisa fugo, it hagainafuri inebe mondogat nonghong agaikhasik werek mene andi inebe asugun aple faget mondok-mondok honggorasu fugo.

²⁰ O yoma obalik mondok mum were'ma wesa werekwe omanogo re afuni nen inaniniba nek weak mondok hilingitu nen he, Haren nit ninoba wene watnisasigin mene a'nogo hendawimo ebesin o.

²¹ It afuni it ekhe nen sebelinarek werek mene andoma inenggali asuageluk herak fisa fuk, It afuni enggin-fenggin hugu werek mene inom, inelagaik mene inom andoma nen he, Harenek fogethafi logouwak.

²² It afuni Hat hoba inendawinggen tibet fili'lagwi lek mene andi nen Hat henu weak weakhogo nek fugu werek andi nen he, Neisena Allah, Hebe siakhogo menla'luk he, Hat hawene andi faget ili helan o!

²³ It haselei mene nen ngai wai liabi'lagwi mene andoma re honggorasu fuk, it Hat haselei mene inane sagal-pagal hili'lagwi mene andoma re ekhe inom anggiluk kwelabi'lagwi andi!