MAZMUR 73 - Allah Wene Fano Wene Hupla Inane

BUKU HENAGANEK MENE: MAZMUR 73–89 Allah nen katokhgo nek hilingiterek wene

¹ Ibi eberogo nen he, At Allah re againafuri At oba inendawinggen tibetfuluk welagaikharek mene re fanorogo nek hilingfisikherek.

^2-3 Oba nen he, it weak hilingiri'lagwi mene omanogo hobuk fano mene inenggi werekhogo nek hilinglagik, nen wonoget fakhagarek mene omanogore fanorogo nek welagik, ugunem neilenggen isaluk he, an nendawimo mondogat weak a'luk, nendawinggen At oba tibetfuluk welagirek mene a'nogo longgo u hak hilingnabi'logo.

⁴ A'nogo andi re, it inebeba ou iluk ogo higi'lek welagik, nen it inebe ogo fanorogo logolik inomamerogo nek werek.

⁵ It inoba enggin-fenggin andoma re hagarek lek. It ekhe nen inelagaik a'luk welagaikharek andoma hakhogo hili'lagwi legat.

⁶ A'nogo hilingitarek andi nen he, inalilingge wanharek hak he fogerakhagarek andi o. Su labetarek andi hak he, ninghogo weagerinafarek andi.

⁷ It inendawimo yi weak ti weak peterogo logolik, weagerinafu mondok welagaikharek. Weak hilingisugun mene faget enek, ebetu mondok welagaikharek.

⁸ Inane asegen waganogo weagerinabugun mene nek hilingitarek, Inonggwarek fogerakhikhi logolik, enggin mene inoba fogoin iluk inailo asu hak mene nek yagaisagarek.

⁹ Iren he Allah pogoroba mene a'nogo enu weaget figik, afuni kweangma mene lalinafik, agarek.

¹⁰ A'nogo hilingitunem he, Allah againafuri mene ogore, it inane holfuluk inambotkwe it inombo'ne lagaikharek.

¹¹ Iren ikhi logolik he, At Allah re onggoro, Lego Mondok welagarek mene andi re futfili'lago lek, iluk it ekhe yagaisagarek.

¹² Afuni inobabut weak mondok hilingitarek mene andi re inangge ekhe inom oba heilarogo hilinglagunem, inafe morogo logolik he, a'nogo hilingitarek andi.

¹³ An nendawimo fano horek logogin iluk tegelikhi lagi andi re we tulemat hilingiti lagi o, weak meneba nen agaiserati lagi andi re we elalinat hilingiti lagi o.

¹⁴ A'nogo tegelhirek meneat he, hundik-handik omanogo re weak mene nek noba asi wagunem, ekhe sambul ekhe sambul hubet-habet andoma re enggin-fenggin hugu mondok welagirek.

¹⁵ An nen naneba a'nogo ikhi logoilema nen he, hat hagainafuri mene a'nogo inenu weaget fisikhi logoile.

¹⁶ Oba nen he, an nen fanorogo wenggel hagain iluk hilingitunemen he wene andi mene re an nen higithogo hilingisu lek hak hilingnabi'lago.

¹⁷ Andiba nen, ambisangma ninggi'nogo hilinglasigin iluk an nebe o Allah hawi wuri'mo andoma kwigirik neil wanhunemen he, it ap weak mondok hilingitarek mene omanogo it hobuk inoba asugun mene faget nelu agunem futfikhi lagi o.

¹⁸ Haren he, it inebe kwe mondok elabin se'ma andoma fisikhi lagen, pule kobokhogo helapuluk wa'lakhoageluk obogerisikhi lagen.

¹⁹ Ineilenggen humun la'luk fenggen lagaikharek hak koma lagaikha heat, lek agaikharek. It inebe lek agaikharek sambul andi re mondok hunikhogo hiling lagarek.

²⁰ Inabi hagarek mene ineluk aga logolik inonggot agarek andi hak, neisena Tuhan hebe menlagu sambul he, it inebe mondogat weagerinafunem lek agaikharek.

²¹ An attak nendawimo mondok weak agagisik, nendawinggen warikhi lagagi andi re,

²² an nebe mondok kembu nen o, Hat helokhoma wam higit logolik, hilingiti lagagi.

²³ Meneat he, an he Hat hera'lu horokhogo were'ma, Haren an nenggi ebekwe fetnarek welagen.

²⁴ An neluk fanorogo logogin mene faget Haren komotnafi lagen, Nen Harenat hobuk an nebe agaukhogo wo'nabiginat.

²⁵ O pogoroba an lebetneogoin mene ekhe werek nogo? We Hat hami hamuat welagen anggigi. An nendawinggen hundik mene o kweangma mene ekhe werek lek, we Hat hami hamu nek welagen o.

²⁶ An nebe inom, nendawinggen inom maben agirek meneat he, an nomame kwela'nafu mene re neisena Allah hebeat welagen o. Yi mene ti mene eise logou hak he, hat hebeat eise mondok-mondok asimbik logogin.

²⁷ Afuni Hat herakhobagaluk, wulifarek mene andi re, inebe alomat lakhogoin. It afuni andi inobabut he, Hat hoba lombokhogo logou inabit welagaikharek andi nen he, Haren inebe leget fisagain.

²⁸ A'nogo meneat he, an enek he nebe Allah hera'lu horokhogo werek aple andi re mondok fano hilingi'mo hikhi lagi, Neisena Tuhan Allah nen fetnarek logoinogoluk, hawe a'ma andoma kuluk logolik he, Hat hilingiti lagen mene mondogat yagaisilik laga logogin o, iluk wuni watikhe.