MAZMUR 72 - Allah Wene Fano Wene Hupla Inane

Raja obaget samban agarek wene

¹ ”Allah neisena, Hat hawene melalek andi at raja ba yagati logoin o, Haren wene katokhogo hilingiti lagen mene andi at raja amlogo andiba wogoti logoin o.

² Aren it afuni Hat hagainafuri mene andoma inawene ayo wurogo pilingiti logolik he, wene melalek werek higithogo hilingiti logogin, nen it ekhe yi enggin ti enggin hilinginafunem weak hili'lagwi mene andoma ogore inawene higithogo nek pilingisikhi logogin aro.

³ Nit ninaiba ninanggweang oba yoma yi mene ti mene sik-pikhogo were'ma fano liokhogo nek logogun logouwago, nen yi afuni ti afuni ninunggulenu lombok werekwe andoma ogore wene higithogo hilingitarek mene nek sagarek logouwak.

⁴ At raja nen he afuni inenggi lek mene inangge faget ili wanhi logouwak, nen aren it afuni inelagaik mene inom athe afuni sebelogo fisagarek mene omanogo mondogat leget fisigik, ikhi logouwak.

⁵ An nebe neluk logolik, afuni fano ferinarek logogin andi hagat, mo inom, tugi inom, lek agi'lek werek kwelek, nagainafuri nen tagomangge mene nombalak inebe ta'larik laga logolik, a'nogoat fano ferinarek mondok logouwak.

⁶ At andi ebe re, meiso o leimo enggaba pi wagik, athe meiso hokho mene yabu waganekwe lupugeratik ikherek hak hilingik logouwak.

⁷ At ebe mendek were'ma andem he katokhogo hilingitarek mene andi nek saga ilik laga logouwak, nen tugi yatu werek kwelek andem he, yi mene ti mene sik-pikhogo nek hilinglaguba logouwak.

⁸ Nen o kerajaan at ebe logolik a'ma ferinarek logogin kwe re i laut ekheba nen laut ekheba andoma hilingik logouwak, nen, o mo wulibi wagarek fikhiren he mo ubuk ikherek huli andomaba wialarik laga logouwak, neisena.

⁹ It afuni o leikwe welagaikharek mene andoma re at a'ma nek sebe ikhi logogun, nen it at inom weim palek mene omanogo re at eiso'ma ineindep awi yagaisogo fogerasi waga logogun.

¹⁰ It ap raja-raja o Darsis oba werek mene nen inom, nen it i alonggen kwe werek mene nen inom at obaget yi mene ti mene wogosuogeluk waluk waga logogun. Nen raja o Arab mene inom Etiopia mene inomen ogore at obaget waluk we'luk fei waga logogunat.

¹¹ A'nogo were'ma it raja-raja hokhorogo nen he at a'ma sebe iluk fogerati logogun, nen yi afuni ti afuni mondogat he at amimingengge asugun.

¹² Andi re aren afuni nen yi enggin ti enggin inoba fugunem inamu nen hilingisu elo'lek mene omanogo fikhalogo fisigik, afuni inenggi lek logolik at oba yagatarek mene omanogo fikhalogo fisigik, ikhi logogin.

¹³ Aren he afuni inenggi lek mene inom inelagaik mene inom endawi hundik hilinginafik, afuni ineilmo lek mene inom inagap telinafik, ikhi logogin.

¹⁴ It inebe faget aren he mondok esin iluk anggikherek andi nen he, afuni nen enggin-fenggin inoba figik, ina'mageba weaget fisigik, agarek mene andomaba nen fikhalogo fisagain.

¹⁵ Hat raja re, Heluk mondok logoino o, iluk yagati logouwak. Ma re, at were'ma re emas o Arab mene andoma fisaluk wogosi waga logouwak. At obaget he linggene hundik-handik samban iginafu mondok welagik, fanoabet fisikho welagik, ikhi logouwak.

¹⁶ Aren ferinarek werekwe o ekhema-ekhema mondogat andoma gandum mondok sik-pikhogo saga ilik laga logouwak, nen o tomkwe mondogat he, yi mene ti mene yago mene enggen mondok hokhorogo iti logouwagat, Kweang he, o Libanon kweang muli fano andem higit enek hilingik logouwak, afuni o kota andoma welagaikharek menere engga o leikwe welagarek andi hangge sik-pikhogo hilinglarik logouwagat.

¹⁷ At raja enu andi re afuni nen he hundik-handik andoma ebethugu mondok logouwak, nen mo yatu werek kwelek andem he at enu re ekhe inom legeisogo fikhi logouwak, nen it afuni inunggulenu lombok omanogo nen ogore, at hakhogo fanot fisikhi logouwageluk kinoti logogun, it afuni mondogaren at faget he agaiyek hikhi logouwak, ikhi logogun.

¹⁸ Tuhan it afuni Israel mene ineisena Allah andi nek fogeratu mondok logouwok. We At ami amu nenat yi wene ti wene elalin mene nek hilingiterek.

¹⁹ At enu esin mondok welagarek andi nen he, fogeratu mondok logouwok. Nen o yi awi ti awi mondogat he At ombakbagen enek sagorek logouwak. Eberogo nen a'nogoat aga logouwak Amin, iluk igi andi.

²⁰ At Isai amlogo Daud en samban oba Allah ayonggo fikhi lagaikhe menere huli yiba.