MAZMUR 71 - Allah Wene Fano Wene Hupla Inane

Afuni inebe yaman a'luk samban agarek wene

¹ Tuhan neisena, an he Hat hoba lombokhogo welagimo re, an nenggali asuageluk oboget nea fugo.

² Hat he katokhogo nek hilingiti lagenma re an fikhalogo nobagain o, an nane hesanggo holfuluk nagap telnabin o.

³ Nen an nebe werek oba re, Hat hebe tom eil silipnorek mene hak hilingik welagen o, an nebe telnabigiluk kagalnarek welagen menere Hat hebeat welagen o. Hat hebe andi re, tom helep mene andi higit ha'ma sebelogo fetnarek logolik kagalnarek welagen mene o.

⁴ Neisena Allah, it afuni inanini weak mene inenggimo nen inom, afuni inendawirinafi'lek weagerinafarek mene inoba nen inom, it afuni ina'mage weak mene inoba nen inom, ogalnobagakhi logoino o.

⁵ Tuhan neisena, Hat he an nendawinggen hoba eberek mene welagenma re, an nebe sougeba nen engge Tuhan hoba nendawinggen tibet fesigisik welagirego.

⁶ An nebe ta'lagagi huli nen engge re Hat henggi agut obaat fetnarek welagen o, an nebe neluk logolik oba re nendawinggen Hat hoba himbirik logolik he, Hat enek hundik-handik fogethafu welagirego.

⁷ An kagalnarek werek mene re Hat homame a'ma fetnarek welagenma re, an neluk logolik it afuni hokhorogo nen an nobabut walhigik hilingisuageluk welagi.

⁸ An nen he hundik-handik Harenek fogethafu welagi o, nen lingge inukhogo re Hat hebe hanggiluk welagen mene a'nogo fogethafi lagi o.

^9-10 It naselei mene nen nabok palhu welagik, nen an nebe noasuogeluk inane seberogo mati logolik werek enggere, An nebe yaman agi halok he, neisena Haren hu'nea fugo, nen nomame mondogat legagi halok he an nebe oboget nea fugaro.

¹¹ Iren ikhi logolik,” At ebe Allah nen oboget hikhemo werek hilingi'mo re, ap amu mene nen ekhe at agap telugun lek enggere, niren murok lambik senfei louwogen we'ni o,” iluk ili'lagwi andi.

¹² Neisena Allah, Hat hebere an welagiba nen yatma lagun o, Allah Haren weak-weak telnabime o.

¹³ It ap an noasuogeluk hilingisi weri'lagwi mene andoma re, inenggali watfisaluk inebe legetfisano o. It afuni an nebe alomat nobagauwogeluk hilingisi weri'lagwi mene andoma re, inendawinggen nonghonget fisamo inenggali asuago.

¹⁴ Oba nen he, an enek he Hat hoba nendawinggen eberek mondok logolik, Hat hobaget ekhe inom hokho pokhorogo fogethafu welagirego.

¹⁵ Haren katokhogo nek hilingiti lagen mene faget inom, inenggi wenasu elo'lekhogo telninafi lagen mene faget inom, an nen linggene inukhogo tindelhu mondok welagirego.

¹⁶ Tuhan Allah neisena, Haren hilingiti lagen mene andoma re mondok elalin mene hilingiti lagenma re, Harenek fogethafi lagi o, nen Haren katokhogo hilingiti lagen mene andoma nek legeisogo fikhi lagi o.

¹⁷ Neisena Allah, an nebe sougeba nen engge Harenat yanggulnafi lagen, yogondak huli nen enggere Haren yi mene ti mene hokhorogo walhogo fesiginmo mondok nik polanhogo hilingik mene andi faget hundik-handik tindelhu welagirego.

¹⁸ Neisena Allah, Hat homame hilingik welagen mene faget inom, Hat hanggiluk welagen aple faget inom, an nen it hobuk ta'lasugun mene inoba fakhogo yagaisikhi logogin enggere, an nebe yaman asimbik, nesi helel wilife halok ogo, neisena Haren oboget nealuk la fugo.

¹⁹ Neisena Allah, Haren katokhogo hilingiti lagen mene andi re pogot eil uan andi hak hilingik, nen Haren hilingiti lagen mene andoma re mondok hokho pokhorogo hilingi'mo re, ap sa hagen Hat hebe hilingik welagen mene faget mondogat futhobagau hak nogo? Mondok elo'lego.

²⁰ Haren he an noba enggin-fenggin hokhorogo hilingnobagakhi lagen, oba nen he, Harenat an nebe fano hilingnobagagin o, nen an nebe ap warek mene salinafuba nen neluk mennobagagin aro.

²¹ Haren he an nebe nalong logouwageluk legeisogo nobagagik, nen an nendawimo konafu mene nagaiyegap nobagagik, igin weregaro.

²² Neisena Allah, Hat he tiphogo nek hilingiti logolik welagen andiba re, an nen wuni pinggong gambus oba wati logolik fogethafu welagi. Afuni Israel mene ineisena Allah mondok horek welagen mene neisena, an nen he Hat hobaget wuni fogethafarek awuni pinggong kecapi kong eti logolik fogethafi logogin.

²³ An nen wuni fogethafu awuni Hat hobaget ikhi logolik he, an mondok nagaiyek hokho meneba wonoget fakhikhi logogin. Haren an nagap telogo nobagegenma re, an nebe nendawinggen oba nenat mondok nanggilukhogo nawuni wulagaisogo fogethafu welagirek.

²⁴ Afuni an weaget nobagauwogeluk hilingiri'lagwi mene omanogo mondogat inomame lek agaikhasik inenggali agama re, linggene inukhogo Haren katokhogo nek hilingiti lagen mene andi faget fagetu mondok logogin o.