MAZMUR 7 - Allah Wene Fano Wene Hupla Inane

At Allah re heirek mene werek iluk isikhe wene

¹ Hun Kus unggulenu Benyamin agun andi faget at Daud en le yaginafi logolik Tuhan oba wuni isikhe mene re yi.

² Tuhan Allah neisena, an he, Hat hoba nagap telek welagimo re, it afuni an mu'narek mondok nikho mene oma inoba nen Haren fikhalogo wulak nobagagik, nagap telnafik, hilingnabin o, neisena.

³ Mene singa nen yi mene ti mene nageluk aigen hamborogo li'luk lagunem lebetha re elo'lek agarek a'nogo hak, it afuni nen an a'nogo hilingnabuageluk heraknobagagun o.

^4-5 Neisena Tuhan Allah, an nen lalek wene lalinafik, nen it nagaila'lak inelokhoma weaget fisigik, it an naselei mene omanogo wene ero lek kwelek tulemat weaget fisigik, hilingiti halok he,

⁶ we, it an naselei mene omanogo nen enek mu'narek senabi we'luk, nebe warogo kweangma andoma nobagauwago.

⁷ Tuhan neisena, Hat ha'mageba siakhogo menlasimbik, an naselei mene ina'mage lagaluk weri'lagwi mene andi hinom yabini o. Neisena Hat he katokhogo hilingitarek mene andi nek hilingisilep iluk anggikhi lagenma re, Hebe menla'luk lebetnabime o.

⁸ Andi re it afuni inunggulenu ekhe mene ekhe mene Hat hera'lukwe maserogo werek mene andoma misi'mo kaboget fisaluk he, Hat hebe welagen oba pogoroba andoma hurek logolik he it inebe Hat ha'ma ferinarek logoin o.

⁹ We, Haren enek afuni inawene ayo wurogo pilinginafi lagenma re, Tuhan neisena, an he weak hilingiti le'ma re we Harenat nawene katokhogo palnobagain o.

¹⁰ Hat hebe re Allah mondok katokhogo hilingitu mene logolik, afuni inendawimo hilingik mene inom, inunggul oa'ma wenggelharek mene inom isikhi lagenma re, it afuni Hat hane sagalogo hilingitarek mene andi legetfisaluk he, it afuni fano hilingitarek mene halok it andi inendawinggen wuriget fisan o, neisena.

¹¹ Afuni inendawinggen mondok higit mene, inagap telinaferek mene andi ebere, Allah an nebe awe a'ma nobagaluk telnaferek mene andi aro.

¹² At Allah andi re yi hari ti hari afuni weak hilingitunem wene inoba fuluk, inawene ayo wurogo katokhogo palherek mene werek.

^13-14 It afuni andoma inobabut hebelhi'legengge nekherogo nek hilingik halok he, Aren he sikhe ap watu meneba pinggi inoasigin iluk fik-fouksek logolik werek. Nen At enggarok enggat felfelengge magaisogo, andok endu hak mene a'nogoba pisinggerisagain iluk asikhe enggelaba wephogo fangsek logolik werek.

¹⁵ Hani, ap weak hilingiri'lagwi mene nen he, weak hilingisugun mene nek hilingiri'lagwi andi. Wene weak mene nek melalfuluk he inebeba nen ineranhogo mene nek hilingiri'lagwi.

¹⁶ Aren he ap amu mene faget iluk kweang habuli'lagoba nen he, at onggwarek kweang habulik a'nogoba pili'lago.

¹⁷ Arigini'mo ap andi re, at onggwaregen weak hilingiri'lagoba wene oba fakhigik, oba haroba hilingituba re, onggwarek ebeba enggin-fenggin fakhigik hilingirili'lago andi.

¹⁸ At Tuhan andi re katokhogo nek hilingiri'lago mene hilingi'mo re an nen At enek hai wati logogin, Nen At Tuhan Lego Mondok welagarek mene a'nogo obaget wuniba fogeratu logogin.