MAZMUR 69 - Allah Wene Fano Wene Hupla Inane

At Daud yi enggin ti enggin hikhi logolik Allah ayonggo fesikhe wene

¹ Afuni nen wuni wulak fuluk inebe seberogo ugunem yanggulinafu mene faget, Wuni unggulenu Bunga Bakung ebene iluk ikhi lagaukwa mene. At Daud en felalogo watikhe.

² Allah neisena i mondogat hetok-hetok nalonggop oba lagai waga andi nen he, neisena Haren telnabime o.

³ An neisok peikhogo re tonggo fesi mondok lou lakse'ma ma'lima pigiri'mo re, neisok ninghogo fou oba ekhe werek lego. An i mogo mondok agum uan meneba ma'lima pigirik were'ma, i ha'labu waga logolik nebe sebelnafemo welagi o,

⁴ An nane hokhorogo yagahetu werek kwelek nomame mondok lek a'luk nalonggobele puk agunem welagi, neisena Allah nen telnabi wesigin iluk yetharek were'ma-were'ma re, neilenggen mondogat ou agunem welagi.

⁵ It afuni inabit an noba fagarek mene andi, an nesi nungguloba re endebat hangge meneat he, inebe hokhorogo nen kagalnarek logolik, an nen weak hilingiti lek meneat he, inabit noba fili'lagwi o. Ap inomame hokho mene andoma nen an nebe noasuogoluk it ineranen nenu weagerogo fili'lagwi andi. Yi mene ti mene nenggi abisak ekhe wanhi'lek meneat he, ambotkwe oak waganogo wogisoagaluk inane ninghogo yaganetu werego.

⁶ Allah neisena, an nen higithogo hilingiti lagi mene andi, Hat helu mondok welagen andi nen he, An weak hilingitirek mene andoma re Hat helokhoma hinago mene ekhe werek lego.

⁷ Neisena Allah, Hat hebe esin mondok mene, Haren he, yi mene ti mene hilingisu hak enek a'nogo nen he, ero an weak oba hagainafuri inendawinggen hoba himbirik welagaikharek mene inenggali asinogo o. Nit afuni Israel mene nineisena Allah fogethaforek mene it ekhe mukharek wagaikharek mene ero an weak oba nen, inenu weagetfegen hanogoluk hayonggo fikhi lagi o.

⁸ We Hat fagerat an nenu weagerogo fugu werego, nen an nebe Hat faget inendawimo seramet nobagagu werek.

⁹ An nogogwi nagoromi nen mene ogore it ekhe mene hangge hilingnabi'lagwi. An ninom tagongge mene nen ogore, it ekhe mene hangge hilingnabi'lagwi aro.

¹⁰ Hat Hawi wurik andi faget an nendawinggen nunggunem he, nendawimo warikhi lagi. Afuni nen inane ha'malolo kwelafarek mene andi re, anat nenggali agarego.

¹¹ An samban ikhi logolik sumburu ninggi'lek, le agu were'ma, inane asegen wo'niili'lagwi o.

¹² Hat faget nendawimo weak welagi iluk, enekhogo su pelagi su karung mene yanggulogo were'ma, endo ya'nabi'lagwi andi.

¹³ Afuni andogori'lagwi kwe omanogo nen he, an nabok palhu mondok werego. It afuni anggur amusu naluk he, an hilingitirek mene andi faget, kelem wuniba yaganetu werego.

¹⁴ A'nogo meneat he, neisena Tuhan an nen Hat hayonggo fikhi lagi o, neisena Allah Haren hamolo anggagain oba halok, wene onggo yagane'no o. Hendawit nafu welagendek andi nen he, noba lombokhogo logoin o. Lebetnafu welagendek andi nen he, an nebe telnabino o.

¹⁵ An nebe fesi lou'lagenggere'ma ubukhogo pigi hanogoluk heraknobabagun, Harenat telnabin o. Afuni an nebe inabit mene nen weaget nabinogoluk inom, nen i elema ma'lima pigi hanogoluk inom harenat telnafi logoin o.

¹⁶ An nebe i esinggen fonyalik waga logolik sebelnafik, nen i laut elema ma'lima inom athe kweang habuli'mo inom pela'nabinogoluk he Harenat telnafi logoin o.

¹⁷ Neisena Tuhan hobabut fano logolik, hendawit nafu welagen andi nen he, nane holimbik onggo yaganom o. An noba hendawinggen hundik mondok welagen andi nen he, helokhe hebelhogo an wo'nesime o,

¹⁸ An noba yi mene ti mene nelagaik ikhi lagi andi nen he weak weakhogo an lebetnabime o. An hamingmingengge yi noba nen hina'lagun o

¹⁹ An naselei mene nen, noasinogoluk Hat hebe wesimbik telnabime o.

²⁰ Afuni inendawimo seramet nobagaluk inane na'malolo wo'niikhi logolik, nenggali warogo hilingnabi'lagwi andi Hat he helu welagen o. An naselei mene inebe mondogat heilenggen isikhi lagen.

²¹ An nebe afuni nen seramet nobagali'lagwi andi faget, nendawinggen warikhi logolik he, nobakheindok palagunem welagi. Nebe inendawit nabuagaluk heraginafi lagi meneat he, we tulemat heraginafirego. Nendawinggen sebeluageluk heraginafirek oba nen he, inebe isigirek mondok legaro.

²² Sumburu wo'neti logolik, inebe inoaterek mene inom noagaluk wo'neri'lagwi. I nele were'ma, i arik mene hinagaisogo noagaluk wo'neri'lagwiat.

²³ It andi re inamburu seni isago nogoin mene andiba inebe alomat lakhoago. Nen it inambok sumburu isago nouwogeluk inayonggo foumo wesugun mene re, paik hele elema ke'nok ikherek hak, it inebe ke'nok ikhoak.

²⁴ It ineilenggen puk akhambik, inamboroak hundik-hundik omame lek akhoak aro.

²⁵ Hat ha'mage it inoba feino o. Ha'mage endu amulok hangge andi, it inoba mondok fikhi logoino.

²⁶ We, it inawi tenda wurikwe andoma re obalik enek hilinglasuak. Nen it inawi wurikwe andoma re folugenek asuak.

²⁷ Iren he ap Haren unggum oba fesigin mene a'nogoba enggin-fenggin mene nek oba fugu werek, nen, ap Haren enggin-fenggin oba fesigin mene a'nogo faget he iren ikho wikho mondok were'ma re,

²⁸ it andi inebe eberogo mene iluk hilingisogo fisagun o, it inaweak hokho aga logouwageluk herakfisikhi logoino.

²⁹ It inenu re afuni ineluk mondok logogun iluk buku eluk-eluk oba palek werek mene andiba nen terogo lakfisano o. It afuni inobabut higithogo hilingiri'lagwi mene andi inom inenu misi'mo palek logoinogo.

³⁰ A'nogo meneat he, it afuni ekhe nen yi enggin ti enggin hilingnafunem, ou hokhorogo hikhi lagi mene andi neisena Allah, Haren he, an nebe wo'nabimbik he telnabinogoluk hayonggo figi o.

³¹ A'nogo hilingnabigin andiba re, an nen wuni wati logolik, Allah fogethafik, hai wathafik, ikhi logogin o. Andi nen Hat hebe esinet hafi logogin aro.

³² A'nogo hilingiti logogin andiba, Hat hendawimo mondok fano asigin, meneat he an nen wam sapi ai mene ebe hokho mene, neisena Tuhan hobaget warogo nolhesumo re, elok lego.

³³ A'nogo hilingitunem andi ineilenggen healuk he afuni inoba enggin-fenggin hilingfisugunem werek mene re inagaiyek agaikharek, nen it afuni Allah apne wanharek mene re inalong ari'lagwi.

³⁴ Andi re afuni inenggi lek mene re At Tuhan nen inane holherek andi nen o. It inagainafuri hele warogo kwelaginafarek oba omanogo kwelakfisugunem werek mene re, Aren elo'lek iluk herak fisikherek lego.

³⁵ Hat pogot hebe inom, yi mene ti mene hoba mene inom, hat kweang hebe inom, yi mene ti mene hoba mene inom, hat i laut yenggelek inom, yi mene ti mene hoba werek mene inomen he, At Allah nek fogerati logoino.

³⁶ Aren he o Yerusalem ambotkwe agap telimbik he, o Yehuda ba kota-kota olun enek hilingik mene omanogo nekhengge wusigin. Nen kweang andi re it Tuhan againafuri inangge asumo re, inebe andoma lambik logogun.

³⁷ Afuni iren tagongge mene re, o andoma eise asimbik logogun. It afuni inendawinggen Tuhan oba himbirik logogun mene re, o andoma sebeli kwimbik logogun o, iluk wuni watikhe.