MAZMUR 68 - Allah Wene Fano Wene Hupla Inane

Inomame a'luk unggul luguti logolik agarek awuni

¹ Afuni nen wuni wulak fuluk inebe seberogo ugunem yanggulinafarek mene faget, At Daud awuni.

² At Tuhan he feisakhogo menla'luk At aselei mene telfol isikherek, it afuni At oba inabit anggagarek mene re At elokhoma nen heise wulifarek.

³ Endu so'le furogo palogo lek agarek a'nogo hak, At Allah nen it inebe mugusogo lakfisikherek. Nen, hendali nolfugunem endu nen ubun-ubun lek agarek a'nogo hak, afuni weak mondok hilingitarek mene andi ogore At Allah elokhoma nen a'nogoat lek agaikharek.

⁴ Oba nen he afuni wene melalek fanorogo futfuluk hilingitarek mene re inagaiyegen inanggiluk kwelafi logogun, iren At Allah eilhanem andoma nen he inagaiyegetik, inabunuk oba fogerakhigik ikhi logogun.

⁵ At Allah obaget awuni watik, At enu legeisogo figik, ikhi logoni. At ebe anggulok oba weri'lago andi faget ebekwe yati logoni. At andi enu re Tuhan, At elokhoma nen hinagaiyegeti logoni!

⁶ It yenggerugwi suarek mene inom, nen hemi sogwe mene inom, ferinarek mene re ineisena At Allah Awi mondok hore'ma welagarek mene andi aro.

⁷ It afuni inafe wonghogo hombun a'luk werek mene inoba re At Allah nen he o inebe logogun oba wogisikherek, Arenat afuni hele warogo fisagarek mene omanogo lologo wulak fisugunem it inagaiyek hagarek. Oba nen he it afuni At Tuhan ane sagalfuluk hilingitarek mene re, kweang lei mondok pirimse'ma andoma logogun.

⁸ Neisena Allah, Haren hagainafuri woginarek, o lei mondok iringik weakwe laga lagaukwa sambul aremnogo re,

⁹ Hat Allah it afuni Israel mene ineisena, Allah handom Sinaiba weinam agagin mene a'nogo hebe wagunem he, Hat helokhoma nen kweang mondogat abolok igik, meiso lilogo pelabi wagik, ikhi lagaikhe andi.

¹⁰ Haren meiso hokho pokhorogo pelabi wagaginmo re, Hat honggwarek hanggweang mondok iringik weak mene omanogo meiso nen sakhot fesikhemo hobuk obali'mo agaikhe.

¹¹ A'nogo hilingfesiginmo, it Hat againafuri inebe andoma kwi lagaukwasik welagaukwa. Neisena Allah Haren fano hilingninafi lagen a'nogoba, afuni inenggi lek mene re Haren halinafi logolik welagen.

¹² Tuhan nen yi'nogo hilingi'ni iluk wene wulak fugunem he, it afuni nen wene waluk yagaisa lagunem,

^13-14 ”It raja-raja omanogo inom, ap sikhe fisogo mene esa logalek omanogo inom he heise wulifarek!” It he sue merpati nen tarogo lagarek higit lagaikharek. Nen, it hemi oloba werek mene omanogo nen he, it a'nogo heise laga logolik inangge herakfisaluk lagaikharek mene emas, perak omanogo sumbut sambathogo helagarek. It inebe hokhorogo weim yabi lagaikharek lek oba nen, Allah againafuri mene omanogo inebikhit inomame agaikharek.

¹⁵ At Omame Mondok Hokho welagarek mene a'nogo nen it raja-raja andoma werek mene omanogo nit ninenggiba fugunem he, es tom Salmon oba werek mene omanogo pi wagarek.

¹⁶ tom Basan andi re Allah andom. Tom andi ebe wesa pesarogo hilingi'mo punu punungge hilingik.

¹⁷ Hat hebe handom punu-punungge andomaba nen, o Sion Punuba At Allah ebe werek oba iluk wenagaisogo fakhasikheba a'nogo heilenggen lourogo yerogo welagen andi re nenahalok? At Tuhan he o andoma mondok-mondok logogin o.

¹⁸ At Allah re angge kereta mondok hokho pokhorogo inenggi wenasu elo'lekhogo meneba, o Sinaiba nen At Awi obalik Mondok hore'ma omanogo kwigiluk weinam asi wagarek.

¹⁹ At Tuhan ebe legoma po'lima lagakhi logolik andi re, it aselei mene hele warogo werek mene omanogo woginarek lagagin. Andoma logolik he afuni inanggele'ma omanogo nen inom, nen it afuni wene melalek sagalogo fuluk hilingitarek mene nen inom At Tuhan Allah inom andoma seberogo logouwageluk he, At obaget fikhi logogun mene omanogo wanigin.

²⁰ At Allah andi re nit telninaferek mene hilingi'mo re, Tuhan andi nek fogerati logouwok! yi sambul ti sambul andoma re nit ninoba enggin werek mene omanogo hatu mondok werek.

²¹ Nit nineisena Tuhan Allah andi re, Tuhan telninaferek mene, Aren enek nit wa'lasu meneba nen lologo wulak ninobagaikherek.

²² Allah nen he At aselei mene inungguloak inom, it afuni weak enek hilingiti logolik weak anggele'ma werek mene inom, eberogo nenat alperelogo fisagain.

²³ At Tuhan nen ikhi logolik he, ”Yago, hit An nagainafuri mene yi sani, hit hinaselei mene re o Basan nen woginarek wagagi o, I laut a'ma ma'lima nenat An nen lagokhogo woginarek wagagi.

²⁴ It inamep oba hit hineisok sobalhik, nen hit hinamene nen inamep andoma inalabut ninghogo melangethigik ninggik, hilingisuageluk woginarek wagagi o,” iluk ikhe.

²⁵ Neisena Allah, Hat hebe mondogat homame agagindik maset hugunem andi ineil heasukwa, an neisena Allah, Raja an melalnaferek mene a'nogo At ebe were'ma andoma fei laga logolik, esa uluk pambialhogo waluk laga lagaukwa.

²⁶ A'nogo waluk laga logolik elokhoma re it wuni ugu mene laga lagaukwa: Nen it inombo'ne re pinggong kecapi ba watu mene, nen it inombo'ne tulem he helime silerik omanogo nen, no rebana ba fout hilik laga logolik wuni yi'nogo warik laga lagaukwa,

²⁷ ”Allah againafuri andogore'ma inanggelekwe andoma nen Arenek fogerati logoino, At Yakub en tagomangge mene andoma hinebe mondogen hineisena Tuhan enek fogerati logoino!” ilik laga lagaukwa.

²⁸ It inunggulenu Benyamin mene andi re inebe we endebengge hilingi'mo re, itak elokhoma laga-lagaukwa, andi nen it Yehuda mene inogogwi omanogo maming-maming lagunem he, it inombo'ne re, Sebulon mene inom Naftali mene inom inogogwi kaindek omanogo laga lagaukwa.

²⁹ Allah hit hineisena a'nogo nen he hit hinomame welagep mene faget kino ili'lago, Allah nineisena, Haren nit ninobaget hilingiten mene andi ekhe inomat omamet fikhi logoin o.

³⁰ It ap raja-raja nen he Hat hobaget yi mene ti mene fugu mene omanogo re, Hat Hawi wuri'mo o Yerusalem waluk we'luk wokhesi wagaikharek.

³¹ At Mesir andi re wam maro aik anini mene kolom-kolom anggele'ma kuluk anini oba louksek logolik welagarek andi hak werek a'naga oba hane pararagesin o. Yi afuni ti afuni inunggulenu lombok inomame hokhorek logolik, inagainafuri inomen no perak helogoin iluk sibil sebel isagarek mene andi wenagisan o. Nen afuni inunggulenu lombok weim yafu aple inamolo mene andoma re pugulogo yinhun isikhi logoino o.

³² It ap o Mesir mene kaindek-kaindek omanogo re no tembaga waluk weri'lagwi, Nen it Sudan inap he weak weakhogo nek Allah were'ma onggo fei weri'lagwi.

³³ Hit o kerajaan ekhema-ekhema welagep mene nen he, Allah obaget wuniba fogerati logoni, At Tuhan obaget wuni anggup wulagaisogo ikhi logoni.

³⁴ At ebe o endamat andoma pogot soganogo lagasikhe agun andi obaget hilingiti logoni, Tuhan ane ili'lago mene andi holini! Ane re wesa polanhogo suptolang eri'lago andi.

³⁵ At Allah omame logolik it afuni Israel mene inobaget along werek mene andi oba futfeni! At omame re o pogot huli andomaba werek.

³⁶ At ebe werek oba omanogo nen wulibi wagunem he, nit nineisena Allah andi re ibi-eberogo nen, nikpolan aple hilingik. Afuni Israel mene ineisena Allah andi nen he At againafuri inoba inomame wogisigik, inalonget fisigik ikherek. At Allah andi re fogeratu mondok logouwak!