MAZMUR 67 - Allah Wene Fano Wene Hupla Inane

Allah nen yi mene ti mene wogisikherek mene faget hai watukwa wene

¹ It ekhe nen Allah fogerati logolik pinggong oba wuni wati logouwagaluk felalogo watukwa mene.

² We nineisena Allah nen ninebe endawit ninapluk, fanot ninobakhi logouwak, we At endawinggen lebeksek welagarek a'nogoba kwelaknarek logouwak.

³ Allah nit nineisena, hendawimo hamolo anggegendek mene andi yi afuni ti afuni o kweangma welagaikharek mene inelu mondok aga logouwak, nen telninafendek wene andi re afuni inunggulenu lombok yagaisilik laga logouwak.

⁴ Allah, nit nineisena, yi afuni ti afuni inunggulenu lombogen fogethafu logouwak, afuni o kweangma ekhema-ekhema welagaikharek mene nen hai wathafu mondok logouwak.

⁵ Afuni inunggulenu lombok, o yi awi ti awi welagaikharek mene higithogo fano mondok ferinarek welagendek andi nen, afuni inunggulenu lombok inendawimo inagaiyek hikhi logolik, wuni wati logouwak.

⁶ Allah, nit nineisena, yi afuni ti afuni inunggulenu lombogen foget hafu logouwak, afuni o kweangma ekhema-ekhema welagaikharek mene nen hai wathafu mondok logouwak,

⁷ Allah, Allah nit nineisena, yi mene ti mene yago mene ebe hokhorogo wo'nisikhi lagen, ninebe fanotninafi lagen.

⁸ Nineisena Allah, ninebe fanot ninaferek andi nen, yi afuni ti afuni o kweangma welagaikharek mene nen, Arenek agaukhogo fogerati logouwak, iluk wuni watukwa.