MAZMUR 66 - Allah Wene Fano Wene Hupla Inane

Wuniba fogeratik hai watik ikhi logogun wene

¹ Afuni nen wuni wulak fuluk inebe seberogo ugunem melalinafu mene faget, wuni misik felalek mene. Yago, hit afuni o kweangma yoma welagep mene mondogaren he At Allah obaget hinanggilukhogo fogerati logoni o!

² Wuni wati logolik At enek legeisogo fikhi logoni, Wuniba agaugwerati logolik At enu nek fogerati logoni.

³ Hiren Allah ba ikhi logolik he, ”Haren hilingiti lagen mene andoma re mondok hanggiluk werek mene nek hilingiti lagen! Hat homame re mondok hokho mene welagenma re, it haselei mene re inailo nek agunem Hat ha'ma sebe agarek.

⁴ Afuni o kweangma yoma werek mene mondogat he Hat ha'ma sebe i we'luk, iren wuniba Hat henu nek fogethafu werego,” iluk ikhi logoino.

⁵ Hit hinebe we'luk he At Allah nen hilingiterek mene andoma hineilenggen ha waga logoino, Aren afuni inanggelekwe yi mene ti mene elalogo fesikhe mene andoma re mondok wesa polanhogo elalogo fesikhe.

⁶ I laut yenggelek welagaikhe mene a'nogo hebekhogore kweang iringik mene hakhogo hilinglagaikhemo re, nit ninombawi ineisok sebelik-sebelik palogo wulifukwa. Aren a'nogo hilingitikhe andiba re, niren ninagaiyegeti lago.

⁷ At ebere andungdang mondok hokho mene logolik hundik-handik andoma melalinafu mondok werek, Ap wene oak lagalharek mene andoma re At elokhoma nen foget fakha nogoluk, Aren afuni inunggulenu lombok omanogo kagalinarek werek.

⁸ Yago, hit yi afuni ti afuni welagep mene andoma nen he, nit nineisena Allah andi nek fogerati logoni o, Wuniba At enu nek seralhu logoni!

⁹ Nit ninebe nineluk mondok logouwageluk he Aren kagalninarek werek, Nineisok peikhogo waroageluk oboget nisikherek lek.

¹⁰ Neisena Allah, afuni nen perak ebe wurik mene wanuogeluk endumo weragaisogo obabut palharek hak, we Harenat nit ninobabut mondogat pil-pal nisikhi lagen.

¹¹ Haren he afuni nen kweang habuli'mo webet fagarek oba andoma puageluk obokhogo herak ninobagasigin, Nen Harenat nit ninoba enggin hokho mene hilingfesiginat.

¹² It ninaselei mene nen sibil-sebel nisoageluk oboget nisasigin, nen nit he i fu wagu kwelek inom, endu mulunget hugu kwelek inom, sogan isaluk laga lagagu. Oba nen he, yogondak Haren nit wo'ninarek yi mene ti mene mondok hokhorogo were'ma yoma ninobagai wagen.

¹³ An nen he Hat hobaget hobagaluk Hat Haiba nolhesugun iluk fugu mene omanogo an nolhesi waga logogin, nen an noba enggin fengginhogo logolik,

¹⁴ wene watheti mene a'nogore, mondogat tiphogo nek hilingiti logogin.

¹⁵ Hat hobaget he an nen wam warogo nolhu mene iluk penogo werek anggo omanogo inom, kambing, domba inom, sapi ai mene inom wokhetunem hule re, pikhit pogoroba mon-mon lagakhi logogin.

¹⁶ Yago, hit afuni wene melalek futfuluk hilingiti lagep mene yi sani, At Allah nen an nobaget hilingitikhe aple tindelogo yagahisagain enggere, hinebe we'luk he hinesanggo fanorogo holi we'ni o.

¹⁷ An he Aren lebetneoageluk yagatigisik he, yogondak we At obaget wuni fogeratarek awuni nek iginafu welagirego.

¹⁸ An nen weak hilingitarek awene nek nagaiyek haluk nendawimo wenggelhi logoilema nen he, ibi-eberogo nen At Tuhan nen esanggo holilep lego.

¹⁹ Oba nen he, an nen nane kino igi mene a'nogo At Allah nen esanggo holhesik he, An nebeba futnobagaikhe.

²⁰ Aren he an nen samban igi mene a'nogo oak waganogo herakfigi'lek esanggo holnafik, an endawi hundik hilingnaferek mene a'nogo palfigi'lek hilingiterek andiba re, an nen Allah fogeratu mondok welagirego.