MAZMUR 65 - Allah Wene Fano Wene Hupla Inane

Daud en wuniba Allah hai watik, fogeratik, isikhe wene

¹ Wuni it ekhe nen wati logouwagaluk, Daud en felalogo watikhe mene.

^2-3 Nineisena Tuhan Allah re, Nit afuni mondogaren weak hilingiti lago mene, hoba we'luk hayonggo fugunem, ninane holhi lagen andi nen he, niren wene wathetugu hak, nit tom Sion oba logolik, fogethabugun obaat foget habugun o.

⁴ An weak hokhorogo hilingiti lagimo enggin hokho mene noba welagi meneat he, Haren elok sebelogo leget fisikhi lagen o.

⁵ Nit Hat haiba logouwagaluk, wenagaisogo ninayonggo fesigin mene, Hat honggwarek hawi wuri'mo, Hebe welagen oba andoma, yi mene ti mene wogisugunem, inalabut ninghogo nenggarek hak, Haren fano mene wo'nisugunem, oba heilarogo logolik, ninendawimo ninagaiyek hikhi logogun o.

⁶ Ninane hesanggo holuk, ninomame asuageluk, elalin mene hilingisogo, ninebe telninafendek andi. Afuni inunggulenu lombok, i laut yenggelek esanggo-esanggo mondogat hoba fanggoksek logolik werek.

⁷ Hat homame hokho logolik legaisogo hobagali'lagwi mene a'nogo enek asuageluk, Hat henggi homamerogo o tom mondogat menhigik fesigin.

⁸ I laut yenggele'ma abolok hokhorogo ikherek mene, ha'labu hokhorogo waterek mene, Haren hambuget fegendek. Afuni inunggulenu lombok, inane hokhorogo were'ma, haren liogerinafendek.

⁹ Yi afuni ti afuni, o yi awi ti awi welagaikharek mene, Haren elalin hilingitendek mene andi, it ineilenggen healuk he, inailo mondok a'luk, agaukhogo yagahetarek. Afuni kweang ero-ero, welagaikharek mene mondogaren he, wuni endawi sogophogo wati logouwageluk, hilinginafendek andi.

¹⁰ Kweang andi Haren fisogo logolik, oba sakhorasuageluk meiso pelabi wagendek. A'nogo pelabi wagunem he, kweang oba sakhot fugunem he, yi mene ti mene yago mene, enggen oba heilarogo iterek. I elesi mondogat he, neisena Allah harenat hilingisogo fegendek. We a'nogoat neisena Haren foukhogo fisikhi lagen.

¹¹ Yabu ebe waganekwe omanogore, Haren i anggwe halogo lakfei lagalagen. kweang tamuli'lek haro omanogo bene re, Haren meiso lakfei wagunem yi mene ti mene yabukwe yago mene omanogo fanorogo wulibuageluk lebeleget figik, Yi mene ti mene yago mene mondogat Harenat fanotfigik ikhi lagen.

¹² Hat hobabut fano nen he, yi tahun ti tahun ebe lombok, enggen fano palhi logoueagaluk, Harenat wo'nisegendek. Allah heisok sebelik wagukwe andoma nen he, yi mene ti mene amusu werek mene, oba heilarogo wo'nisugunem welagorek.

¹³ O leimo afuni le'ma andoma re domba, kambing ebe hokhorogo werek. Tom unggul ebe lombok, Allah nen fanotfugunem, inendawimo inagaiyek mondok agarek.

¹⁴ O leik engga wilibikwe omanogo re domba nek mondok hokhorogo sagare'ma re, engga omanogo re wam domba esi nen hinago mene hakhogo werek. O tonggwe mondogat he, sumburu gandum hokhorogo werek. Yi mene ti mene o kweangma welagarek mene mondogat he, Haren inendawimo fanot fugunem, a'mit suphogo wuni watharek, iluk wuni watikhe.