MAZMUR 63 - Allah Wene Fano Wene Hupla Inane

”Allah ba ebethikhi logolik, endawi nen isikhe wene

¹ Daud ebe o Yehuda leimo logolik wuni watikhe mene.

² Allah neisena, an neisena Allah re hat welagenma. Hat hebeat nendawi hundik logolik herakhabik nikhi lagi o. I nele nen inendawimo agesabu fulung hugunem welagaikharek hak, kweang amusu le'ma yoma logolik, an nendawinggen hat hoba ebethugu mondok welagi o.

³ Hat hebe hawi wuri'mo omanogo were'ma, an neilenggen tukhumhogo hebe kumut hiigik, nen Homame welagen mene a'nogo inom, fogethafarek mene a'nogo inom kumut hiigik, ikhi logogin o.

⁴ Ineluk welagaikharek mene andi re, endebat hangge, mene re, haren hendawit nafendek mene andi nek he, esin mondok hokho andi nen he, an nen hat fogethafi lagi o.

⁵ An nebe neluk logolik he, hat fogethafu mondok welagi o. An nen nenggi hoba liakfuluk, samban hayonggo fikhi lagi o.

⁶ Sei mene tonggokhogo nenggarek hak, nebe fanotnafi lagen andi nen, nendawimo nagaiyek mondok aga logolik, hai wathafik, fogethafik, ikhi lagi o.

^7-8 Haren lebetniikhi lagen andi nen, o hup inukhogo re an nebe nogo igirek oba wengik logolik, menenei ebethikhi logolik he, hoba ebetu mondok welagirego. Hat hogolabi a'ma logolik nendawimo haien he hawuni watu welagirek.

⁹ Nemberek hundik logolik, ninom mondok nogorego. Hat henggi nen fetnarek logolik he, wo'narek nikhi lagen.

¹⁰ A'nogo meneat he, it afuni an noasuogoluk agarek mene andoma re, afuni wa'la'luk lagaikharek oba andoma hela pugun o.

¹¹ It andi inebe re weim yafi logolik inoasumo wa'lasugun, nen it inebe warek he mene olomene nen nogoin.

¹² A'nogo meneat he, at raja re Allah nen lebethikherek andi nen he agaiyegeti logogin. Afuni At Allah enu hombuk palogo ayonggo fagarek mene andi re, foget fakhikhi logogun oba nen he, it afuni ineranen wene nek agarek mene re, inambe te'met fisagain o, iluk wuni watikhe.