MAZMUR 62 - Allah Wene Fano Wene Hupla Inane

At Allah inom hundik were'ma hambukhogo welagaikharek wene

¹ Afuni nen wuni wulak fuluk inebe seberogo ugunem yanggulinafu mene faget, wani unggulenu Yedutun andi bene, at Daud en watikhe awuni.

² An nebe Allah ninom hundik were'ma hambukhogo welagirek. At oba nenat an nagap telek welagirek.

³ At ebe helep tom hakhogo fe'narek welagik, nagap telogo nobagagik, hilingiterek. Nen At ebe o kota leget ninghogo waganogo kwelabek andi higit fetnarek were'ma re, an naloak nalo-halo u lek hak.

⁴ Ap misik ekhe o hobat molulukhogo asi lagarek andi higit hilingik kwelek, nen leget mondok helelarogo lagarek andi higit hilinglagu kwelek, hit hinebe mondogen he o ki sambul at ebe wasugun iluk nenangot hikhi logogun nogo?

⁵ Hiren he at ebe yabu lego mene werek oba andi nen sebelogo pelak fogoin iluk hilingiti lagep. Hit he hineranen wene lalinafu aple nek hinagaiyek, hit hinambeba nen afuni fanot fisikhi lagep oba nen he, hinendawimo nen he hururung inafi lagep.

⁶ We At Allah ninom hundik were'ma an nebe nendawinggen hambukhogo welagirego, At oba nenat nagap telek werego.

⁷ At ebe helep tom hakhogo fetnarek welagik, nagap telogo nobagagik, hilingiterek. Nen At ebe o kota leget ninghogo waganogo kwelabek andi higit fetnarek were'ma re, an naloak nalo-halo u re lek hago.

⁸ At andi re Allah an nagap telogo nobagagik, legeisogo nobagagik, hilingiterek mene a'nogo o, Allah ebe helep tom hakhogo omamerogo fetnarek welagik, an awe a'ma telogo nobagagik ikherek menere At amu nek werego.

⁹ Yago, hit an nunggulenu mene yoma sani, linggene hundik-hundik At Allah andiba nek hinendawinggen eberek logoni o, Nit ninebe At awea'ma kuluk oba himbirik welagoma re, hit hinendawimo anggikhi lagep mene andoma At a'ma pulelogo liak fikhi logoni o.

¹⁰ Afuni re, we set misigam lek agagarek andi higit welago, afuni inenu werek mene inom, inenu lek sebelek mene inom he we higit elo'lek enek welago. Nen, inebe enggin walisamo nen he mondok inagut siserek lagou hak, set misigam furogo lagarek andi endep ekhe enggin hak oba nen, it inagut he se fulung falangsek logou hago.

¹¹ Hit hinenggi omameba afuni sebelinarek logolik inangge helikhi lagep mene andomaba hinendawinggen eberek lagou fuk, nen afuni inangge telikhi lagep mene andomaba hinendawinggen tibet fuluk logou fugat. Nen, hit hinangge yi mene ti mene hinenggi werek agunem oba nen ogore, hit hinendawinggen andiba tibet fuluk logou fugaro.

¹² Pire henagan oba hakhogo At Allah nen ugunem holhi mene re yi'nogo, omame ero andi re we At Tuhan oba nek werek,

¹³ nen Aren he hundik-handik endawit ninafi logoligenek werek. Tuhan neisena, Haren he afuni inobabut hilingitarek mene higithogo nek, onggo ambisangma hilingfisikhi lagen.