MAZMUR 61 - Allah Wene Fano Wene Hupla Inane

Nalong palogo fetnarek logouwageluk samban isikhe wene

¹ Afuni nen wuni wulak fuluk pinggong kecapi wati logolik inebe seberogo ugu kwelek melalinafu mene faget, at Daud awuni.

² Neisena Allah an nane kwetu welagi mene yi hesanggo holin o, Nen an nen samban ikhi lagi mene andi fut nobagakhi logoin o.

³ An nendawimo mondogat weak agunem, naiba yatma nebe welagiba omanogo nen henu hombuk palhu welagi o, Harenat an nebe hondo'narek he obalik youk mondok lek oba, mondok legoma an nen lagau elo'lek oba andoma waganogo nobagai lagain o.

⁴ An nebe nalong palogo fetnarek welagen mene re Hat hebeat welagen, nen it naselei mene nen noasuogeluk hilingitunem nendawi hambugengge re Harat welagen.

⁵ Hat hogolabi a'ma an nebe sebelnarek were'ma re, an nailo legengge nabolok lek logogin nen he, an nebe neluk logolik oba Hat hawi sabu sale'ma andoma kuluk logogin iluk anggikhi lagi o.

⁶ Neisena Allah, an nen wene wathetigi mene a'nogo haren hesanggo holhigindik, ap wene melalek futfuluk hilingitarek mene inangge inalolegengge omanogo Haren wo'netigin.

⁷ At raja ebe umur uanhogo were'ma, at ebe eluk mondok-mondok logogin.

⁸ Neisena Allah, raja andi ebe harenat wenagaisogo fesigin mene hilingi'mo re, Haren hendawi hundik hilingitik, tiphogo nek hilingitik, egendek mene a'nogoba agap laberogo fisogo logoin o. A'nogo were'ma ninhup nanhup andoma re aren enek melalinafu mondok logogin.

⁹ Andiba re, linggene ekhe sambul-ekhe sambul wagu kwelek an nen wene wathetigi mene a'nogo tibet figik, nen Hat hobaget wuni fogethafu awuniba fogethafik ikhi logogin o.