MAZMUR 60 - Allah Wene Fano Wene Hupla Inane

Lebetnabuageluk samban isikhe mene

¹ Afuni nen wuni wulak fuluk inebe seberogo ugunem melalinafu mene faget, wuni unggulenu: Bunga Bakung enegengge agarek mene andi bene felalek werek higithogo, At Daud en yanggulinafi lagaikhe awuni.

² Aren afuni o Aram-Mesopotamia mene inom, afuni Aram Zoba mene inom, inoba weim yabi lagaikhesik, at Yoab en he o Lembah Asin andoma nen afuni Edom mene inebe 12.000 nen inoa'luk wagaukwama wuni watukwa mene.

³ Neisena Allah, Haren nenahalok nit oboget nisegen, Nen nenahalok nit ninomame leget ninobagauwageluk hilingninafen, Haren hanini nit ninoba fegenma, yogondak hilingik welago mene yi hambotkwe halogo ninobagaime o.

⁴ Haren kweang yi lang-fang isegenma kweang mondogat harelik laga o, kweang leigeti logolik harelhe mene oma afe halime o.

⁵ Nit Hat hagainafuri a'nogo enggin-fenggin mondok elo'lek mene hoageluk hilingninobagegen. A'nogo hilingninobagegenma re, ap i lugu lugwi palharek mene naluk talo-talogenggerik lagaikharek higit, nit a'nogoat hilingirik laga lago o.

⁶ It afuni Hat hawene futfuluk hilingitarek mene omanogo re, wene inoba asinogoluk it inelurogo logouwageluk, Haren eberisikhi lagen.

⁷ Hat homameba nit ninagap telninabin o, nen niren samban ikhi lago mene andi ninane hologo onggo yaganisan o. It afuni Haren hendawi hundik hilinginafi lagen mene andoma inagap telinabuageluk hilingfisan o.

⁸ At Allah ebe welagarek oba mondok hore'ma omanogo nen ane ikhi logolik he, ”An nagaiyek mondok hilingiti logolik kweang o Sikhem kweang a'nogo sumbusigiluk welagi o. Nen o Sukot Tonggo andi re inenggi walhagarek a'nogo hak walhagain o.

⁹ Gilead inom Manasye inom he an nonggwarek nangge mene, Efraim he an nunggulasu baja meneba puksek welagi mene o, nen Yehuda re An nebe raja mendek logolik melalinafi lagiba andoma narige tomuk higit werek.

¹⁰ Oba nen he at Moab enek he An neisok sobalhi lagiba o, it Filistin meneba nen An nalong agagi andiba re foget fakhikhi lagi o. Nen at Edom oba re At ebe An nonggwarek nanggwe enekhogo logouwageluk, An nen neisok sepatu ba fetak warogo hugisagain o,” iluk ikhe.

¹¹ Ap sa nen wo'narek o Edom andoma nobagai lagain nogo? Ap sa nen o leget pa'leget mondok omamerogo wagane'ma andi hondogoisogo nobagai lagain nogo?

¹² Neisena Allah, Hat he nit ninom lagu aple re habit a? Hat he nit ninagoromi tentara inom seberogo lagu aple re habit ara?

¹³ Afuni nen lebetninabu andi re, we alomarogo hangge hilingi'mo re, it ninaselei mene andomaba nen nit lebetninabin o.

¹⁴ Nit At Allah ninom halok he ninambong mondok siserogo hilingisu hago, nen nit ninaselei mene ninom weim palek welago mene andoma re Arenat alperelogo fisagain o.