MAZMUR 6 - Allah Wene Fano Wene Hupla Inane

Enggin fenggin hikhi logolik samban agarek wene

¹ Afuni nen wuni wulak fuluk pinggong kecapi watu kwelek inebe seberogo ugunem melalinafu mene faget, wuni asiok siregen mene, Daud awuni a'nogo.

² Tuhan neisena, Haren he ha'mageba yei noatik, nen helokhe ageba wene noba figik u fugo.

³ Neisena Tuhan, an he nomame mondok lek agama re hendawi nean o, an mondok nonghong igirik logolik he fano hilingnabinogeluk hayonggo figi o.

⁴ Nendawinggen mondok nonghong ugu nen he, Tuhan neisena ki huli nen an oboget nealuk logogin nogo?

⁵ Tuhan, hambotkwe nambit we'luk he, Hat hendawi hundik hilingnabimbik lisogo wulak nobagai wagik, nagap telogo nobagagik in o.

⁶ A'nogo hilingnabigin andi re ap wa'la'luk lagaikharek oba andoma nen he Hat hoba ekhe ebet heogoin lego, nen, ap fili salfisagarek oba andoma nen ogore afuni nen ekhe Hat fogethabugun legaro.

⁷ An nendawimo mondok wiik weakhogo werek kwelek enek he nomame mondogat legagarik welagi, hup hundik-handik le agu mondok were'ma nen neil amusu tephigik pikhi logolik he nogokhi lagingge a'nogo bene kulu lagali'lago.

⁸ Nendawinggen heiselhi logolik neilenggen mondok mum ari'lago, nen it naselei mene omanogo faget he neilenggen mondok mep sagalogo ou eri'lago.

⁹ An le aga lagi mene andi re At Tuhan mondogat esanggo holhemo re, hit ap weak hilingiti lagep mene andoma mondogat an nelokhoma nen longgoikha lani o.

¹⁰ At Tuhan nen, an nen kino yagati mene nane esanggo holnobagagik, samban oba yagati mene Aren wo'nafik, hilingnobagali'lago.

¹¹ It an naselei mene mondogat he youk lambik inenggali nen weak-weak higil asugun.