MAZMUR 58 - Allah Wene Fano Wene Hupla Inane

Ap ina'mage weak mene inobaget inunggulmo fouwageluk samban isikhe wene

¹ Afuni nen wuni wulak fuluk inebe seberogo ugunem yagaisugu mene faget, wuni unggulenu Leget fisa fuk, iluk agarek mene andi bene felalek mene. Daud Awuni.

² Yago hit ap kaindek hinenu werek logolik melalinafi lagep mene yi sani, hiren wene tegeti lagep mene andoma re heirogo nek tegeti lageba? Hiren afuni inawene pilingisogo ayo wuti logolik he, higithogo hilingiti lageba?

³ Mondok lego, o yomaba hiren wene weak mene nek melalogo figik, nen hinagaila'lak inangge hinenggi abisak teligik, hilingiti lagep andi.

⁴ Ap weak hilingitarek mene andi re it inebe inagaisawi inalabutmo ta'lagaukwa huli nen inebe mondogat nonghong agarek, nen it he inebe ta'lagaikha huli nen he ineranen wene nek agarek.

⁵ It inebe re kisu aik palinaferek mene hangge inendawimo racun peterogo werek, nen kisu esanggo tagum mene enu kobra a'nogo nen,

⁶ ap hareise mondok hibilik hebelek inap omanogo inane ogo, athe it heinogenggeba hakhogo weneane mati logolik agarek mene ogore inane esanggo holherek lek a'nogo hak werek.

⁷ Allah neisena, it inaik andoma langgorisan o, Tuhan neisena, mene singa ket souge mene aik tum hak mene andoma langgorisan.

⁸ It inebe re i age wuliferesik palogo lek agarek a'nogo hak hilinglagik, togengge ambisang sugulherek a'nogo hak hilinglagik, uago.

⁹ It andi re no sogobenggen obalik lagarekwe amunggulal andi hak hilinglasuak, nen omalik ket taginafu mene o selek ineilenggen higi'lek wagaikharek a'nogo higit asuak.

¹⁰ Alok-alok engge oan engga heiselogo wilifi logolik hokho agi'lek were'ma nen, sogoien engga iringik mene furogo waluk lagarek a'nogo higit asuak, it inebe oan fut fisigi'le'ma nen he inebe mondogat lek asuak.

¹¹ Ap weak mene unggum inoba fugunem he afuni higithogo nek hilingitarek mene re inagaiyek hagarek, nen afuni wene melalek sagalogo hilingitarek mene inamep oba re it andi ineisok sobalharek.

¹² Afuni nen ikhi logolik he, ”Hilingisu hak, ap fano mene onggo helagarek, eberogo nen At Allah re o kweangma mondogat inawene pilingisogo ayo wutu mene werek,” iluk ikhi logogun.