MAZMUR 57 - Allah Wene Fano Wene Hupla Inane

Lebetninabuageluk samban agarek wene

¹ Afuni nen wuni wulakfuluk inebe seberogo ugu kwelek yanggulinafarek mene faget, wuni unggulenu mondogat leget fisa fuk agarek mene andi bene felalek mene, at Daud ebe Saul agaiserogo oumo lagaikhesik isikhe awuni.

² Neisena Allah hendawit nabin o, an he Hat hawea'ma fetnarek welagen ma re hendawit nabin o, An nebe Hat hogolabi a'ma hinago werek kwelek enek he, o sielu funha wagarek mene a'nogo aloget fikherek.

³ An nane At Allah Lego Mondok welagarek mene a'nogoba humeti lagi o, At Allah an nobaget hilingiri'lago mene a'nogoba nane kweti lagi o.

⁴ At ebe pogoroba nen an nane onggo yaganetik, nen nagap telnafik, ikherek. It afuni an noba enggin-fenggin fagarek mene omanogo re Aren enek leget fisikherek. At Allah nen an noba tiphogo nek hilingiterek mene inom, nen hundik-handik endawit naferek mene inom inuk neagain logou hago.

⁵ An he it afuni an naselei mene nen haningisogo kwelaknarek werek, nen it inebe re mene singa afuni senggelinaferek mene hak hilingik, it inaik he sige kabelek hak aik ngili-ngelerek, it inamelinggen he karok enggat merenghogo mago mene hangge hilingik.

⁶ Neisena Allah Hat handungdang mondok welagen mene andi re pogoroba mondogat weinamet figik, Nen Hat hanggiluk welagen mene andi re o kweangma yi awi ti awi mondogat weinamet figik in o.

⁷ It an naselei mene nen he an nebe weaget nobagauwogeluk hele watnafi logolik he an nagaiyek welagi mene a'nogo lebeleget nobagali'lagwi o, Iren he an nanggwe lagain kwe omanogo pogole habul fili'lagwi meneba nen he, it inonggwaregat kweang habuli'mo omanogo pili'lagwi andi.

⁸ Neisena Allah, an nendawinggen eberogo nenat Hat hoba tibet figirik welagimo re, an nen Hat hoba nek hai wathafik, wuniba legeisogo hobagagik, ikhi logogin o.

⁹ An nendawinggen nebe neluk welagi mene yi re helugame o, an nen nambinggong kambus, kecapi watunem, o wei uageluk eleligen he yogondak yaat helugame o.

¹⁰ Tuhan neisena, an he it afuni inunggulenu mene inanggele'ma andoma nen, Hat hai wat hafu welagik, nen it afuni hokhorogo inanggele'ma andoma nen Hat hobaget wuni fogethafu awuni watik, ikhi logogin namolo o.

¹¹ Haren hendawi hundik hilingninafi lagen mene andi re mondok esin hokho mene hilingi'mo re, huli pogot huli andomaba hilingik. Nen Haren tiphogo nek hilingninafi lagen mene andi re huli o anggulok huli andomaba hilingik.

¹² Neisena Allah Hat hebe handungdang welagen mene a'nogo pogoroba andoma inukhigik, Nen hombakbak welagen aple a'nogo o kweangma yi awi ti awi mondogat weinamet figik in o.