MAZMUR 56 - Allah Wene Fano Wene Hupla Inane

Inoba enggin-fenggin logolik Allah ba nek eberek welagaikharek awuni

¹ Afuni nen wuni wulak fuluk inebe seberogo ugunem yagaisugu mene faget. Wuni sue merpati o yatkwe e bene afe mogol arue iluk ikhi lagaukwa mene andi faget apne waganogo felalhukwa mene. Daud ebe it afuni Filistin mene nen o Gat omanogo nen fakfesukwama, at Daud en isikhe awuni.

² Neisena Allah, an it naselei mene omanogo nen hundik-hundik sebel nabi wagik, nen noasuogeluk hilingisi wagik, ili'lagwi andi nen he hendawit nabin o, neisena.

³ Linggene hundik-hundik he it an ninom seleirogo welago mene omanogo nen alperelnabi weri'lagwi o, Neisena Allah Hebe Lego welagen mene, it inebe hokhorogo nen he, an it inaselei mene hilingnobagali'lagwi o.

⁴ An nebe nailo agu sambul he, Hat hoba nendawinggen ebetfuluk welagi o.

⁵ An he Aren abok wene watnete andiba re, At Allah nek fogerati lagi o. An nen At oba nendawinggen eberogo anggikhi lagi andiba re an nailo lek welagi o, andi nen he afuni nen an noba ninggi'nogo ekhe hilingnobagau hak nogo?.

⁶ Linggene hunduk-hundik he it naselei mene omanogo nen an nawene a'nogo nonghonget fogoin iluk hilingitik, nen an nebe weaget nobagagun iluk hilingitik, ili'lagwi o.

⁷ It inebe hinagokwe omanogo nek linglong lagaikharesik he, an nen hilingiti lagi mene omanogo ineil wo'nabi laluk, ebe ka nen wasugun iluk ineilenggen wo'nabik nikho.

⁸ Neisena Allah, iren weak mene nek hilingiri'lagwi andiba it inebe telinabu hak mene ekhe werek nogo? Hat ha'mageba nek it inebe legetfisan o!

⁹ An nebe leil warik nikhi lagi andi re Haren linggene ti nen iluk henggi wenago welagen, nen an neil amusu tephogo pili'lago mene andoma mondogat he Haren mondogat wenagaisogo fikhi lagen lek nogo?

¹⁰ Hat Allah an nebikhit welagen andi re an nelu hilingi'mo re, an nen Hat hoba nane hombuk paligin sambul andi re it naselei mene inebe wathigik lak fisano o.

¹¹ At Allah nen abok wene wa'nete andiba re, At ebe hundik-hundik fogerati lagi o.

¹² An nen At oba nendawinggen eberogo anggikhi lagi andiba re, an nailo lek welagi o. Andi nen he afuni nen an noba ninggi'nogo ekhe hilingnobagau hak nogo?.

¹³ Neisena Allah, an nen wene wathetigi mene a'nogo eberogo tiphogoat hilingisigin o, nen an nen Hat hai wathafi logolik he wam warogo wokhesigin aro.

¹⁴ Haren an nebe wa'lagaikharek meneba nen heiselogo wulak nobagai wagenma re, an nebe pile pigi hanogoluk Haren kagalnarek logoin o. Andiba re, an nebe Allah hawe a'ma fetnarek mondok were'ma neluk logogin o, nen yi mene ti mene eluk welagarek mene mondogat ombakbagen selegeraterek mene a'nogoba laga logogin o.