MAZMUR 55 - Allah Wene Fano Wene Hupla Inane

Naselei mene inoba nen telogo nobagain o iluk wuni watikhe wene

¹ Afuni nen wuni wulak fuluk pinggong kecapi watu kwelek inebe seberogo ugunem melalinafu mene faget. At Daud en yangaisasikhe awuni.

² Allah neisena, an nen samban ikhi lagi mene yi holnabin o, nane kino yagaheti lagi mene andomaba nen helokhe hebekhogo hambot wo'nesu fuk.

³ An futnobagaluk he onggo yaganom o, nen an he noba enggin-fenggin werek mene a'nogoba mondok nonghong igirik welagi o.

⁴ It afuni naselei mene nen an noasuogeluk nanggomo palik nikho andi inom, nen it afuni weak hilingitarek mene nen enggin mene noba fili'lagwi andiba inom, an nendawinenggen mondok fit lari'lago o. Iren he an noba enggin mene nek hilingnobagali'lagwi, it ina'mageba re an ninom weim palek mene hilingnobagali'lagwi o.

⁵ Wa'lagaikharek mene a'nogo an noba horogat asi wagunem he, nailo nen namel-mel agunem nendawi hokho mene fiti lagi o.

⁶ An nebeba re nailo mene inom, noak leigetu mene inom enek noba agunem he, namelmel mene re we horogat asi wagunem welagi o.

⁷ We, an nebe yi sue pel hak logolik nagerabul wilibik logoumo nen he, tarogo yi wene ti wene mondok le'ma andoma lelesik nabolo'lek logoile agwi.

⁸ We mondok yatpatma andoma tarogo lelesik, o leimo engga mondok pirim se'ma andoma nafe morogo logoile e.

⁹ O andoma re, sogoi inom sielu inom funha wagunem an nebe hinago logolik logoiyogen iluk obalik ekhe weak-weak herak hele o.

¹⁰ Tuhan neisena, it afuni naselei mene andi inendawinggen nonghongerisan o, o kota kwe andoma iren ina'mageba nek hilingitik, yei wene nek palhik, hilingitunem isikhi lagimo re, it inane mari'lagwi mene andoma re salingpalinghogo hilingfisan o.

¹¹ Iren he hup hundik-lingge hundik haningirik nikhi logolik he, weak mene nek hilingitik, ina'mageba yei wene liabugun mene nek hilingitik, hilingirik nugunem isikhi lagi o.

¹² Ariginhi logolik he, yi kwe ti kwe mondogat weakpeakhogo hilingfisigik, enggin-fenggin inoba figik, nen afuni nen yi mene ti mene onggo palhik hunitik agarekwe omanogo ineranen weneba lalfal isigik, hiligiri'lagwi o.

¹³ It naselei mene nen an weaget nobagakhi logoilepma nen he, an he elok logou hak, Nen, it an ninom weim palek mene nen an mabenet nobagakhi logoilepma nen he, an he it a'nogo ugu nen iluk elok hina'laga logoile.

¹⁴ Oba nen hat he an nagailak, namep mene, ninom horokhogo welago mene a'nogo nenat an eil nafi lagen o.

¹⁵ O attak he nit hat nemberek ninendawi hundik logolik ninom seberogo hilingiti lagagu, nen ninetokhogo re ninebe seberogo Tuhan Awi wuri'mo wene kabogeti lagaguat.

¹⁶ Andi nen he, it an naselei mene andoma re inaiba inom, it inanggelekwe inom weak mene nek were'ma re, it afuni an ninom weim palek mene andoma re inebe ineluk oan werek kwelek wa'lagik, nen inebe inelugengge wa'la'luk lagaikharek oba andoma pi lagik, ikhi logouwago.

¹⁷ Oba nen he, an he At Allah oba nane hombuk palhu welagirego, nen At Tuhan nenat an nebe telnabigin o.

¹⁸ Linggene inom hubanggo inom, hundik-handik enu hombuk palhi logolik le agu mondok were'ma, Aren an nane hologo hilingnaferek.

¹⁹ It afuni an ninom weim palek mene omanogore esa logalhaluk an noasuogeluk hou sali wagunem, Arenat an nagap telnaferego.

²⁰ It andi re inobabut hebelhi'lek, Allah ba inom inailo anggigi'lengge nen hilingitunem he, At Allah etok mondok werek mene a'nogo nen an nane ikhi lagi mene a'nogo esanggo holnafi logogin o, nen it he inomame leget fisagain.

²¹ Attak an nagailak ekhe ninom fano welago mene nen he, at agaila'lak ekhe inoba labok igik, nen aren wene waterek mene a'nogo taganhogo hilingitik, hilingiti laga.

²² Nen At ane ugunem he ane mondok sakhorek oba afuni inendawinggen wanherek, oba nen endawimo nen he mondok abit logoligen hilingiterek. Wene ane ugunem he ane hafe mene legengge ikherek, oba nen he weim enggat fel-felengge mago mene hakhogo inendawimo yuguli lagarek.

²³ Afuni higithogo hilingitarek mene re mondok-mondok faget mabenet fisoageluk herak fisikherek lek andi nen he, hiren yi mene ti mene faget menenei uan horok ebeti lagep mene andi re hineisena Tuhan oba nek wogeti logogun halok he, Aren enggiba agorogo fethinarek logogin o.

²⁴ Oba nen he neisena Allah, Haren enek he it inebe temukhogo kiling ele uan meneba ma'lima pelaginabin o. It ap ineranen wene agarek mene inom, ap amep pelafarek mene inom he, it inebe umur uanhogo welagi'legengge we horogat wela'luk wa'lasugun o. Oba nen an enek he, Hat hoba nendawinggen eberek welagi o.