MAZMUR 53 - Allah Wene Fano Wene Hupla Inane

Afuni nen kwanirogo nek hilingitarek mene faget isikhe wene

¹ Afuni nen wuni wulak fuluk inebe ambine seberogo ugunem yanggulinafu mene faget, wuni unggulenu Mahalat ebene felalek mene. At Daud en yanggulinafikhe awuni.

² Afuni morue mene inendawimo nen anggikhi logolik he, ”Allah re werek lek,” iluk anggagarek. It inobabut he fano mene ekhe hilingitarek lek, we mondok weak mene inom, kwanirek mene inom enek hilingitarek.

³ At Tuhan ebe pogoroba logolik, At againafuri o kweangma welagaikharek mene eilenggen woginafu welagarek, nen Aren he afuni inobabut higithogo hilingitik, At ebe fogeratik agarek mene werega, lega? iluk heraginaferek.

⁴ Oba nen he afuni inebe mondogat he At ebe herakfuluk wulibi laluk he taganhogo hilingitik, inobabut mondogat nonghong igik, agarek, ap misigen iluk ogo fano hilingitu mene ekhe werek mondok lek.

⁵ At Tuhan nen ikhi logolik he, ”Afuni weak enek hilingiri lagwi andoma re inobabut hebeli'lagwi lega? Iren An nagainafuri inangge teligik, An noba nayonggo figi'lek welagik, hilingiri'lagwi andoma ri!” iluk heinok wanherek.

⁶ It afuni weak enek hilingitarek mene andi re, it inoba inailot fisugu mene lek kwelek oba nen, iren inailo nek aga logogun, At Allah nen he, it afuni hit haningisogo kwelakhinabi weri'lagwi mene andoma nabit iluk obogerisambik, it inoak lolo omanogo telfol isugunem he, hiren it elok mabenet fisikhi logogun.

⁷ O Sion punuba omanogo nen it afuni Israel mene re inagap telinabi waga logouwago. At Tuhan nen he againafuri inebeba hilingik mene ari mondogat halfisamo re, it Yakub en tagomangge mene inambisangmangge ari mondogaren he inagaiyegeti logogun o.