MAZMUR 52 - Allah Wene Fano Wene Hupla Inane

Afuni weak hilingitarek mene unggum inoba fagarek wene

¹ Afuni nen wuni wulak fuluk inebe seberogo ugunem yanggulinafu mene faget, at Daud en yanggulinafikhe awuni.

² At Daud ebe hun Abimelekh were'ma oba lagaikhemo, hun Doeg aiba Edom mene a'nogo nen Saul oba yagasi lagaikhemo isikhe awuni.

³ Hit afuni kaindek hinap yi sani, hiren ap Allah nen endawi hundik hilinginaferek mene inoba weagerinafi lagep andoma faget, foget fakhikhi lagep andi re nenahalok nogo?

⁴ Hiren linggene inukhogo andoma re lalinabugun mene inom, kwanirogo hilingisugun mene inom omanogo faget enek lenggalhu mondok welagep. Nen hit hinamelinggen he weim enggat merenghogo mago mene hangge welagep.

⁵ Hiren fano hilingitarek mene omanogo herakfuluk he weak hilingitarek mene omanogo nek hinendawi hundik hilingitu welagep. Eberogo wene ugu mene omanogo faget he seramet fisaluk hineranhogo wene agarek mene omanogo faget enek he esinet fuluk hinamurururogo hilingitu welagep.

⁶ Nen hit hinane nen afuni lalogo fisikhi logolik, inendawimo waroageluk ouet fisikhi lagep.

⁷ Oba nen he, At Allah nen hit hinebe mondok-mondok leget hinobagagin o. Nen hit hinebe hinailoba nen lisogo wulak hinobagai wesimbik he, afuni ineluk werek oba yoma nen hineiloak leget hinobagagin o.

⁸ A'nogo hilingitunem ineilenggen hisaluk he, ap Allah ane hologo hilingitarek mene omanogo inailo nen, endo yakhafi logolik, yi'nogo ikhi logogun:

⁹ ”Afuni At Allah awea'ma ferinarek logouwageluk hilingiti'legengge welagik, inenggi werek logolik oba heilarogo welagaikharek mene a'nogoba nek tibet fuluk welagik, afuni inangge hinenggi abisak telugu mene omanogo faget enek inailo'lekhogo logouwageluk hilingitik, agarek mene re a'nogo hilingitarek andi o,” iluk ikhi logogun.

¹⁰ Oba nen an he At Allah Awiba andoma e zaitun engga mulirogo wuliferek mene hakhogo logogin. At Allah nen ninhup-nanhup andomaba re, endawi hundik hilingnafu mondok logogin iluk nendawimo anggikhi lagi o.

¹¹ An nen Hat faget enek hai wathafu mondok logogin o, Nen it Hat hagainafuri mene omanogo inelokhoma re, Haren fano mene hilingninafi lagen mene andoma nek fakhogo yagaisikhi logogin o.