MAZMUR 50 - Allah Wene Fano Wene Hupla Inane

Tuhan obaget eberogo mene hilingiti logogun wene

¹ Asaf Awuni. Tuhan Allah Omame Mondok Hokho mene a'nogo ane ili'lago o, Aren he yi afuni ti afuni o kweangma mo ero fikhit welagaikharek mene huli nen he mo ubuk ikherek huli welagaikharek mene inoba ane humeri'lago.

² O kota Sion mondok fani-fanore'ma omanogo nen, At Allah aselek ombak-bak oba weinam asi weri'lago.

³ Nit nineisena Allah andi ebe waga logolik he At ane legengge wagarek lek, At waga logolik elokhoma re endu amulok kulung-kulung wagarek, nen sogoi sielu hokho mene re At ebe huli'liphogo wagarek.

⁴ Aren againafuri wene inoba figik kotik igiluk, eil werek mene faget he pogot inom kweang inom wolisikherek.

⁵ Aren ikhi logolik he, ”It An nagainafuri mondogat ninom wene watugusik, wam warogo omameap etugu mene andoma mondogat andogerinabini o,” iluk ikherek.

⁶ Pogoren fageti logolik he, At Allah ebe afuni wene inoba figik kotik ugu mene logolik, Aren it againafuri omanogo inawene katokhogo tegeterek.

⁷ Yago, hit An nagainafuri mene yi sani, An nane ikhi lagi mene hinesanggo fanorogo holini o, Hit Israel hinap yi hineilhanem fageti logolik he, Hit hineisena Allah re An nebe aro, An he hit hineisena Allah welagi.

⁸ Hiren yi mene ti mene waluk we'luk noli waga lagep mene andi faget An nen hinoba hikhip hisikhi lagi fuk, lego, hiren waluk noli wagalagep mene andoma re hundik-hundik An nelokhoma fikhi lagep mene mondogat werek hilingi'mo re,

⁹ An he hit hinanggo sapi awi wuri'mo werek mene andoma faget namolo welagi fuk, athe hiren hinanggo kambing ai mene andoma misik ekhe iluk ogo namolo welagi legat.

¹⁰ Yi wam ti wam yi mene ti mene enggama welagarek mene andoma re An mene nek werek, nen elokhe yinik yunik o tomkwe welagarek mene andoma mondogat he An mene nek welagarek.

¹¹ Yirue tirue tomkwe welagarek mene andoma ogore An mene nek, nen yi mene ti mene o leikwe eluk welagarek andoma mondogat he An meneat welagarego.

¹² Kweang inom nen kweang elonggoma kwalek werek mene oma inom he, An meneat hilingi'mo re, An nendawimo nele agu halok he, An ti mene nele, iluk hit hinoba yagahisamo re elo'lego.

¹³ An he wam sapi eino wusalek he ninggi lagi lek, Nen kambing amep keralek ogo ninggi lagi legat.

¹⁴ Hiren An nobaget wam yi mene ti mene warogo wo'nesu hak he, An hai warogo wa'neti lagep mene andi wo'neti logoni o, Nen hiren At Lego Mondok welagarek mene hinom wene wati legep mene andi nek tiphogo hilingiti logoni o.

¹⁵ Hit hinoba enggin-fenggin hikhi logolik he An nenu hombuk palhi logoino, Nen An nen hit hinoba fikhalogo hinobagagunem, hiren An fogetnafi logogun.

¹⁶ Oba nen he, ap weak hilingiri'lagwi mene inoba re At Tuhan nen ikhi logolik, ”Hiren An Nawene Melalek a'nogo pilingisogo yanggulhik, nen An nagainafuri wene warisasigi mene a'nogo ugu mondok welagik, hilingiti lagep andoma re hiren hilingisuageluk weregen a? Elo'lego.

¹⁷ Hit he An nen komo wene yagahisikhi lagi mene a'nogo wanhi'legengge logolik, An Nawene Melalek a'nogo ninabit iluk herakfuluk hilingiti lagep.

¹⁸ Hiren ap hinatu mene misik ekhe hineilenggen isaluk he, hirogo at ombo'ne laga lagep. Nen hiren ogore afuni yugunat hilingitarek mene hinom misikwe sebeti lagebat.

¹⁹ Hit hinambeba nen he wene weak mene nek ugu mondok welagebo. Nen hinamelinggen obare hineranhogo wene ugun mene nek laboksek werek.

²⁰ Hiren he it hinagaila'lak mene omanogo sebelogo fisigik, nen hinagaila'lak hinamep lak mene omanogo inabok palhik, hilingitu welagep.

²¹ Andi mene nek hilingitu welagep andiba re, An alokhogo welagi andi faget hiren anggikhi logolik he, At he nit ninom higit anggikhi lagep. Oba nen he, hit hilingik welagep mene faget yogondak An nen yagahisikhi lagi andi, nen andoma mondogat he hiren enek hobagaigiluk An nen weinamet fikhi lagi o.

²² Hit Allah hinonggot a'luk hilingitu welagep mene andoma re futfakhikhi logoni o. An nen hit hinebe alomat hinobagagi hanogo re, it afuni ekhe mene nen hinagap telhinabugun lek hilingi'mo re, kagalek logoni o.

²³ Afuni nen wam yi mene ti mene warogo An nobaget fou hak he, ap andi nen An nalong anggaluk legeisogo nobagakhi logogin andi aro. Nen it ekhe kwe pikhithogo laga logogun mene andi inoba re, inagap telinabigin mene andi re An noba nen inugisikhi logogin o, iluk ikhe.