MAZMUR 5 - Allah Wene Fano Wene Hupla Inane

Nebe nalong palnabin iluk samban ugu mene faget isikhe wene

¹ Afuni nen wuni wulak fuluk pinggong suling oba futhugu kwelek inebe seberogo nen ugunem melalinafu mene faget. Daud awuni.

² Tuhan neisena, an nen nane ikhi lagi mene yi holnafik, nendawi ouen ugu mondok welagi mene yi futnobagagik in o, neisena.

³ Hat he, an noe Raja logolik neisena Allah re Hat welagenma re, an nen nane hoba ikhi lagi mene ari fano anggambik lebetnabin o.

⁴ An nen we Hat neisena Allah hoba nek samban ugu mondok welagimo re, nane hubet yagaheti lagi mene andi hesanggo holnabin o. An nen o hubet hundik-handik samban hoba yagahesi waga lagi mene andi re, Tuhan Haren onggo yagane'nogoluk nenangot hiugu mondok welagi o, neisena.

⁵ Hat Allah re weak kwanirek mene andomaba re habit mondok welagen, ap weak hilingitarek mene re Hat hoba wesu lek hak.

⁶ Hat he ap fogerakhagarek mene andi inelokhoma kwelagisa re habit welagen, nen afuni mondok weak hilingiri'lagwi mene andi faget he haren habsirit fisikhi lagen.

⁷ Hat he afuni ineranhogo wene lalinabi'lagwi mene andoma re mondogat leget fisikhi lagen, Nen, afuni lalinafarek mene inom, inebe pinggi inoatarek mene inom andoma inoba re Haren sebel fisikhi lagen.

⁸ Oba nen he Hat hendawi hundik mondok hokho mene hilingnafi lagen andiba re an Hat hawi wuri'mo elok kwi waga lagi. Hat Hawi Mondok Horek mene a'nogo fikhit neilenggen lourek logolik he neindep awi yagaisogo fogethafi lagi. Nen an nen nendawinggen mondok sebe uluk hapne wanhi lagi.

⁹ Tuhan neisena, afuni an naselei mene re mondok hokho pokhorogo hilingi'mo re. An nen Hat hendawimo anggikhi lagen mene nek hilingiti logouwageluk melalnobagagik, nen kwe yiba lan iluk yaganetik, ikhi logoino o, neisena.

¹⁰ It afuni an naselei mene andoma nen inane agarek mene re eberogo ili'lagwi iluk angga lek hak, it inendawimo re weak mene hilingisugun mene nek peterogo werek. It inane ugunem he, inane pugun pagansek logolik afuni inendawinggen wanu hak, oba nen he, it inendawinggenma re fili mene nek peterek logoligen agarek andi.

¹¹ It inonggwaregen wene melalfuluk hilingiri'lagwi mene andomaba inebe alomat lakhoakhogo re, neisena Allah Haren wene inoba fein o. Iren Hat hane sagalogo fuluk hilingiti logolik weak hilingiri'lagwi mene re mondok hokhorogo hilingik andi nen he, it inebe silogo wulakfisan o.

¹² It afuni Haren hawea'ma fisaluk ferinarek werek mene re inagaiyek haluk, mondok-mondok inanggilugeti logouwak. It afuni Hat hoba inendawi hundik anggaluk hilingiri'lagwi mene andoma re Haren ma'murogo ferinarek logoin, iren Hat faget enek inagaiyegeti logouwak.

¹³ Haren he it afuni Hat hoba nek tiphogo hilingiri'lagwi mene re fanot fisigik, Hat hendawi hundik oba hawe a'ma ferinarek welagik, ikhi lagen andiba o, neisena.