MAZMUR 49 - Allah Wene Fano Wene Hupla Inane

”Afuni inendawinggen inangge yi mene ti meneba himbiret fuluk welagaikharek mene andi re we alomarogo hangge,” iluk wuni watukwa wene

¹ It ekhe nen wuni wati logouwagaluk Ap Korah werekwe mene nen wuni felalogo watukwa wuni.

^2-3 Hit afuni hinunggulenu lombok o yi awi ti awi welagep mene yi, hinesanggo fanorogo holini o! Afuni kembu mene inom, kain mene inom, hinelagaikhogo welagep mene inom, hineilmo wulalhak welagep mene inom, hinesanggo fanorogo holfembik furogo holini o.

⁴ An nendawimo kagalek logolik, wene nendawimo ebeti lagi mene re naneba fakhogo ikhi logogin o.

⁵ Wene obalirogo ugunem elok futfuluk he, an nen wene ebe ti'nogo mene faget aga iluk pinggong wati logolik yagaisikhi logogin o.

⁶ O obabut weak agu sambul afuni nen weak mene noba fuluk noasuogoluk an nebe haningisogo kwelaknobagagunem, nailo lekhogo logolik nendawinggen hambukhogo logogin.

⁷ It afuni andi re, inangge yi mene ti mene hokhorogo werek andi nen he, inendawinggen inonggwarek inoba himbirik logolik fogerakhagarek.

^8-10 It a'nogo hilingitarek mene andi re at ekhe nen are ekhe ebe wa'lagi'lek eluk mondok logouwagaluk aren teligin mondok lego. Allah nen teluagaluk yi mene ti mene onggo wogosigin mene ogore, inebe onggo mondok hokho hilingi'mo re, inom higitsek lego.

¹¹ Afuni yi wene ti wene inelu mene ogore, wa'lagaikharek enek. Kembu inafe morue mene ogore lek agaikharegat. A'nogo hilinglagunem he inangge yi mene ti mene re herakfisaluk lagunem, it ekhe eise agaikharek.

¹² Attak he, it andi ineabu hokhorogo eise welagaukwa, meneat he inebe wa'lagunem salinafarek oba andoma inaiba higit a'luk andomaat mondok-mondok logogun.

¹³ Afuni re yi mene ti mene oba heilarogo welagaikharek andi hak logogun mondok lek, oba nen he, wam yi mene ti mene legagarek andi hak lek asugun o.

¹⁴ Afuni inonggwarek inomameba himbirik welagaikharek mene nen, an nen ugunem enek he fano iluk anggagarek mene andi re, a'nogoat wa'laikharek.

¹⁵ Inanggo wasuogoluk anggomo palogo fisogo welagaikharek higit, it andi re a'nogoat wa'lasugun o. Wa'lagaikhare'ma andoma woginarek lagain. A'nogo meneat he, it fano hilingitarek mene re o hubet werek kwelek inomame asimbik it andi mabenetfisamo, inebe warek he afuni wa'la'luk lagaikharek oba andoma fili asugun o. It inaiba fano logogun oba omanogo herakfisaluk yatmaat asi lambik andomaat logogun.

¹⁶ A'nogo meneat he, Allah nen an nebe telnabigin o, Aren afuni wa'lagaikharek oba andoma nen hele fikhalogo wula'nabi wesigin o.

^17-18 Ap inangge hokhorogo werek mene re inebe wa'lasimbik inangge hokhorogo andoma helaluk logoin lego. Inenggi werek logogun mene andi re salinafarek oba andoma inom logoin lek andi nen he, inangge hokhorogo werek halok he, eige nailo e iluk fogerinabugun lego.

¹⁹ Ap ekhe ebe eluk logolik yi mene ti mene saburikhe halok onggwaregen fogerakhigik, it ekhe nen ogo fogeratik,

²⁰ agarek mene ogo re, at andi re ombalak lagaukwaba andoma inombo'ne lambik o mum oba andoma mondok-mondok logogin aro.

²¹ Afuni inangge yi mene ti mene oba heilarogo welagaikharek andi hak logogun mondok lego, meneat he, wam yi mene ti mene lek agarek andi hak lek asugun aro, iluk wuni watukwa.