MAZMUR 48 - Allah Wene Fano Wene Hupla Inane

Allah awi kota Sion a'nogo

¹ It inunggulenu Korah mene inawuni.

² Nit nineisena Allah Awi kota horek mene andiba re, Ibi eberogo nen At Tuhan ebe lego mondok were'ma, esinet fagarek mene werek.

³ Allah andom Sion oba andi re, eil mondok fanore'ma re wolonghogo liabek. O kota Raja Lego mondok welagarek mene awi andi re, yi afuni ti afuni o kweangma welagaikharek mene nen inagaiyegetarek awi wurik.

⁴ At Allah ebere leget pa'leget wagane'ma elonggoma andoma werek, oba nen he, leget andi re At ebeat waganek logoligen hilingik.

⁵ Yethani, it raja-raja omanogore andogo'luk pin kugun iluk esa fologo weri'lagwingge a'li!

⁶ We'luk, iren punu andi ineilenggen kumut haluk he, inobakheindok palagunem inailo nek a'luk inendawinggen nonghong leil warik lagaikharek.

⁷ Hemi omalik taginabuogeluk heinet watarek hak, nen e so sielu fun hikhi logolik halokhogo weaget fikherek hak,

⁸ it a'nogo omanogo nen inoak leigetu logolik inailo nek a'luk ou hikho welagaikharek.

⁹ Nit ninesanggo holhi lagagu mene a'nogo higithogo re, yogondak niren nineilenggen hikhi lago, At Tuhan Omame Mondok Hokho mene Awi Kota re andi o. Kota andi ebe re nit nineisena Allah awi, Aren ninhup-nanhup o andi faget kagalek mondok werek.

¹⁰ Nineisena Allah, Hat Haiba elonggoma omanogo nen, Haren hendawi hundik hilingninafendek mene andi faget ebetu welago.

¹¹ Hat henu re, o kweangma yi awi ti awi lego were'ma sagarek mondok werek, Haren he katokhogo nek inawene palhu logolik he higithogo nek leberisugu welagen.

¹² Haren afuni Sion mene inom, Yehuda mene inom inaselei mene omanogo inoba unggum wogisikhi lagen andi nen he, it inagaiyegen inanggilugeti logouwak.

¹³ Nen o Sion andi haningisogo kwelakfuluk he, o andi masetik, nen maseti logolik he anum-anum waganogo wurogo liabek mene andi ebe miren iluk wenatik, ino.

¹⁴ Hiren tagomangge mene inoba tindelogo yagaisikhi logobagaigen he, leget pa'leget ebe waganek mene fanorogo futfigik, himbirengge hineilenggen fanorogo kogolhik, ino. Andi nen hiren yi'nogo ikhi logoino:

¹⁵ At andi re Allah, nit nineisena Allah ninhup-nanhup welagarek mene a'nogo ebere andi aro, Arenat nit melalninafu mondok logogin, iluk yagaisikhi logoino o.