MAZMUR 47 - Allah Wene Fano Wene Hupla Inane

”Afuni o kweangma mondogat faget ineisena Raja re Allah aro,” iluk wuni watukwa wene

¹ It ekhe nen wuni wati logouwagaluk, ap Korah werekwe mene nen wuni felalogo watukwa mene.

² At Tuhan andi re ebe Lego Mondok logolik andungdang hokho agun werek. At ebe Raja mondok lego mene o kweangma mondogat he At awe a'ma nek welagorek hilingi'mo re,

³ yago, hit afuni o kweangma welagep mene hinunggulenu lombogen At Allah ba nek, hinendawimo hinagaiyegetik, a'mit suphogo fogeratik, hinenggi tabetik ikhi logoin o.

⁴ Aren he yi afuni ti afuni inunggulenu lombok omanogo nit ninenggiba logouwageluk wo'nisigik, nit ninomame a'ma logouwageluk hilingninobagagik, ikherek.

⁵ Nit Yakub en tagongge mene re, Aren nit ninebe endawit ninafesik, nit ninanggweang eise a'luk logouwagaluk he, wenagaisogo wo'nisasikhemo ninalonghogo welagorek andi o.

⁶ Afuni nen inane a'mit sup igik, pinggong ane hokhorogo aneet higik, ugu kwelek, At Allah re ebe takhta hurek welagarek oba omanogo hu'lasi lagaikherek.

⁷ At Allah faget wuni fogeratarek awuniba wati logoni! Nit nineisena Raja andi faget wuni fogeratu awuni wulafi logoni!

⁸ At Allah re o kweangma yi awi ti awi mondogat inobaget Raja werek. Andi nen he, wuni inendawinggen wanherek awuniba fogerati logoni.

⁹ Allah ebe re takhta hurek welagarek oba hore'ma omanogo logolik, yi afuni ti afuni inunggulenu lombok At awe a'ma fisaluk melalinafu werek.

¹⁰ At Allah andi re yi afuni ti afuni ineisena Raja werek. At ebe mondok kain lego were'ma, Allah againafuri mene Abraham en fogerati lagaikhe mene a'nogo faget, yi kain ti kain o kweangma welagaikharek mene inebe misik sebe'luk wuniba fogeratu were'ma ferinarek mondok werek.