MAZMUR 46 - Allah Wene Fano Wene Hupla Inane

Allah nen aleget waganogo fetninarek welagarek, iluk wuni watukwa wene

¹ Ap Korah werekwe mene nen wuni felalogo Alamot wuni iluk watukwa mene.

² At Allah andi re, nit ninebe At awe a'ma ninobagaluk, fetninarek mondok logolik omame wo'nisikherek. Yi enggin ti enggin hugu were'ma, Aren higithogonek lebetnisikherek.

³ Kweang abolok igin oba nen, yi tom ti tom sunukhogo i laut elema ma'lima pigin oba nen,

⁴ i laut ha'labu esinggen founalek lenggalek lakfei wesigin oba nen, a'nogo hilingiti logolik tom-tom omanogo erak kwerak isagain oba nen, nit he, ninendawinggen abolok igi'lek hambukhogo mondok logogun.

⁵ At Allah ebe awi kota esin legoma welagarek oba i ekhe elesi wulibisogo o kota Tuhan Awi mondok horek mene a'nogoba kwelabi lagunem he, o a'nogo oba fanot fikherek.

⁶ At Allah ebe o andoma welagarek andi nen he, o kota andi, leget fisamo re mondok elo'lek. O hil mogolhu kwelek At ebe we'luk leberisugu mondok logogin.

⁷ At Allah ane unggunggu ane hangge ugunem, afuni o kweangma welagaikharek mene re mondogat inoatik, yi afuni ti afuni inunggulenu lombok Allah ane inesanggo holimbik, inane hokhorogo sagalhik, o inogogwi inenupogoren ferinarek welagaikharekwe omanogo mondogat maben arik lagik, ugun.

⁸ At Tuhan Omame Hokho mene a'nogo nen fetninarek mondok welagarek. Yakub eisena Allah a'nogo nen, nit ninebe at awe a'ma ninobagaluk fetninarek welagarek.

⁹ At Tuhan nen elalin mene o kweangma yoma hilingiterek mene andi kwelakha we'ni!

¹⁰ Yi afuni ti afuni o kweangma mondogat weim yafunem he, Aren legeratik, sikhe togengge mondogat lilibukhogo figik, inebe inoasinogoluk, sige kabelek enggat sugul isigik, inangge kereta weim yafarek mene mondogat endu nolhik, ikherek.

¹¹ A'nogo hilingiti logolik Aren he mel ikherek, ”Weim yafi lagep mene ari re palfeni o. Yi afuni ti afuni o kweangma welagep mene hineisena Tuhan Allah esin mondok mene re, we An namuat welagirek andi nen he, tukhumhogo fut nobagani o,” iluk ikherek.

¹² At Tuhan Omame Hokho mene a'nogo nen fetninarek mondok welagarek. Yakub eisena Allah a'nogo nen, aleget waganogo fetninarek welagarek, iluk wuni watukwa.