MAZMUR 45 - Allah Wene Fano Wene Hupla Inane

At raja agwe helugunem seni isati logolik wuni watarek mene yi'nogo

¹ Wuni it inunggulenu Korah mene nen inendawi hundik hilingiti logolik watu mene faget felalhukwa mene. Afuni nen wuni wulak fuluk inane seberogo ugunem yanggulinafu mene faget, unggut seberogo agarek wuni enu Bunga Bakung iluk ikhi lagaukwa.

² An nane pugun paganhogo nendawimo nen lagai wagunem ikhi lagi mene andoma re, at raja faget ikhi lagi o. Ap wuni kogalek awuni felalhi lagaukwa mene mondok inendawi kagalek mene nen lisu palu hak, an namelinggen oba nen kogalek awuni nek foukhogo welagi o.

³ Yi afuni ti afuni mondogat werek mene andoma inanggele'ma nen he, harenek he heil alili fano pugunsek mene welagen, hane ugunem he mondok fano mene nek ikhi lagen, andiba re At Allah nen fanot hobagaikhe mene andi, a'nogoat mondok hilingik logouwak.

⁴ Hat ap raja handungdang werek hagun yi re, henggarok halugagiba kelan o, nen hat hebe mondok lego logolik elalin agun welagen!

⁵ Hane liolek oba katokhogo tegetik, nen eberogo weneba nek tipsek logouwageluk ninget figik, hilingfuluk he, hat hebe halong-palonghogo hilingfuluk homame asigin mene faget ninghogo hilingiti logoin. Nen elalin hilingiti lagen andomaba re hat homame hokho mene logouwageluk telogo fakhano o!

⁶ Hat handok enggat werelek kabuk mene andi nen he, it haselei mene omanogo inendawinggen kagaukhogo inoati lagen, nen inunggulenu lombok omanogo re hat heisok eroma nek warogo taik ili'lagwi.

⁷ Haren ferinarek logouwageluk At Allah nen homame wokheterek, hat homame andi re mondok-mondok logouwak, haren he mondok katokhogo nek it hagainafuri melalinafi lagen.

⁸ Haren weak mene faget habiret fuluk he, eberogo wene faget enek he hamukhirek logolik welagen, andiba re At Allah, hat heisena Allah a'nogo nen hebe wenak hafesik, it raja-raja omanogo elo'lek hak werek kwelek, harenek he mondok fanot hobagaikhe andi.

⁹ Hat hasu ugu mene re amusu mur inom, gaharu inom, cendana inom, amben mondok fano mene sangeri'lago. Nen hat hawi istana gading andimuk oba nek wuri'mo, hat hebere it pinggong watu inaben watunem hagaiyegeti lagen.

¹⁰ O sili at raja werek oba andi helime silerik mene inanggele'ma re at raja a'logomi andoma kaboksek. Nen at raja hurek werek oba takhta enggi pikhit kwe a'nogo re at raja agwe ebene emas meneba nek alilingge li'louksek engge a'nogo mendek werek.

¹¹ A'nogo logolik mel ikherek, yago hat hele yi re, an nane ikhi lagi mene yi hesanggo holin o, it hat hunggulenu mene inom, hat werekwe mene inom, andoma inoba honggoret fisan o.

¹² Hat heil alili fano mondok andi nen, at raja a'nogo endawi wanhi lagen, at andi re hat hoe hiling'mo re at a'ma sebe in o.

¹³ It afuni o Tirus mene nen he, hat hobaget yi mene ti mene waluk kabogesi waga logolik, it inenggi werek inaben he hat hendawinggen wanugun iluk hilingisugun o.

¹⁴ At raja a'logo a'nogo re mondok enak fenakhogo abunugerik kwikherek, nen at asu re emas meneba nek kwagonggeba laberogo kwikherek.

¹⁵ At asu eil yinik-hunik mene labere'ma at ebe hophogo waluk raja were'ma fei lagaikharek, nen at ebere it egebi helime silerik mene omanogo nen enek waluk fei lagaikharek. Nen it andoma mondogat he we at raja obaget enek kwi lagaikharek.

¹⁶ Hele a'nogo waluk at raja awi silimo kwi laga logolik he, iren inagaiyek oba anggilugerik fei kwagarek!

¹⁷ Hat he, an noe raja welagen, it hambu hombalak kain mendek logolik hurek welagaukwa mene takhta a'nogoba hurek logouwageluk haren hamlogomi ap hokhorogo taginabigin, it inebe re afuni o kweangma yoma mondogat faget inenu werek mene logouwageluk haren menfisagain o.

¹⁸ Wuni yiba re ninhup-nanhup logogun oba andoma an nen hat legeisogo hobagakhi logogin, nen it ap inunggulenu lombogen ogore mondok-mondok andoma harenek fogethafu logogun.