MAZMUR 44 - Allah Wene Fano Wene Hupla Inane

Fetnarek logouwageluk samban isikhe wene

¹ It inunggulenu Korah mene inawuni, afuni yagaisikhi logolik agarek mene, it afuni nen wuni wulak fuluk inebe seberogo ugunem yanggulinafarek mene faget.

² Nineisena Allah Haren o attak hilingitigin mene andoma inom yi mene ti mene elalhigin mene andoma inom faget, it ninambu ninombalagen a'nogo hilingitikhe iluk it welagaukwaba andoma tindelhunem nit ninebe lombogen mondogat ninesanggo holhugu aro.

³ It Hat hagainafuri mene it ekhe inunggulenu amu mene inanggweang oba andoma logouwageluk he, Harenat mugusogo wulak fisasigin o. It afuni inunggulenu amu mene re Haren it inebe alomat fisikhi lagagin oba nen he, it hat hagainafuri mene nek he inebe saga ilik laga logouwageluk hilinginafi lagagin.

⁴ It hagainafuri o Haren wogisasigin oba andi sebeli kuageluk he it inonggwarek inomameba sebeli kwisukwa lek, posie karok ambisangma legat, oba nen he, Hat homame hokho welagen a'nogoba inom, Hat hebe haselek oba waga lagen a'nogoba inom, it Hat hagainafuri faget hendawirinapluk leberisikhi lagagin.

⁵ It Hat hagainafuri Yakub ambisangmangge meneba inalonget fisikhi lagen mene noe Raja neisena Allah re Hat hamu welagen.

⁶ Hat homameba nek niren it ninaselei mene mabenet fisikhi lago, Nen it afuni nit ninoasuogeluk hou sali weri'lagwi mene re niren sigip sogophogo inoati lago.

⁷ An he nonggwarek nasikheba nendawinggen himbirik welagi lek, nen an nenggarogen he nagap telnabu lek hak.

⁸ Oba nen he, neisena Harenat it ninaselei mene inoba nen telogo ninobagakhi lagen, Nen ap nit faget inabiret ninobagali'lagwi mene omanogo leget fisikhi lagen.

⁹ Andiba re, niren hundik-handik Hat hai wathafik, fogethafik ikhi logogun,

¹⁰ Oba nen he, yogondak he haren oboget nisegen, nit ninomame leget ninobagauwageluk herak ninobagegen. Nen Hat he nit weim yabuogeluk logalhunem a'nogo ninom laga lagen lek.

¹¹ It ninaselei mene inoba ninailo a'luk heise pugulik-pagalik uageluk hilingninobagegen, Nen iren he nit ninangge yi mene ti mene omanogo mondogat telaga.

¹² Haren he nit ninebe wam domba warogo senggeluogeluk senetarek a'nogo hak, nit ninebe sen ninabuageluk oboget nisegen, nen Haren it afuni inunggulenu mene werekwe omanogo hesangge pesangge hilingninobagegen.

¹³ Nit hagainafuri omanogo we onggo legat endep meneba wokninafigin. Nen a'nogo hilingitigin oba ambisangma ebe agaikhe mondok lek.

¹⁴ It afuni nit ninom horok-horokwe werek mene nen ninom eilhogo puliapninafi logouwageluk hilingninobagegen. Nen iren he endo yagaisogo ninobagagik, asegen wo'ninafik ili'lagwi andi.

¹⁵ Haren he nit ninebe afuni inunggulenu amu mene omanogo inambeba nen weak peakhogo hilingninafi logouwageluk hilingninobagegen, iren he inunggul kwanit haluk he nit sebelninobagaluk seramet ninobagali'lagwi.

^16-17 Linggene hundik-hundik an nobaget yiginik tiginik iluk yaganeti logolik, it naselei mene nen inom, nen it wene inendawimo sebelek logolik werek mene andoma nen inom, puliap nobagaluk hilingitunem he an nenggali hikhi logolik nelokhe wamborogo welagi o.

¹⁸ Niren Hat hoba ninonggot aga lek oba nen, athe Hat ninom wene wat-wat agagu mene a'nogo taganhogo hilingito lek oba nen he, andoma mondogat he nit ninoba nek asi weri'lago.

¹⁹ Nit ninendawimo re Hat hoba ninonggot aga lago mondok lego, Hat hawene melalek omanogoba nen higilogo esanggomat fikhi lago legaro.

²⁰ A'nogo meneba nen he, Haren nit a'nogo mum anggele'ma ninobagagik, yi mene ti mene aik palinaferek mene anggele'ma ninobagagik egen.

²¹ Niren ambi Allah nit nineisena a'nogo fogerati'legengge nen, niren allah amu mene hilingfuluk fogeratarek mene omanogoba fogerati logoumo nen he,

²² At Allah re, nit ninendawimo nen hinagaisogo ebeti lago mene ogore mondogat weinam enek nisili'lagoma re, At Allah nen fut ninobagau hagaro.

²³ Niren Hat hobaget enek hilingitunem he, nit ninebe nineiloak leget ninabuogeluk ili'lagwi, nen wam domba wasuogeluk mene higit hilingninobagali'lagwi.

²⁴ Tuhan neisena nenahalok nogogu welagen? Heluk ame o, Hat yogondak heluk asimbik he nit logogun oba andoma mondok-mondok hera'ninobagambik logou fugo.

²⁵ Nen nit ninoba enggin-fenggin hikhi logolik inom, ninelagaikhogo logolik inom yagahetu werek kwelek omare Hat he ninggi'nogoluk hinago welagen nogo?

²⁶ Nit he mondok ninomame leget ninobagagunem wul oba wengik welago, ninebe kweangma pelakninobagagunem welago.

²⁷ Hat hebe menlasimbik he nit lebetninabime o, neisena, Hat hendawi hundik hilingninafi lagen mene a'nogoba telninabime o, iluk samban isikhe.