MAZMUR 43 - Allah Wene Fano Wene Hupla Inane

Hele warogo huginabi lagaukwaba logolik samban ikhi lagaukwa wene

(Mazmur 42 mene wurep lisogo)

¹ It inobabut weak mene nen, ”At weak hilingitemo,” iluk wene noba fugunem he, neisena Allah Haren he, ”At weak hilingiti'lek,” iluk wene noba korogo wokhano o. It afuni inobabut weak hilingitarek mene nen he, an nebe lalnabuogoluk weagetnafik, ineranen wene yaganetik, ugu halok he, Hat hebe an werekwe asimbik telnabino o.

² Neisena Allah, hawe a'ma fetnarek welagen mene, nenahalok haren herak nobagakhi lagen? An naselei mene nen he, yi enggin ti enggin noba fugunem, nendawimo le agu logouwagaluk, nenahalok it inenggiba nobagakhi lagen?

³ ”An nambotkwe honggwarek handom Sion oba, Hat hawi wuri'mo welagen oba andoma lagen he, Hat hobabut fano enago a'nogo nen, hebe esage hangge seleget nabi wesimbik wo'narek lanogen,” iluk hayonggo fikhi lagi.

⁴ An nebe Hat faget mezbah wam yi mene ti mene warogo nolhetarek oba andoma nen an nendawimo nagaiyek higirek mene re, Hat hebeat welagen andi nen he nendawimo hokhorogo nagaiyek hikhi lagi mene andi, pinggong aneba fogethafi logogin o. A'nogo hilingiti logolik, neisena Allah, neisena Allah, iluk hai wathafik, fogethafik, ikhi logoigeluk yagaheti lagi o.

⁵ An nendawimo warikhi logolik, fenggekhugu mondok logogin andi re nenahalok nogo? Haren telnabigin iluk hoba eberek logogin. A'nogo telnafunem hobuk neisena Allah telnafendek mene hai wathafik, fogethafik, iginat anggikhi lagi o, iluk wuni watikhe.