MAZMUR 42 - Allah Wene Fano Wene Hupla Inane

BUKU PIRENEK MENE: MAZMUR 42–72 Hele warogo woginarek lagaukwama logolik samban ikhi lagaukwa mene faget

¹ Ap Korah werekwe mene nen wuni felalogo watukwa mene.

² Allah neisena, no rusa agai nele nen endawimo age lagagunem heinet watherek andi hak, an nendawinggen Hat hoba nunggunem welagi o.

³ An he Allah heluk welagen mene nendawinggen nunggunem Hoba eberek welagi o. Mera nen an Hat haiba wesimbik Hat hobaget hilingisigin nogo?

⁴ Lingge hundik, hup hundik le mondok aga logolik, sumburu nenggarek andi hak, le filirogo aga lagi o. Hundik-hundik it naselei mene omanogo nen yaganeti logolik he, ”Heisena Allah ebe koma werek,” iluk yaganeri'lagwi.

⁵ O attak afuni inebe hokhorogo andogosuogeluk lagunem, At Tuhan Awi wuri'mo laga logolik, it afuni esa logalogo lagu kwelek attak laga logolik, wuni At fogeratarek awuni watik, nagaiyegetik, hilingirik laga-lagagi mene aremnogo ebet haluk he, an nendawimo mondok heiselhi lagi o.

⁶ An nenahalok nendawimo warikhi logolik weak logogin nogo? Haren telnabigin iluk, hoba eberek mondok logogin o. A'nogo telnafunem, hobuk neisena Allah telnafendek mene hai wathafik fogethafik, iginat anggikhi lagi o.

^7-8 Nit ninebe afuni nen, wo'ninarek wagaukwama, ap inaiba yoma logolik, nendawinggen warugu welagirek, nendawimo weak agu welagirek. Andi nen an nendawimo nen he, Tuhan hoba ebetu mondok welagi o. Tom Hermon oba nen inom, Mizar oba nen inom i Yordan fanggongkwe fu aninirogo waga logolik ane tungetunem hikhi lagi andi hak weak noba mondok agunem, nendawimo mondok weak welagik, nendawimo heiselhik, igirego.

⁹ Andi nen he, o hubanggo an nen Allah eluk ero a'nogoba wuni watik, samban igik, ikhi logogin nen he, We At Tuhan nen enek o linggene werek kwelek endawi hundik hilingnaferek mene a'nogo inuk niikhi logouwago.

¹⁰ Allah an werekwe agendek mene a'nogo hoba nane yagaheti lagi o. ”Nenahalok Haren an noba honggoret nobagegen nogo? It naselei mene nen he, yi enggin ti enggin hilingnafunem an nendawinggen mondok weak ari'lago andi nenahalok?”

¹¹ It naselei mene nen, an hundik-hundik yaganeti logolik he, ”Allah haren fogerati lagen mene a'nogo koma werek?” iluk yaganetu mondok were'ma re, an nendawinggen warikhi lagi o.

¹² An nendawimo warugu logolik, fenggekhugu logogin andi re nenahalok nogo? Haren telnabigin iluk, hoba eberek logogin. A'nogo telnafunem, hobuk neisena Allah telnafendek mene hai wathafik fogethafik, iginat anggikhi lagi o, iluk wuni watikhe.