MAZMUR 41 - Allah Wene Fano Wene Hupla Inane

Fano hilingnabin iluk samban isikhe mene

¹ Afuni nen wuni wulak fuluk inebe ambine seberogo ugunem yanggulinafu mene faget Daud awuni a'nogo.

² Afuni nen it ekhe inenggi lek were'ma fut fisagarek mene andi re, inagaiyek hikhi logouwak. At Tuhan nen he ap andi oba nonghonghogo were'ma lebethikhi logogin.

³ At Tuhan nen at ebe kagalek welagik, halogo figik ikhi logogin, Aren at ebe o kweangma were'ma fanot fikhi logogin, nen Aren at ebe aselei mene inenggiba fikhi logogin mondok lek.

⁴ At ebe ou were'ma Tuhan nen lebethikhi logogin, nen oba ou logogin mene a'nogo fanot fikhi logogin.

⁵ An nen ikhi logolik he, ”Tuhan neisena, an he Hat hoba weak hilingiti lagimo re, Haren hendawi nealuk an nebe fano hilingnabin o,” iluk ikhi lagi.

⁶ It naselei mene nen he an nobaget inane weak hokhorogo yaganetu werek, it inendawimo nen he at ebe wa'lagunem ninonggot a'lo agwi, anggili'lagwi.

⁷ Afuni an kwelaknea weri'lagwi mene andoma re, inendawinggen hebelek mene re fuk. Iren he obakhebaat wene hinakhigik kaboge'luk he, an nobaget yi kwe ti kwe wialik lili'lagwi.

⁸ It an inabiret nobabagarek mene andoma mondogaren he inane komo-komo agaresik he, iren an nebe alomat nobagagun mene faget ugu werek.

⁹ Iren ikhi loglik he, ”At oba ou a'nogo re mondok enggin se'ma re, inganghogo menlasu lek hak,” ili'lagwi.

¹⁰ Nen we ap an ninom hundik mene nen ogore wene a'nogo u lek hak anggikhi lagi mene nen inom, nen it sumburu an naiba ninom misi'mo nili'lagwi mene nen inomen ogore an a'nogo nek sebel nobagali'lagwi o.

¹¹ It naselei mene nen weak mondok noba fili'lagwi mene andi an nen ogo onggo it inoba a'nogo hilingfisagain nen he, Tuhan neisena, Haren hendawi hundik nabimbik, an noba fano hilingnobagain o.

¹² Nen an nebe it naselei mene nen mabenet nobagagu lek halok he, andiba Haren an hendawi hundik hilingnarek welagen mene a'nogo nelu asigin o.

¹³ An nendawinggen sebel fakhaluk welagi andiba re Haren an lebetniikhi lagen, nen an nebe Hat ninom mondok-mondok logouwageluk hilingnobagakhi lagen.

¹⁴ Tuhan Allah it afuni Israel mene ineisena andi nek, fogeratu mondok logogun! O yogondak huli nen hobuk mondok-mondok andoma hulire Arenek fogeratu mondok logogun!