MAZMUR 40 - Allah Wene Fano Wene Hupla Inane

Samban oba Allah hai watik, kino yagatik, isikhe wene

¹ Afuni nen wuni wulak fuluk inebe seberogo ugunem melalinafu mene faget, at Daud awuni a'nogo.

Samban oba Allah hai watikhe wene

² An nendawinggen hambuk haluk logolik Tuhan nen lebetnabi wesuageluk nenangorogo were'ma, Aren an nebe fut nobagagik, nane esanggo holhik, ikherek.

³ Kilingelema wea'ma andoma higit were'ma nen fesi mondok lou'lakse'ma andoma higit were'ma Aren lisogo wo'nafesik, neisok helep oba fanoma andoma fanorogo fuluk laga logouwageluk nobagaikhemo welagi o.

⁴ An nen wuni ket mene wati logolik, wuni nit nineisena Allah a'nogo fogeratu awuniba fogerati logouwageluk, Aren yaganeterek. Afuni mondogaren ineilenggen nealuk inailo a'luk he, inendawinggen Tuhan oba tibet fogoin o.

⁵ It afuni ekhe Tuhan hoba himbirik logolik, tugwi kembu fogeratarek lek mene inom, it ekhe leget fakhagarek mene nen inebe telinabuageluk inayonggo fagarek lek mene inom, andoma re, hobuk inendawimo inagaiyek asugun o.

⁶ Tuhan neisena, Haren elalin mene hokhorogo hilingninafi lagen. Neisena Tuhan Allah, Hat hinom higit mene re ekhe werek lego. Haren yi'nogo ti'nogo elalin mene nit faget hilingninobagagin mene mondok hokhorogo melalogo fegenma werek. Niren wene andoma mondogat pilingisumo re, elo'lego.

⁷ Haren he, wam yi mene ti mene hobagagarek mene andi re habit welagen. Nolhetarek mene andi inom, ninaweak leget fouwageluk wam warogo nolhetarek mene andi inom he, Haren kinoti lagen legat. A'nogo meneat he, Hat hane an nesanggo holhi logouwagaluk, wo'neten.

⁸ Andi nen an nen ikhi logolik he, ”Eberogo an waga lagi, buku yinggilik mene andiba re an nobaget palek werek.

⁹ Allah neisena, an he Hat hamolo anggikhi lagen mene andoma hilingitu mene faget he nagaiyek anggikhi lagi o, Hat hawene melalek a'nogo an nendawimo fakhigirik welagi o,” iluk ikhi lagi.

¹⁰ It Hat hagainarufi andogorek were'ma, telninafendek wene ninendawimo inagaiyek asugun mene andi nenggi ekhe kamo igi'lek yagahisugu mondok welagirek andi mondogat he helu welagen o.

¹¹ Hat hobabut fano nen, telninafigin wene andi, an nendawimo hinati'lek, hagainafuri fakhogo yagaisikhi logolik, ”At ebe nit ninoba lombokhogo mondok logolik, lebetnisugu welagarego. Nen ninebe endawi hundigen wene watnisikherek mene andi, ekhe sugi agarek lego,” iluk yagaisikhi lagi.

¹² Tuhan neisena, an obokhogo hera'nobagagi'lek hendawit nafu logoino o. Hat hawe a'ma lombokhogo nobagaluk hendawirogo fetnarek mondok logoino o, iluk wuni watikhe.

Allah nen telnabuageluk samban isikhe wene

¹³ An weaget nabugun mene re nenggi wenasu mondok elo'lego, nabel fena-fena walingisi we'luk werek. Nen an nen weak hilingitirek mene andi re, nesi nungguloa'ma andoma endebat hangge meneat he, naweak mondok hokhorogo werego, a'nogo were'ma mu'narek nikho andi. Andi nen he an nen neilenggen ha re elo'lego. An nebe nobakheindok palagarik he, an nen hilingisu re, elo'lek ari'lago andi.

¹⁴ Tuhan neisena, weak-weagat an nebe telnabin o, an nebe weak-weak lebetnean o!

¹⁵ It ekhe an noasuogoluk hilingiri'lagwi mene andi re Haren inendawinggen nonghonget fisambik, mabenet fisan o. An weak welagi mene faget nawuni wari'lagwi mene andi, inenggali mondok hoagaluk, inambotkwe warogo lakfisan o.

¹⁶ Afuni an endo ya'nabi'lagwi mene andoma re inailo mondok a'luk, inenggali asuago.

¹⁷ It hat fogethafarek mene andoma mondogaren he inendawimo hai higik, inagaiyegetik ugu mondok logouwago. Nen it telninafendek mene andi inagaiyek mene nen he, nineisena Tuhan andi re esin mondok werego iluk ugu mondok logouwago.

¹⁸ An yi re, nenggi lek logolik nomame mondok lek mene o. A'nogo meneat he, neisena Tuhan nen nebe heil wo'nafik, lebetniigik, ikhi logolik telnafendek mene welagenma re, aninurogo wela'lugen telnafun o, Weak-weagat telnabime o, iluk wuni watikhe.