MAZMUR 4 - Allah Wene Fano Wene Hupla Inane

Hubanggo samban agarek mene faget isikhe wene

¹ Afuni nen wuni wulak fuluk pinggong kecapi watu kwelek inebe seberogo ugunem melalinafarek mene faget Daud awuni yi.

² Neisena Allah an nili wo'nafu mene re Hat hamunek welagenma re, an nen Hat henu ugu halok he, Hane onggo yaganeti logoino o. An nobakhe palek were'ma Harenat lebetnafi lagenma re, yogondak an nen samban ikhi lagi mene yi nane hesanggo holfembik he hendawit nabin o.

³ Yago, hit afuni nen Allah enu sebelogo fugu welagep mene andi ki huli nen a'nogo nek hilingitu logogun nogo? Ka huliba hiren we hesangge mene faget enek hinendawi hundik hilingitik, eberogo lek mene faget murok lagik, hilingiti logogun nogo?

⁴ Hit he hinelurogo logoino o, Tuhan nen At onggwarek faget, ap Aren endawi hundik anggikherek mene ekhe wenagaisogo fakhasikhe. Nen, an nen At oba nane yagatu halok he, At Tuhan nen esanggo holnaferek.

⁵ Hinailo nen hinoak leigesugun oba nen he weak ekhe inom hilingisu fugo. Hit hinebe nogokhi lagep oba wengik logolik he, hinane igi'lek logolik hinendawimo nenat fanorogo ebeti logoni.

⁶ Tuhan faget fano mene nek wogosi we'luk, hinendawinggen At oba tibet fuluk logoni.

⁷ Afuni hokhorogo nen heinok wok-wok aga logolik he, ”Ap sa nen nit fanot ninobagagin nogo?” iluk ili'lagwi mene andoma re Tuhan neisena, we Hat haselek a'nogoba nek selegetninafi logoino, neisena.

⁸ Afuni nen inangge enggen palikhi logolik inendawimo inagaiyegetarek mene andi re maben hak oba nen he, an he nendawimo Haren mondok nagaiyek hokho mene kwelaknobagakhi lagen.

⁹ Tuhan neisena, we Harenat an nebe nailo legengge nambong serogo logouwageluk hilingnobagagunem he, an nebe weing la'luk nogo homokhogo ugu welagirego.