MAZMUR 39 - Allah Wene Fano Wene Hupla Inane

Afuni inoba ou pourogo logolik fagetarek wene

¹ Afuni nen wuni wulak fuluk inebe ambine ugunem melalinafarek mene faget, Yedutun faget, Daud en watikhe awuni.

² An nen wenggel hikhi logolik he, ”An namelinggen oba nen weak hilingiti hanogoluk nonggwaregen fanorogo kagalek logogin, afuni weak hilingitarek mene an horokhogo werek sambul he, an he nane igi'lek weat logogin,” iluk ikhi lagi.

³ A'nogo igiresik he, nendawimo heiselhunen an nane igi'lek peget fisaluk logolik he, an nen fano mene omanogo obogerisaluk hilingiti'lek welagi. Nen an noba ou hikhi lagi mene a'nogo ekhe inom enggin asi wagunem hikhi lagiat.

⁴ Nen an nendawimo enggin hokho mene fitlasi weri'lago. Hilinglagu mene a'nogo wenggelhagain iluk hilingitunem he, nendawimo ekhe inom enggin mene nek asi weri'lago, a'nogo nek agu nen he ambisangma an nen ikhi logolik he,

⁵ ”Tuhan neisena, an nebe neluk welagi mene yi huli kiba werek iluk nelu asuageluk he, an nebe kiba legasigin andi yaganom o,” iluk ikhi lagi.

⁶ An nebe umur neluk welagi mene ari re Haren we mondok horokhogo enogo fegen! An neluk welagi mene ari faget he, Haren he amungge weak-weak legagarek andi hakhogo hilingik welagen. Eberogo nenat he, afuni ineluk andi re inele age futhugunem hangge hilingik,

⁷ ineluk he afuni inafumak furunghogo lagarek andi hak werek. Afuni nen yi'nogo ti'nogo hilingiri'lagwi mene andoma re we elama faget hilingiri'lagwi. Aren angge yi mene ti mene kabogerik lagaikherek oba nen he andoma ebe ap ti nen ninggik heligik ikhi logogin iluk mel onggorengge nen hilingiterek.

⁸ Tuhan neisena, an nen Hat hoba nena mene faget nenangot hikhi logogin nogo? We Hat oba nek an nendawinggen eberek welagi o.

⁹ An naweak omanogoba nen lologo nobagain, an ap kembu mene nen li'not nafungge hilingnobagau fugo.

¹⁰ Hat honggwaregen komotnafi lagenma re, an nane igi'lek nambe to'morogo logogin o.

¹¹ Haren yei warek oba an mondok wa'lasu hak hilingiti lagarik he unggum an noba fesigin mene andi Haren korogo leget fein o.

¹² Afuni re it inaweak hilingitarek onggo Haren unggum inoba figik, kotik, ikhi lagen, eberogo nen he nit afuni andi re heleage futhugunem hangge welago. Nen, Haren mumlel alperel isagarek higit perelisamo nen he, at oba elokhe pugunsek mene ekhe logou hak nogo? Elo'lego.

¹³ Neisena Tuhan, an nen samban ikhi lagi nane hesanggo holin o, an nen Hat hoba kino yagaheti lagi mene andi fut nobagain o, an le agunem Hat he aloksek logou fuk. It ninambu ninombalak we elama faget welagaukwa hakhogo, an ogore we elama faget Hat hoba hobalek welagi o.

¹⁴ An nebe yoma logogin le'ma, oan lagi'lek were'ma ya re, an nen we endep ekhe nagaiyek hikhi logoiyogen he, an nane yingnabu fugo.