MAZMUR 38 - Allah Wene Fano Wene Hupla Inane

Inoba ou logolik samban agarek wene

¹ At Daud en endawinggen wenggelogo iluk wam warogo Tuhan obaget fikhi logolik isikhe mene Daud awuni a'nogo.

² Tuhan neisena, an he Hat homameba unggum wo'nesu fugo, nen ha'mageba an nebe noasu fugaro.

³ Hat handok pisinghogo re an nebeba kwi waga, Hat henggi omameba perelniikhi lagen mene andi re mondok enggin se'ma hikhi lagi o.

⁴ Hat ha'mage an noba fugunem he an noba ou mondok weakhogo hugu welagi, an naweagen he nebeba mondogat selek ekhe werek lek.

⁵ I fu nen sebelinaferek hakhogo an naweak anggele'ma ubukhogo kwigirik welagi, naweak enggin he leget ha mondok elo'lek.

⁶ An nen mondok nonghonghogo hilingiti lagi andi nen he, nebene noumo omanogo re kurele wulifi logolik, amben mondok palogo wulibi'logo.

⁷ Linggene inukhogo nendawimo warugu mondok logolik he nelokhe heiselogo kunggukhogo pelabek logolik welagi.

⁸ Nebene aganhan engge nen he agesabu fulunghogo re, noba selek ekhe werek lek.

⁹ An nebe nomame mondogat lek aga logolik he noba liongorogo taik ugunem welagi, nendawinggen ou en he mondok neneik yabati lagi.

¹⁰ Tuhan neisena, an namolo anggikhi lagi mene andi re Hat helu mondok welagen o, an noba ou pou hikhi logolik yagaheti lagi mene andi re Hat helokhoma ekhe hinago werek lek.

¹¹ Nendawimo pong-pongenggeti logolik, nomame mondogat lek aga, neilenggen he mondogat mum agunem welagi.

¹² It an narugwi mene inom, nori nagaila'lak namep mene inomen he, an noba ou welagi mene kwelaknealuk he agaiset nabi'lagwi. It nogogwi nagoromi meneba nen ogore an nagaiserogo lili'lagwiat.

¹³ Ap an noasugun iluk anggagarek mene nen he an nobaget hele yebet nobagali'lagwi, nen an nebe alomat nobagaluk neiloak leget nobagauwogeluk he, inane waletu mondok werek.

¹⁴ Oba nen he, an yi re ap inesanggo tagum mene nen inane holharek lek a'nogo hak welagi, ap inane hebul larek mene nen inane agarek lek a'nogo hak hilingik welagi.

¹⁵ Ibi-eberogo an he ap inesanggo tagum mene hak hilingik logolik he, andiba re an nen onggo ikhi lagi lek.

¹⁶ Oba nen he Tuhan neisena, an he we Hat hoba nek nendawinggen tipsek logolik welagi, nen Tuhan Allah Harenat an onggo yaganeti lagen.

¹⁷ An nebe nonghonghogo welagi mene andi re, it naselei mene nen ineil neambik inagaiyek asuageluk herak fisa fuk. An neisok omame lek a'luk talo-talonggetu halok iren inaneba weregabesi nogoluk heraknobagagun o.

¹⁸ Hundik-hundik ou wanhi logolik he, an nebe warogo weinglasu hak hilingiti lagi.

¹⁹ An nen taganhogo hilingiti mene omanogo faget ebetu logolik nendawi fit lagunem he, an nen naweak omanogo fageti lagi.

²⁰ It ap an ninom minggilik logolik hilingiri'lagwi mene re inebe hokhorogo logolik inomame ogo hokhoregat, iren an nebe welagi mene faget inabit noba fili'lagwi.

²¹ An nen fano mene nek hilingiti lagimo re, ap weak mene hilingitunem hebekhogo fano hilingfisugu mene omanogo nen an naselei mene hangge ari'lagwi.

²² Tuhan neisena, an nobagaluk la fugo, neisena Allah an welagiba yoma nen Hat hebe yatma asi la fugo.

²³ Tuhan neisena, Hat hebe an nagap telogo nobagagu mene welagenma re weak-weak we'luk an lebetneame o.