MAZMUR 37 - Allah Wene Fano Wene Hupla Inane

Afuni inobabut fano hilingitarek mene inom weak hilingitarek mene inom ambisangma hilinginabigin wene

^1-2 Afuni weak hilingitarek mene andi re, inebe engga higit weak-weagat legagik, nen engga ket mene sawet agarek andi hak, hilinglasugun andi nen he, it weak hilingitunem, hinendawinggen warigik, hinamage inoba figik, u fugo.

³ Hinendawinggen Tuhan oba himbirik logolik he, fano mene nek hilingiti lo goino. Hinebe hinawi welagep oba andiat logolik he, hinobabut higithogo nek hilingiti logoino.

⁴ Fano mene helaluk inendawimo inagaiyek agarek andi hak, Allah ebe baat hinendawimo hinagaiyekhogo logoino. A'nogo hilingiti logogun halok, hinendawimo hinamolo anggikhi lagep mene wokhisagain aro.

⁵ Hit hinebe hineluk hineisena Tuhan woge'luk hinendawinggen At oba tibetfuluk logogun halok, hinendawimo ebesugun mene andoma mondogat he Aren wokhisagain werego.

⁶ Nen hiren tiphogo nek hilingiti logogun mene andi re o selek andi hak hilinghinobagakhi logogin, nen hinobabut kuluk mene hakhogo hilingiti logogun mene andi re o linggene liarek andi hakhogo liathinafi logogin.

⁷ Hit hinendawinggen hambuget haluk logolik hineisena Tuhan serogo logoino, Aren hilingisigin mene oan werek kwelek hinafe morogo serogo logoino. Afuni nen hilingitunem ambisangma fano asigin mene faget hinendawinggen abolok u fuk.

⁸ Hiren hina'mage lagaluk hinendawimo het-pet u fuk, A'nogo hilinghinabigin andi re weaget hinabigiluk hilinghinabigin.

⁹ Afuni inobabut weak hilingiri'lagwi mene re mondogat leget fisagain, oba nen he, afuni Tuhan oba inendawinggen tipsek logolik werek mene re kweang Aren wogisikhe mene andi eiserogo logolik fisogo logogun.

¹⁰ It afuni inobabut weak hilingitarek mene andi, inebe weak-weagat legasumo, heraginabugun mene re inebe isogoin mondok lek.

¹¹ Oba nen it afuni inendawinggen sebe iluk logogun mene re, kweang andi eise asimbik logolik he, fano mene hokhorogo oba heilarogo helikhi logogun o.

¹² Afuni inobabut weak hilingitarek mene andi nen, wene weak mene afuni fano hilingitarek mene inoba fuluk, ineilenggen inabit oba kumurisagarek.

¹³ A'nogo hilingitarek meneat he, At Tuhan nen elugun oba hilinginabigin mene horogat asi waga andi nen he, it inaendo hokhorogo yaginaferek.

¹⁴ It afuni inobabut weak hilingitarek mene andi nen, it ekhe yi enggin ti enggin higik, inelagaik welagik, nen it ekhe inobabut fano hilingitarek mene weagerinafik, inebe inoatik, uogeluk he, inenggarok awinggaba nen lisogo wanhik, inasikhe enggela litik, agarego.

¹⁵ A'nogo meneat he, afuni inobabut weak mene andi re, inonggwaregen inenggarok oba lisogo inebe warigik, inasikhe falelogo figik ugun werego.

¹⁶ Afuni inobabut weak mene nen inangge hokho-pokhorogo were'ma hilingiri'lagwi mene andoma maben hak, oba nen he afuni ekhe fano hilingitarek mene nen inangge endebengge were'ma hilingiri'lagwi mene andi nek he onggo hokho mene hak werego.

¹⁷ Ap inobabut weak mene inomamerek logolik hilingiri'lagwi mene andi re At Tuhan nen enek inomame leget fisagain o, oba nen he afuni fano hilingitarek mene re inalong palogo ferinarek logogin.

¹⁸ Tuhan nen he, afuni at ane hologo hilingiri'lagwi mene andi inebe ferinarek were'ma re, it inonggwarek inalolegengge mene andi mondok-mondok eise asimbik logogun.

¹⁹ It andi yi enggin ti enggin inoba agunem he, inenggali hogoin lego, nen sumburu ouwak oba it inamburu elok ninggi logogun o.

²⁰ A'nogo meneat he, it afuni inobabut weak mene andi re, hobuk inebe alomat lakhogoin o. It afuni Tuhan aselei mene andi re, inebe engga o leimo fulelherek mene lek agarek andi hak lek agik, nen endu so'le lek agarek andi hak lek agik, ugun o.

²¹ It afuni inobabut weak mene andi nen he, yi mene ti mene it ekhe mene elama faget wanharesik he, hobuk inonggwarek wogisagarek lek. A'nogo meneat he, afuni inobabut higithogo hilingitarek mene andi nek he, inendawinggen sakhorek oba weat wogisagarek.

²² Afuni Tuhan nen fanorinabigin mene re hobuk o abok yagaisasikhe mene andi, eise asimbik logogun. A'nogo meneat he afuni Allah nen homan fisagain mene andi re, o andoma nen mugusogo wulakfisagain.

²³ It afuni nen yi wene ti wene Allah endawimo amolo anggikherek mene hilingitunem oba liok ikherek mene nek he, it hilingisugun mene Aren mondogat wenagaisogo fikherek.

²⁴ It andi At Tuhan enggi nen ninghogo ferinarek werek andi nen he, kwe laga logolik warogoin mene re, engginhogo inoasigin mondok lego.

²⁵ An nebe alageba nen pikhit yogondak arat yaman agarik welagi huli nen he, afuni inobabut higithogo hiligitarek mene andi, Tuhan nen inebe kofologo herakfisigik, iren tagomangge mene inamburu legen inambe kino weak hilinglagik, ugunem isigirek mondok lego.

²⁶ It afuni inobabut higithogo hilingitarek mene andi re, inangge afuni ekhe elama faget wogisigik, ekhe weat wogisigik, ugunem he, it andi inagainafuri inom, iren tagomangge mene inom, fanot fisikhi logogin o.

²⁷ Weak hilingitare mene andi herakfisaluk fano mene nek hilingiti logogun halok he, it inambisangmangge mene re o kweang wogisasikheba andoma mondok-mondok logouwageluk hilingfisagain o.

²⁸ At Tuhan nen he fano hilingitarek mene inom, katokhogo hilingitarek mene inom endawi hundik anggikherek. Afuni At oba tiphogo nek hilingitu welagaikharek mene re hesanggema obogerisikherek lek. Aren mondok-mondok andoma awe a'ma fisaluk ferinarek mondok werek, oba nen he, ap weak hilingitarek mene nen tagomangge mene re mondogat wathigik lakfisagain.

²⁹ It afuni inobabut Allah ane hologo higithogo hilingitarek mene andi re, hobuk o andoma eise asimbik, mondok-mondok logogun.

³⁰ It afuni inobabut higithogo hilingitarek mene andi, inendawinggen kagalek logolik inane higithogo nek igik, wene higithogoat inoba figik, kotik, agarek.

³¹ It andi re wene Tuhan Allah nen komotninafikhe wene a'nogo inendawino mondok peterogo were'ma re, ebekhalem ineisok peikhogo warigi'lek fanorogo lagaikharek.

³² Afuni inobabut weak hilingitarek mene andi nen it afuni higithogo hilingitarek mene andi inoasuogoluk ineil woginabik nikharek.

³³ A'nogo meneat he At Tuhan nen he it andi inoasuageluk inenggiba fuluk herakfisikhere'lek. Nen, wene inoba fuluk weagarinabuagaluk herakfisikherek lek.

³⁴ Hiren, Tuhan nen telninabigin iluk oba eberek logolik, Aren komotninafikhe wene andi hologo higithogo hilingiti logoino. A'nogo hilingiti logogun halok, Aren hit o abok yagahisasikhe mene andoma eise logouwagaluk agaugwet hinabimbik wokhisagain o. Nen it afuni inobabut weak hilingitarek mene andi re, inebe legetfisugunem hineilenggen hogoin aro.

³⁵ An neilenggen ekhe hugunem en he ap obabut weak hilingiterek mene nen ane nen weregaphogo hilingitunem hasigi. At ebere e muli fano wilibi'mo omanggen ninghogo pelabek a'nogo hangge hilingik welaga.

³⁶ A'nogo hasigiba nen, hobuk laga logolik hasigi re, at andi ebe le'ma hasigi.

³⁷ It afuni inobabut enago lioksek mene andi, hobuk inebe ineluk logolik fano logogun andi nen he, afuni inobabut weak hilingiti'lek higithogo nek hilingitarek mene andi re, hineil woginafi logoino o.

³⁸ A'nogo meneat he, afuni inobabut weak hilingitarek mene andi re, inebe mondok leget fisigik, nen iren tagomangge mene inebe mondogat leget fisigik igin werego.

³⁹ Tuhan nen it afuni higithogo hilingitarek mene andi inebe telinabimbik, yi enggein ti enggin inoba agunem awe a'ma fisaluk ferinarek logogin.

⁴⁰ It afuni inobabut fano hilingitarek mene andi re, inebe Allah awe a'ma kuluk welagaikharek andi nen he, it afuni weak hilingitarek mene andi nen inoasuogoluk ugunem, At Allah nen leberisaluk telinaferego.