MAZMUR 36 - Allah Wene Fano Wene Hupla Inane

Afuni nen weak hilingitarek mene inom, Allah nen fano hilingiterek mene inom fagat isikhe wene

¹ Afuni nen wuni wulak fuluk inebe ambine seberogo ugunem melalinafu mene faget, Tuhan amingmingengge Daud a'nogo awuni.

Afuni nen weak hilingitarek mene re yi'nogo

² Afuni weak enek hilingitarek mene andi re inendawinggen elonggoma nen he weak mene a'nogo ane ikherek at andi nen he ibi-eberogo nen Allah ba ekhe ailo anggikherek mondok lek.

³ Aren anggikhi loglik he an enek he nalong werek nagun welagi anggikherek, andiba re aren aweak hilingiterek mene a'nogo oba ebeterek lek, nen at aweak faget abit anggikherek legat.

⁴ Aren he fano mene inom inendawinggen wenggelogo agarek mene inom he hilingiterek lek, at ane materek mene andoma re mondok haferogo nek ikhi logolik he eranhogo wene nek ikherek.

⁵ At ebe nogoikherek oba omanogo nen he weak hilingitu mene faget wenggelherek, At obabut he fano hilingiterek mene ekhe werek lek, nen weak mene re nabit iluk herak fisikherek legat.

Allah nen fano hilingiterek mene re yi

⁶ Tuhan neisena, Haren hendawi hundik hilingninafi lagen mene andi re pogot walek po'li welagarek andi hak hilingik, nen Haren tiphogo nek hilingninafi lagen mene andi re mondok uanhogo anggulok huli andomaba hilingik.

⁷ Haren higithogo nek hilingninobagakhi lagen mene andi re tom unggul uan mene wolonghogo liabek andi higit werek, nen Haren hawene melalek werek mene andi re i laut unggut uanhogo yenggelek andi higit werek, afuni inom yi mene ti mene lebeterek mene andoma inom mondogat he Harenat halinafu mandok welagen.

⁸ Neisena Allah, Haren hendawi hundik hilingninafi lagen mene andi re onggo mondok hokho mene hangge hilingi'mo re, afuni nen Hat hogolabi a'ma hina'lasi kugunem he inagap telek werek.

⁹ Hat hailoba nen nunggu mene mondok hokho pokhorogo wogisikhi lagen andiba it mondogat inoba homot fisikherek, nen inagai re Hat agai meneat eil mondok wurik fano mene wogisikhi lagen andiba homot fisikherek.

¹⁰ Afuni yi mene ti mene ineluk werek mene andi ineluk erore we Hat hamuat welagen, Hat haselek oba nek niren selek mene hikhi lago.

¹¹ It afuni Hat hebe inelu mene halok he Haren hendawi hundik mondok logoino, nen it inendawimo higithogo nek hilingiri'lagwi mene andoma re fanorogo nek hilingfisikhi logoino.

¹² It afuni fogerakhagarek mene nen an mu'neoageluk herak nobagau fuk, athe afuni weak hilingitarek mene nen sarogo lak nobagauwageluk herak nobagau fugat.

¹³ Kwelagisan, afuni weak hilingiri'lagwi mene omanogore arat hulamberi'lagwi andi, mondogat wathigik lagaikhama re hobuk ineluk asugun mondok lek.